അ‌ഞ്ച് ദിവസത്തിനകം പോലീസ് വെരിഫിക്കേഷൻ; എം പാസ്പോർട്ട് ആപ്പ് പുറത്തിറക്കി കേന്ദ്ര സർക്കാർ

പാസ്പോർട്ട് അ‌പേക്ഷകരുടെ പോലീസ് വെരിഫിക്കേഷൻ അ‌തിവേഗം പൂർത്തിയാക്കാനായി എം പാസ്പോർട്ട് എന്ന പേരിൽ പുതിയ ആപ്പ് പുറത്തിറക്കി കേന്ദ്ര സർക്കാർ. ഡൽഹി പോലീസിന്റെ 76-ാമത് റൈസിംഗ് ഡേ ചടങ്ങിൽ സ്പെഷ്യൽ ബ്രാഞ്ച് ഉദ്യോഗസ്ഥർക്ക് 350 മൊബൈൽ ടാബ്‌ലെറ്റുകൾ നൽകിക്കൊണ്ട് കേന്ദ്ര ആഭ്യന്തര മന്ത്രി അ‌മിത് ഷാ ആണ് ആപ്പ് സംബന്ധിച്ച പ്രഖ്യാപനം നടത്തിയത്. പുതിയ ആപ്പ് ഉപയോഗിക്കുന്നതോടുകൂടി പാസ്പോർട്ട് അ‌പേക്ഷയിന്മേലുള്ള പോലീസ് വെരിഫിക്കേഷൻ സമയം മൂന്നിലൊന്നായി കുറയും. നേരത്തെ 15 ദിവസമാണ് പോലീസ് വെരിഫിക്കേഷന് എടുത്തിരുന്നത്.

സമയ​ദൈർഘ്യം കുറയും

എം പാസ്പോർട്ട് ആപ്പ് ഉപയോഗിക്കാൻ ആരംഭിക്കുന്നതിലൂടെ ഈ സമയ​ദൈർഘ്യം 5 ദിവസമായി കുറയും. ഇതോടെ പാസ്പോർട്ട് നൽകാനുള്ള സമയപരിധി 10 ദിവസമായി കുറയുമെന്ന് ഡൽഹി റീജിയണൽ പാസ്‌പോർട്ട് ഓഫീസർ അഭിഷേക് ദുബെ പറഞ്ഞു. ഡൽഹിയിലാണ് ഇപ്പോൾ ഈ ആപ്പിന്റെ സേവനം ലഭ്യമായിത്തുടങ്ങിയിട്ടിരിക്കുന്നത്. ''ഡൽഹിയിൽ താമസിക്കുന്ന ആളുകൾക്ക് പാസ്‌പോർട്ട് ലഭിക്കാൻ എടുക്കുന്ന സമയത്തെക്കുറിച്ച് ഇനി വിഷമിക്കേണ്ടതില്ലെന്നും ഇപ്പോൾ അവർക്ക് മുമ്പ് 15 ദിവസത്തിനുള്ളിൽ പോലീസ് ക്ലിയറൻസ് അഞ്ച് ദിവസത്തിനുള്ളിൽ ലഭിക്കും" എന്നും അ‌മിത് ഷാ തന്റെ പ്രസംഗത്തിൽ വ്യക്തമാക്കി. "ഇപ്പോൾ സ്വീകരിച്ച ഈ നടപടികൾ സ്മാർട് പോലീസിങ്ങിനായുള്ള പ്രധാനമന്ത്രി നരേന്ദ്ര മോദിയുടെ പോലീസ് ടെക്‌നോളജി മിഷന്റെ പാതയിലെ സുപ്രധാന നീക്കങ്ങളാണെന്നും അ‌ദ്ദേഹം കൂട്ടിച്ചേർത്തു.

ആപ്പ് പുറത്തിറക്കിയത്

വിദേശകാര്യ മന്ത്രാലയമാണ് ആപ്പ് പുറത്തിറക്കിയിരിക്കുന്നത്. പോലീസ് വെരിഫിക്കേഷന്റെയും റിപ്പോർട്ടിന്റെയും മുഴുവൻ പ്രക്രിയയും കടലാസ് രഹിതമാക്കാൻ ഈ ആപ്പ് സംവിധാനം സഹായിക്കുമെന്ന് വിദേശകാര്യ മന്ത്രാലയത്തിന്റെ ഡൽഹി റീജിയണൽ പാസ്‌പോർട്ട് ഓഫീസ് കഴിഞ്ഞ ദിവസം പുറത്തിറക്കിയ പ്രസ്താവനയിൽ പറയുന്നു. സേവനങ്ങൾ കാര്യക്ഷമമായി ജനങ്ങളിലേക്ക് എത്തിക്കാനും ഡിജിറ്റൽ ഇന്ത്യ എന്ന ലക്ഷ്യത്തിലേക്ക് മുന്നേറാനും വിദേശകാര്യ മന്ത്രാലയവും പ്രതിജ്ഞാബദ്ധരാണെന്നും ഡൽഹി റീജിയണൽ പാസ്‌പോർട്ട് ഓഫീസ് തങ്ങളുടെ ട്വീറ്റിലൂടെയും വ്യക്തമാക്കി.

പരിശീലനം നൽകും

സ്‌മാർട്ട് പോലീസിംഗ് ശക്തിപ്പെടുത്തുന്നതിനായി എം പാസ്പോർട്ട് ആപ്പ് ടാബ്‌ലെറ്റുകളിൽ ആപ്ലിക്കേഷൻ എങ്ങനെ ഉപയോഗിക്കാമെന്ന് പോലീസ് ഉദ്യോഗസ്ഥർക്ക് പരിശീലനം നൽകും. പ്രതിദിനം 2,000 പാസ്‌പോർട്ട് അപേക്ഷകൾ ആണ് പാസ്‌പോർട്ട് ഓഫീസുകളിൽ ലഭിക്കുന്നതെന്നും അവയുടെ ഓൺലൈൻ പ്രോസസ്സിങ്ങിൽ ആളുകൾ നേരിടുന്ന പ്രശ്‌നങ്ങൾ കുറയ്ക്കാൻ പുതിയ ആപ്പ് സഹായിക്കുമെന്നും അ‌ധികൃതർ വ്യക്തമാക്കി.

പാസ്‌പോർട്ട് സേവാ പോർട്ടൽ വഴിയോ എംപാസ്പോർട്ട് മൊബൈൽ ആപ്ലിക്കേഷൻ വഴിയോ ഓൺലൈനായി പാസ്‌പോർട്ടിന് അപേക്ഷിക്കാനുള്ള നടപടികൾ:

• സ്റ്റെപ്പ് 1: ഡൽഹിയിൽ താമസിക്കുന്ന ആളുകൾക്കാണ് ആദ്യ ഘട്ടത്തിൽ എംപാസ്പോർട്ട് സേവാ സൗകര്യം പ്രയോജനപ്പെടുത്താൻ കഴിയുക. അ‌തിനായി ആദ്യം രജിസ്റ്റർ ചെയ്യണം

• സ്റ്റെപ്പ് 2: തുടർന്ന് ലോഗിൻ ചെയ്ത് "Apply for Police Clearance Certificate" എന്ന ലിങ്കിൽ ക്ലിക്ക് ചെയ്യുക.

• സ്റ്റെപ്പ് 3: ശേഷം അപ്പോയിന്റ്മെന്റ് ഷെഡ്യൂൾ ചെയ്യാനും പേയ്മെന്റ് നടത്താനും വിശദാംശങ്ങൾ സമർപ്പിക്കുക. അ‌തിനെത്തുടർന്ന് '' Pay and Schedule Appointment'' എന്നതിൽ ക്ലിക്ക് ചെയ്യുക.

• സ്റ്റെപ്പ് 4: പേയ്‌മെന്റ് വിജയകരമായി പൂർത്തിയാക്കിയാൽ Print Application Receipt" എന്ന ലിങ്കിൽ ക്ലിക്ക് ചെയ്ത് രസീത് പ്രിന്റെടുക്കുക. അ‌തല്ലെങ്കിൽ പണമടച്ചതിന്റെ രസീത് എസ്എംഎസ് ആയി ലഭിക്കാൻ കാത്തിരിക്കുക.

• സ്റ്റെപ്പ് 5: ശേഷം, അപ്പോയിന്റ്മെന്റ് ഷെഡ്യൂൾ ചെയ്തിരിക്കുന്ന പ്രകാരം പാസ്പോർട്ട് സേവാ കേന്ദ്രം സന്ദർശിക്കുക. ആവശ്യമായ എല്ലാ രേഖകളും ഈ സമയം കൊണ്ടുപോകേണ്ടതുണ്ട്.

പാസ്പോർട്ട് നടപടിക്രമങ്ങളുടെ വിശദമായ വിവരങ്ങൾ passportindia.gov.in എന്ന ഔദ്യോഗിക വെബ്‌സൈറ്റിൽ നിന്ന് മനസിലാക്കാവുന്നതാണ്.