വണ്‍പ്ലസിന്റെ ആദ്യ 5G സ്മാര്‍ട്ട്‌ഫോണ്‍ 2019-ല്‍ പുറത്തിറങ്ങുമെന്ന് ഔദ്യോഗിക സ്ഥിരീകരണം. വണ്‍പ്ലസ് 6T-യുടെ പിന്‍ഗാമിയായ വണ്‍പ്ലസ് 7-ല്‍ 5G സൗകര്യം ഉണ്ടാകില്ലെന്നും ഉറപ്പായി.
5G നെറ്റ്‌വര്‍ക്ക് സൗകര്യത്തോട് കൂടിയ ഫോണ്‍ പുതിയ ശ്രേണിയിലാകും വിപണിയിലെത്തുക. 2019 ആദ്യം പുറത്തിറങ്ങുമെന്ന് പ്രതീക്ഷിക്കപ്പെടുന്ന ഫോണ്‍ ഫെബ്രുവരിയില്‍ നടക്കുന്ന മൊബൈല്‍ വേള്‍ഡ് കോണ്‍ഗ്രസ് 2019-ല്‍ അവതരിപ്പിച്ചേക്കുമെന്നും സൂചനയുണ്ട്.
വണ്‍പ്ലസിന്റെ ആദ്യ 5G സ്മാര്‍ട്ട്‌ഫോണ്‍ പ്രവര്‍ത്തിക്കുന്നത് ക്വാല്‍കോം സ്‌നാപ്ഡ്രാഗണ്‍ 855 SoC-ല്‍ ആയിരിക്കും. ഇതിന് പുറമെ വയര്‍ലെസ് 5G നെറ്റ്‌വര്‍ക്കിന് ആവശ്യമായ X50 5G മോഡം, ആന്റിന എന്നിവയും ഉണ്ടാകും.
രൂപകല്‍പ്പനയില്‍ വണ്‍പ്ലസ് 6T-ക്ക് സമാനമായിരിക്കും 5G സ്മാര്‍ട്ട്‌ഫോണും. പൂര്‍ണ്ണമായും ഗ്ലാസ് രൂപകല്‍പ്പന, ഇരട്ട ക്യാമറ സജ്ജീകരണം, ഇന്‍-ഡിസ്‌പ്ലേ സ്‌ക്രീന്‍ അണ്‍ലോക്ക് സാങ്കേതികവിദ്യ എന്നിവയും പ്രതീക്ഷിക്കാം. വയര്‍ലെസ് ചാര്‍ജിംഗ് സൗകര്യവും വെള്ളം-പൊടിപടലങ്ങള്‍ എന്നിവയെ പ്രതിരോധിക്കാനുള്ള ശേഷിയും ഫോണിന് ഉണ്ടാകുമെന്നാണ് വിലയിരുത്തപ്പെടുന്നത്.
സവിശേഷതകളുടെ കാര്യം പരിഗണിച്ചാല്‍ ഇത് വണ്‍പ്ലസിന്റെ ഏറ്റവും വില കൂടിയ സ്മാര്‍ട്ട്‌ഫോണ്‍ ആയിരിക്കും. എന്നാല്‍ ഫോണിന്റെ വില സംബന്ധിച്ച ഒരു സൂചനയും ഇതുവരെ പുറത്തുവന്നിട്ടില്ല.
വണ്‍പ്ലസ് 6T-യുമായി താരതമ്യം ചെയ്താല്‍ വണ്‍പ്ലസ് 7-ലെ പ്രധാന വ്യത്യാസം ഹാര്‍ഡ്‌വെയറിന്റെ കാര്യത്തിലായിരിക്കും. രൂപകല്‍പ്പനയില്‍ കാര്യമായ മാറ്റം പ്രതീക്ഷിക്കേണ്ടതില്ല. പുതിയ ക്യാമറ സംവിധാനവും പ്രോസസ്സറും ഉള്‍പ്പെടുത്താന്‍ സാധ്യതയുണ്ട്. വണ്‍പ്ലസ് 7-ലും ക്വാല്‍കോം സ്‌നാപ്ഡ്രാഗണ്‍ 855 SoC ഉള്‍പ്പെടുത്തുമെന്ന് പറയപ്പെടുന്നു.