അഞ്ച് മിനുട്ട് കൊണ്ട് ക്രോം ഹാക്ക് ചെയ്തു!

ഹാക്ക് ചെയ്തവര്‍ക്ക് 4.9 കോടി രൂപ (1 മില്ല്യണ്‍ ഡോളര്‍)യാണ് ഗൂഗിള്‍ വാഗ്ദാനം ചെയ്തിരുന്നത്. ക്രോം ബ്രൗസറിനെ അതിന്റെ സുരക്ഷാകവചങ്ങളെയെല്ലാം മറികടന്നാണ് ഈ ഹാക്കര്‍ഗ്രൂപ്പ് ഹാക്ക് ചെയ്തത്.

തുടര്‍ന്ന് ആ ബ്രൗസര്‍ ഉപയോഗിച്ചിരുന്ന വിന്‍ഡോസ് പിസിയെ ഗ്രൂപ്പ് ഹാക്ക് ചെയ്ത് കാണിച്ചു. കഴിഞ്ഞവര്‍ഷവും ഇതേ മത്സരം കമ്പനി സംഘടിപ്പിച്ചിരുന്നെങ്കിലും അന്ന് കയ്യില്‍ നിന്ന് കാശ് പോയിരുന്നില്ല.

ഫ്രഞ്ച് കമ്പനിയായ വുപെനിലെ ഹാക്കര്‍മാരാണ് ഈ നേട്ടം കൈവരിച്ചത്. എക്‌സ്‌പ്ലോറര്‍, ഫയര്‍ഫോക്‌സ് എന്നീ ബ്രൗസറുകളും ഹാക്ക് ചെയ്യാനുള്ള വഴി അറിയാമായിരുന്നെങ്കിലും ആദ്യം ക്രോമിനെ നേരിടാനായിരുന്നു തീരുമാനിച്ചതെന്ന് വുപെനിലെ റിസേര്‍ച്ച് ഹെഡ് ചൗകി ബെക്രാര്‍ വ്യക്തമാക്കി.

ക്രോം ചൂഷണം ചെയ്യാനുള്ള സാധ്യതകള്‍ കണ്ടെത്താന്‍ മത്സരത്തിന്റെ ആറാഴ്ച മുമ്പേ വുപര്‍ ടീം പ്രവര്‍ത്തനം ആരംഭിച്ചിരുന്നു. ക്രോമിനെ ഹാക്ക് ചെയ്യാന്‍ സാധിക്കുകയില്ല എന്ന ധാരണ തിരുത്തുകയായിരുന്നു ലക്ഷ്യമെന്ന് ഗ്രൂപ്പ് അറിയിച്ചു.

കഴിഞ്ഞതവണ ക്രോമിനെ ഹാക്ക് ചെയ്യാന്‍ ആര്‍ക്കും സാധിച്ചില്ലെന്ന ഗൂഗിളിന്റെ വീരവാദമാണ് ഇവര്‍ക്ക് പ്രചോദനം നല്‍കിയതത്രെ. സാന്‍ഡ്‌ബോക്‌സ് എന്ന കമ്പ്യൂട്ടര്‍ സെക്യൂരിറ്റി മെക്കാനിസമാണ് ഗൂഗിള്‍ ക്രോമില്‍ ഉപയോഗിക്കാറുള്ളത്. ഇതിനെയും ഹാക്കിംഗ് ടീം ചൂഷണം ചെയ്തിരുന്നു.

ഗൂഗിള്‍ സാന്‍ഡ്‌ബോക്‌സ് ടെക്‌നോളജിയെ എങ്ങനെയാണ് മറികടന്നതെന്ന് കമ്പനിയുടെ ഉപഭോക്താക്കളുമായി പങ്കുവെക്കുമെന്നും ഈ ഫ്രഞ്ച് കമ്പനി അറിയിച്ചു.ബന്ധപ്പെട്ട വാര്‍ത്തകള്‍: ഗൂഗിള്‍ ക്രോം ഹാക്ക് ചെയ്താല്‍ 4.9 കോടി രൂപ!