2014 ജൂലൈയില്‍ ഇന്ത്യന്‍ വിപണിയിലെത്തിയ ഷവോമി ഇന്ന് ഇന്ത്യയിലെ ഏറ്റവും വലിയ സ്മാര്‍ട്ട്‌ഫോണ്‍ കമ്പനിയായി വളര്‍ന്നിരിക്കുകയാണ്. കൂടാതെ വളരെ ചുരുങ്ങിയ സമയം കൊണ്ടു തന്നെ ഇന്ത്യന്‍ ഓണ്‍ലൈന്‍ വിപണിയിലും ഏറ്റവും വില്‍പ്പനയുളള സ്മാര്‍ട്ട്‌ഫോണ്‍ ബ്രാന്‍ഡായി ഷവോമി മാറിക്കഴിഞ്ഞു.
40,000-50,000 രൂപയ്ക്കു മറ്റു കമ്പനികള്‍ വില്‍ക്കുന്ന ഫോണുകള്‍ അതേ സവിശേഷതകള്‍ നല്‍കി ഷവോമി 20,000-25,000 രൂപയ്ക്കു വില്‍ക്കുന്നു. അതു പോലെ 20,000-25,000 രൂപയ്ക്കു മറ്റു കമ്പനികള്‍ നല്‍കുന്ന ഫോണുകള്‍ ഏതാണ്ട് 10,000 രൂപയ്ക്ക് ഷവോമി നല്‍കുന്നു. അതിനാലാണ് പാവങ്ങളുടെ ഐഫോണ്‍ ഷവോമി എന്നു പറയുന്നതും.
ഇപ്പോള്‍ ചൈനയില്‍ ഷവോമി പ്രേമികള്‍ക്കായി പുതിയൊരു ഉത്പന്നം അവതരിപ്പിച്ചിരിക്കുകയാണ്. അതാണ് ഷവോമിയുടെ ആന്‍ഡ്രോയിഡ് ഫാബ്ലറ്റായ മീ പാഡ് 4 പ്ലസ്. ഈ വര്‍ഷം ജൂണില്‍ വിപണിയില്‍ ഇറക്കിയ 8 ഇഞ്ച് മീ പാഡ് 4നെ വച്ചു താരതമ്യം ചെയ്യുമ്പോള്‍ മീ പാഡ് 4 പ്ലസ് സ്‌പോര്‍ട്ട്‌സിന് 10.1 ഇഞ്ച് ഡിസ്‌പ്ലേയാണ്. ആസ്‌പെക്ട് റേഷ്യോ രണ്ടിനും 16:10 തന്നെയാണ്.
ഫാബ്ലറ്റിന്റെ മറ്റു ആകര്‍ഷകമായ സവിശേഷതകള്‍ അതിന്റെ മുന്‍ വശത്തെ വിരലടയാള സെന്‍സറാണ്. കൂടാതെ 8,620എംഎഎച്ച് ബാറ്ററിയും AI- പവര്‍ ഫേസ് അണ്‍ലോക്ക് സവിശേഷതയും ഉണ്ട്. ഒക്ടാകോര്‍ ക്വല്‍കോം സ്‌നാപ്ഡ്രാഗണ്‍ 660 SoC പ്രോസസറാണ് ഇതില്‍. മീ പാഡ് 4 പ്ലസിന് ഏകദേശ എല്ലാ സവിശേഷതകളും മീ പാഡ് 4നെ പോലെ തന്നെ.
ആന്‍ഡ്രോയിഡ് 8.1 ഓറിയോയിലാണ് ഈ ടാബ്ലറ്റ് റണ്‍ ചെയ്യുന്നത്. 13എംപി റിയര്‍ ക്യാമറയും 5എംപി മുന്‍ ക്യാമറയും മീ പാഡ് 4 പ്ലസില്‍ ഉണ്ട്. 8,620എംഎഎച്ച് ബാറ്ററിയാണ് ഇതില്‍ ഉള്‍പ്പെടുത്തിയിരിക്കുന്നത്. 4ജി എല്‍ടിഇ, വൈഫൈ, ബ്ലൂട്ടൂത്ത്, ജിപിഎസ്, GLONASS, യുഎസ്ബി ടൈപ്പ് സി എന്നിവ മറ്റു പ്രധാന സവിശേഷതകളാണ്.
ഷവോമി മീ പാഡ് 4 പ്ലസിന്റെ വിലയും ലഭ്യതയും
മീ പാഡ് 4 പ്ലസ് 4ജിബി റാം 64ജിബി വേരിയന്റിന് 19,300 രൂപയും 4ജിബി റാം 128ജിബി സ്റ്റോറേജ് വേരിയന്റിന് 21,300 രൂപയുമാണ്. ഓഗസ്റ്റ് 16ന് രാവിലെ 10 മണി മുതല്‍ ബ്ലാക്ക്, ഗോള്‍ഡ് എന്നീ നിറങ്ങളില്‍ രാജ്യത്ത് ലഭ്യമായി തുടങ്ങി.