ഗൂഗിൾ ഹാൾ ഓഫ് ഫെയിം അവാർഡ്, ഗൂഗിളിലെ മറ്റു തെറ്റുകൾ കണ്ടെത്തുന്നതിനുള്ള പാരിതോഷികങ്ങൾ, ഗൂഗിളിൽ ചെറുപ്പത്തിലേ ജോലി കിട്ടുക തുടങ്ങി പല തരത്തിലുള്ള വാർത്തകൾ ഈയടുത്തായി പലപ്പോഴായി നമ്മൾ കേൾക്കുന്ന ഒരു വാർത്തയാണ്. ഇന്ത്യക്കാരുടെ സാന്നിധ്യം ഈ മേഖലയിൽ കൂടിവരുന്നു എന്നതിന്റെ വ്യക്തമായ തെളിവാണ് ഇത്തരത്തിലുള്ള ഓരോ വാർത്തയും.
ഇതിലേക്കിതാ ഇപ്പോൾ പുതിയൊരു വാർത്ത കൂടി എത്തിയിരിക്കുകയാണ്. ഗൂഗിൾ അന്താരാഷ്ട തലത്തിൽ AI (Artificial Intelligence) ടീമിലെ 50 പേരിൽ 5 ഇന്ത്യക്കാരും ഉൾപ്പെട്ടിരിക്കുന്നു എന്നതാണ് കാര്യം. ഇതിൽ ഒരാൾ ബംഗളൂരുവിൽ IIIT -Bയിൽ പഠിക്കുന്ന വിദ്യാർത്ഥിയാണ് എന്നതാണ് ഏറെ അതിശയകരമായ കാര്യം. പ്രതിഫലമായി ഈ ചെറുപ്പക്കാരന് ലഭിച്ചിരിക്കുന്നത് ഒരുകോടി ഇരുപത് ലക്ഷം രൂപ മതിപ്പുള്ള പാരിതോഷികമാണ്.
22 വയസ്സുള്ള എംടെക്ക് വിദ്യാർത്ഥിയായ ആദിത്യ പലിവാൽ ആണ് ഈ നേട്ടം കരസ്ഥമാക്കിയിരിക്കുന്നത്. 2013 മുതൽ 2018 വരെ അഞ്ചു വര്ഷം നീണ്ടുനിന്ന ഇരട്ട എംടെക്ക് ഡിഗ്രി പ്രാഗ്രാമിൽ ആയിരുന്നു ആദിത്യ. അതിനിടയിലാണ് ഗൂഗിളിൽ നിന്നുള്ള ഈ നിയമനം ലഭിച്ചത്. ഇതിനെ തുടർന്ന് അമേരിക്കയിൽ ന്യൂയോർക്കിലേക്ക് പറക്കാനൊരുങ്ങുകയാണ് ഈ ചെറുപ്പക്കാരൻ.
ഈ വർഷം തിരഞ്ഞെടുക്കപ്പെട്ട 50 പേരിൽ ഒരാളാവാൻ സാധിച്ച സന്തോഷത്തിലാണ് ആദിത്യ. കഴിഞ്ഞ വർഷം ഗൂഗിളിൽ ഇന്റേൺ ആയി പ്രവർത്തിച്ചിരുന്നു ആദിത്യ. തുടർന്നാണ് ഈ ഗൂഗിൾ പ്രോഗ്രാമിനെ കുറിച്ചറിഞ്ഞത്. അങ്ങനെ വിഷയത്തിൽ പഠനവും ഗവേഷണവും നടത്തുകയും പങ്കെടുക്കുകയുമായിരുന്നു. ഒപ്പം ആദിത്യക്ക് ഇഷ്ടപ്പെട്ട വിഷയം കൂടിയായിരുന്നു ഇതെന്നത് കാര്യങ്ങൾ എളുപ്പമാക്കാൻ സഹായിച്ചു.
ഒരു വർഷമാണ് ഈ പ്രോഗ്രാം. അതിനായുള്ള സൗകര്യങ്ങളടക്കമാണ് ഈ 1.2 കോടി രൂപ മൂല്യമുള്ള ഈ പാക്കേജ് വരുന്നത്. ഒരു വർഷം പൂർത്തിയാക്കിയതിന് ശേഷം തുടർ പഠനം നടത്തുകയോ അതിനോടൊപ്പം ജോലിയിൽ ഫുൾ ടൈം ആയി തുടരുകയോ ചെയ്യാം. എന്തായാലും ഈ ഒരു വർഷത്തെ പ്രകടനത്തിന്റെ അടിസ്ഥാനത്തിൽ ആയിരിക്കും ബാക്കി കാര്യങ്ങൾ തീരുമാനിക്കപ്പെടുക.