ഇത്രയും നല്ല സൗകര്യങ്ങൾ നൽകിയിട്ടും വേണ്ടെന്നോ! മാറിയേ പറ്റൂ; ജി മെയിലിൽ ഇനി ഗൂഗിളിന്റെ തനി സ്റ്റൈൽ മാത്രം

വളരെ സിംപിളായി ആർക്കും എളുപ്പത്തിൽ മെയിൽ അ‌യയ്ക്കാനും ​കൈകാര്യം ചെയ്യാനും സാധിക്കും വിധത്തിലാണ് ഗൂഗിൾ തങ്ങളുടെ ജി- മെയിലിന്റെ യൂസർ ഇന്റർ​ഫേസ് ഒരുക്കിയിരുന്നത്. ഏതാണ്ട് ഒരു വർഷം മുമ്പ് ഈ യൂസർ ഇന്റർഫേസിൽ ഗൂഗിൾ ഏതാനും പരിഷ്കാരങ്ങൾ വരുത്തി മെച്ചപ്പെടുത്തിയിരുന്നു. എന്നാൽ ഉപയോക്താക്കളുടെ സൗകര്യാർഥം അ‌വർക്ക് വേണമെങ്കിൽ പഴയ ലേ ഔട്ടിൽ തന്നെ തുടരാനുള്ള സൗകര്യവും ഗൂഗിൾ നൽകിയിരുന്നു.

എന്നാൽ ഈ ഓപ്ഷൻ പിൻവലിച്ച്, ഇനി മുതൽ എല്ലാവരും ജി​- മെയിലിന്റെ പുതിയ രൂപമാറ്റത്തിനൊപ്പം കർശനമായി മാറണം എന്നാണ് ഇപ്പോൾ ഗൂഗിൾ നിർദേശിച്ചിരിക്കുന്നത്. അ‌തിനാൽ ഇനി പഴയ ലേ ഔട്ട് ഉപയോഗിച്ച് വന്നിരുന്നവർക്ക് ഈ മാസം മുതൽ ഇനി പഴയ രൂപത്തിൽ തുടരാൻ കഴിയില്ല. ഗൂഗിൾ മീറ്റ്, ഗൂഗിൾ ചാറ്റ് ഉൾപ്പെടെയുള്ള സംവിധാനങ്ങൾ ഇനി എളുപ്പത്തിൽ ഉപയോഗിക്കാം എന്നതാണ് പുതിയ അ‌പ്ഡേറ്റിന്റെ പ്രത്യേകത.

ഇപ്പോൾ ജി മെയിൽ ഓപ്പൺ ചെയ്താൽ ഇടതുഭാഗത്ത് ജി മെയിൽ, ചാറ്റ്, സ്‌പെയ്‌സസ്, മീറ്റ് എന്നിവ കാണാനാവും. ഈ വിധത്തിലാണ് പുതിയ ക്രമീകരണങ്ങൾ ഒരുക്കിയിരിക്കുന്നത്. ജി മെയില‍ിന്റെ സേവനങ്ങൾ വേഗത്തിൽ ഉപയോഗിക്കാം എന്നതാണ് ഇതിന്റെ പ്രത്യേകത. ചാറ്റ് ഓൺ ആക്കിയിട്ടാൽ ഉപയോക്താക്കളുടെ ജി മെയിലിന്റെ വിൻഡോയിൽ ജി മെയിൽ, ചാറ്റ്, സ്‌പേസസ്, മീറ്റ് എന്നീ ബട്ടണുകൾ കാണാം.

ഇതാണ് പുതിയ ഡിസൈൻ. പുതിയ അപ്ഡേറ്റനുസരിച്ച് വിൻഡോയിൽ ആവശ്യമുള്ള ഓപ്ഷനുകൾ നിലനിർത്താനും എളുപ്പം ഉപയോഗിക്കാനും കഴിയും. ചാറ്റ് ചെയ്യാൻ ഇഷ്ടപ്പെടുന്ന ഉപയോക്താക്കൾക്ക് ഇൻകമിങ് സന്ദേശങ്ങളുടെ സ്‌നിപ്പെറ്റുകളുള്ള സംഭാഷണ കുമിളകൾ കാണും, ഒപ്പം മുഴുവൻ സന്ദേശവും തുറക്കുന്നതിന് പകരം പെട്ടെന്ന് മറുപടി നൽകാനുള്ള ഓപ്‌ഷനുകളും പുതിയ യൂസർ ഇന്റർഫേസിൽ ലഭ്യമാണ്.

ഈ വർഷം ഫെബ്രുവരിയിൽ പരീക്ഷണാടിസ്ഥാനത്തിൽ ആണ് ജിമെയിൽ പുതിയ രൂപത്തിലേക്ക് മാറ്റിയത്. ഏപ്രിലോടെ ഇത് കൂടുതൽ ആളുകളിലേക്ക് എത്തിച്ചു. ദിവസവും ജിമെയിൽ ഉപയോഗിക്കുന്ന ആളുകൾ ധാരാളം ​ഉണ്ട്. ഇതിൽ നിരവധിപേരും ഇതുവരെ പിന്തുടർന്നുവന്നതും കണ്ടുവന്നതുമായ ജി-മെയിൽ സൗകര്യങ്ങളിൽനിന്ന് മാറാതെ പരിചിതമായ സാഹചര്യം നിലനിർത്തി പോകുന്ന ആളുകളായിരുന്നു.

അ‌തിനാൽത്തന്നെ പഴയ രീതി തുടരാൻ പലരും തീരുമാനിക്കുകയായിരുന്നു. കൂടാതെ പുതിയ ഡി​സൈനെപ്പറ്റി നിരവധി പരാതികളും ചിലർ ഉന്നയിച്ചു. ഇതെല്ലാം കണക്കിലെടുത്തും പരീക്ഷണ ഘട്ടമായിരുന്നതുകൊണ്ടും ഡി​സൈനിൽ വരുത്തിയ മാറ്റ, അ‌ടിച്ചേൽപ്പിക്കാതെ പഴയ ഡി​സൈൻ മതി എന്നുള്ളവർക്ക് അ‌ത് തുടരാൻ ഉള്ള ഓപ്ഷൻ ഗൂഗിൾ നൽകുകയായിരുന്നു. ഈ ഇളവാണ് ഈ മാസത്തോടെ ഇല്ലാതാകുന്നത്.

തണ്ടർബേഡ് ഉൾപ്പെടെ നിരവധി ഇ- മെയിൽ സംവിധാനങ്ങൾ ഉണ്ടെങ്കിലും ലോകത്ത് ഏകദേശം 75 ശതമാനം ആളുകളും ജി മെയിൽ ആണ് ഉപയോഗിക്കുന്നത്. മൊബൈൽ വഴിയും ലാപ്ടോപ്പു വഴിയും ജി മെയിൽ ഉപയോഗിക്കാൻ അ‌നായാസമായി സാധിക്കും. 1.8 ബില്യണിലധികം ആളുകൾ ജി മെയിൽ ഉപയോഗിക്കുന്നുവെന്നാണ് കണക്ക്. ഇ മെയിൽ ക്ലയന്റ് മാർക്കറ്റ് ഷെയറിന്റെ 18 ശതമാനം ഉള്ളതാകട്ടെ ഗൂഗിളിന്റെ ജി മെയിൽ സേവനത്തിന്റെ പേരിലാണ്.