മോട്ടറോളയുടെ മോട്ടോ E ഇന്ത്യയില്‍ നേടിയ വന്‍ വിജയത്തെ തുടര്‍ന്ന് ആഭ്യന്തര ഹാന്‍ഡ്‌സെറ്റ് നിര്‍മാതാക്കള്‍ കുറഞ്ഞ വിലയിലുള്ള ഫോണുകള്‍ പുറത്തിറക്കാന്‍ മ്‌സരിക്കുകയാണ്. ഇതിന്റെ ഭാഗമായാണ് ആന്‍േഡ്രായ്ഡ് കിറ്റ്കാറ്റ് ഒ.എസുമായി മൈക്രോമാക്‌സ് യുണൈറ്റ് 2, കാന്‍വാസ് എന്‍ഗേജ് എന്നീ ഫോണുകളും ലാവ ഐറിസ് X1 -സ്മാര്‍ട്‌ഫോണും പുറത്തിറക്കിയത്.
ഇപ്പോള്‍ കാര്‍ബണും ഈ മത്സരത്തില്‍ പങ്കുചേര്‍ന്നിരിക്കുകയാണ്. 6490 രൂപയ്ക്ക് ടൈറ്റാനിയം S1 പ്ലസ് ഫോണ്‍ അവതരിപ്പിച്ചുകൊണ്ടാണ് കാര്‍ബണ്‍ എത്തിയിരിക്കുന്നത്. ഫോണില്‍ ആന്‍ഡ്രോയ്ഡ് 4.3 ജെല്ലിബീന്‍ ആണ് ഓപ്പറേറ്റിംഗ് സിസ്റ്റം എന്നതൊഴിച്ചാല്‍ ബാക്കിയെല്ലാം മോട്ടോ E ക്ക് ഏറെക്കുറെ സമാനമാണ്.
4 ഇഞ്ച് ഡിസ്‌പ്ലെ, 480-800 പിക്‌സല്‍ റെസല്യൂഷന്‍, 1.2 GHz ക്വാഡ്‌കോര്‍ പ്രൊസസര്‍, 1 ജി.ബി. റാം, 4 ജി.ബി. ഇന്റേണല്‍ മെമ്മറി, 32 ജി.ബി. എക്‌സ്പാന്‍ഡബിള്‍ മെമ്മറി, ഡ്യുവല്‍ സിം, എന്നിവയാണ് സാങ്കേതികമായി കാര്‍ബണ്‍ ടൈറ്റാനിയം S1 പ്ലസിന്റെ പ്രത്യേകതകള്‍.
5 മെഗാപിക്‌സല്‍ പ്രൈമറി ക്യാമറയുള്ള ഫോണില്‍ മോട്ടോ E യില്‍ നിന്നു വ്യത്യസ്തമായി VGA ഫ്രണ്ട് ക്യാമറയുണ്ട്. 3 ജി, വൈ-ഫൈ, ജി.പി.എസ്, A- GPS, എഫ്.എം. റേഡിയോ, ബ്ലൂടൂത്ത് എന്നിവയാണ് കണക്റ്റിവിറ്റി ഓപ്ഷനുകള്‍. 1500 mAh ബാറ്ററി.
ഏപ്രിലില്‍ ഒരു ഓണ്‍ലൈന്‍ ഷോപ്പിംഗ് സൈറ്റില്‍ ടൈറ്റാനിയം S1 പ്ലസ് 5,749 രൂപയ്ക്ക് വിറ്റിരുന്നു. പക്ഷേ ഇപ്പോഴാണ് കാര്‍ബണ്‍ ഔദ്യോഗികമായി ഫോണ്‍ ലോഞ്ച് ചെയ്യുന്നത്.