ഫോൺ നമ്പറിന് പകരം പേര്; വാട്സ്ആപ്പിൽ പുതിയ മാറ്റം എത്തുന്നു

ഉപയോക്താക്കളുടെ സുരക്ഷയെക്കരുതി പുത്തൻ അ‌പ്ഡേറ്റുകൾ പുറത്തിറക്കുന്നതിൽ വാട്സ്ആപ്പ് എപ്പോഴും മുന്നിലാണ്. അ‌ക്കാര്യം ഒരിക്കൽക്കൂടി ആവർത്തിച്ച് ഉറപ്പിച്ചുകൊണ്ട് പുതിയതായി ഒരു അ‌പ്ഡേഷൻ കൂടി പുറത്തിറക്കിയിരിക്കുകയാണ് വാട്സ്ആപ്പ്. ഗ്രൂപ്പ് ചാറ്റുകളിൽ ഉപയോക്താക്കളുടെ മൊ​ബൈൽ നമ്പറിന് പകരം പേരുകൾ(PROFILE ICONS) നൽകുന്ന രീതിയാണ് വാട്സ്ആപ്പ് പുതിയതായി പുറത്തിറക്കിയിരിക്കുന്നത്.

പുതിയ അപ്‌ഡേറ്റിന് ശേഷം, ഉപയോക്താക്കൾക്ക് വാട്ട്‌സ്ആപ്പ് ഗ്രൂപ്പിലെ ഏതെങ്കിലും അജ്ഞാത കോൺടാക്റ്റിൽ നിന്ന് സന്ദേശം ലഭിച്ചാൽ ഫോൺ നമ്പറുകൾക്ക് പകരം പുഷ് പേരുകൾ ആണ് കാണുക. ഗ്രൂപ്പ് ചാറ്റുകളുടെ മെസേജ് ബബിളിനുള്ളിൽ നമ്പരിന് പകരം പുഷ് പേരുകൾ ദൃശ്യമാകുന്ന ഫീച്ചർ കഴിഞ്ഞ ഡിസംബറിൽ വാട്ട്‌സ്ആപ്പ് അവതരിപ്പിച്ചിരുന്നു.

ഗ്രൂപ്പ് ചാറ്റ് വിൻഡോയിലെ അജ്ഞാത കോൺടാക്റ്റുകളിൽ നിന്നുള്ള സന്ദേശങ്ങൾ ഉപയോക്താക്കൾക്ക് തിരിച്ചറിയുന്നത് ഈ സവിശേഷത എളുപ്പമാക്കി. ഇപ്പോൾ വാബീറ്റ ഇൻഫോ റിപ്പോർട്ടുകൾ കണക്കിലെടുത്താൽ വാട്സ്ആപ്പ് തങ്ങളുടെ ചാറ്റ് ലിസ്റ്റിലേക്കും ഈ സവിശേഷത കൊണ്ടുവന്നിരിക്കുകയാണ്. അതുവഴി ഉപയോക്താക്കൾക്ക് ഗ്രൂപ്പ് ചാറ്റിൽ ആരിൽ നിന്നാണ് സന്ദേശങ്ങൾ ലഭിച്ചതെന്ന് അറിയാൻ കഴിയും.

നമ്പർ സേവ് ചെയ്യാത്ത കോണ്ടാക്ടിൽ നിന്ന് മെസേജ് എത്തിയാലും ആരാണ് മെസേജ് അ‌യച്ചത് എന്ന് മനസിലാക്കാൻ കഴിയും എന്നതാണ് വാട്സ്ആപ്പ് ഇപ്പോൾ പുറത്തിറക്കിയിരിക്കുന്ന ഈ ഫീച്ചറിന്റെ പ്രധാന പ്രത്യേകത. ഗ്രൂപ്പ് അ‌ംഗങ്ങളുടെ ലിസ്റ്റ് പരിശോധിക്കുമ്പോൾ ഉൾപ്പെടെ സേവ് ചെയ്യാത്ത നമ്പരുകളും പേരോടുകൂടി തന്നെയായിരിക്കും കാണുക.

മെസേജ് ലഭിക്കുന്നത് ആരിൽനിന്നാണ് എന്ന് കൃത്യമായി മനസിലാക്കാൻ സഹായിക്കും എന്നതാണ് ഈ ഫീച്ചറിന്റെ മറ്റൊരു പ്രത്യേകത. വലിയ ഗ്രൂപ്പുകളിൽ ഒരുപാട് അ‌ംഗങ്ങൾ ഉണ്ടാകും. എല്ലാവരുടെയും പേരുകൾ സേവ് ചെയ്ത് വയ്ക്കുക അ‌ൽപ്പം പാടായിരിക്കും. അ‌തിനാൽ പുതിയ ഫീച്ചർ നമ്പറിന് പകരം പേര് കാണിക്കുന്നതിനാൽ ആരാണ് മെസേജ് അ‌യച്ചത് എന്ന് വേഗം മനസിലാക്കാൻ സാധിക്കുന്നു.

ആൻഡ്രോയിഡ് ഉപയോക്താക്കൾക്കായുള്ള ഏറ്റവും പുതിയ വാട്ട്‌സ്ആപ്പ് 2.23.5.12 അ‌പ്ഡേറ്റിലും ഐഒഎസ് ഉപയോക്താക്കൾക്കായുള്ള ഏറ്റവും പുതിയ 23.5.0.73 അ‌പ്ഡേഷനിലും പുതിയ ഫീച്ചർ പുറത്തിറക്കിയിരിക്കുന്നു. പരിശോധനയ്ക്ക് ശേഷം, ആപ്പിന്റെ ഭാവി അപ്‌ഡേറ്റുകളിൽ ഫീച്ചർ എല്ലാവർക്കും ലഭ്യമാകും. അതിനിടെ, ഗ്രൂപ്പ് അഡ്മിൻമാർക്ക് കൂടുതൽ നിയന്ത്രണം നൽകുന്ന ഫീച്ചറും വാട്ട്‌സ്ആപ്പ് പരീക്ഷിക്കാൻ തുടങ്ങിയിട്ടുണ്ട്.

പുതിയ അ‌പ്രൂവൽ ഫീച്ചർ ആണ് വാട്സ്ആപ്പ് ഗ്രൂപ്പ് അ‌ഡ്മിൻമാർക്കായി വാട്സ്ആപ്പ് അ‌വതരിപ്പിച്ചിരിക്കുന്നത്. ഗ്രൂപ്പ് ഇൻവിറ്റ് ലിങ്ക് ആണെങ്കിലും ഗ്രൂപ്പിൽ ആർക്കൊക്കെ ചേരാം എന്നതിനെ നിയന്ത്രിക്കാൻ ഈ പുതിയ ഫീച്ചർ ഗ്രൂപ്പ് അഡ്മിൻമാരെ അനുവദിക്കും. ഇതുവഴി ഗ്രൂപ്പുകളുടെ മേൽ അ‌ഡ്മിൻമാർക്ക് കൂടതൽ അ‌ധികാരം വന്നുചേരുന്നു.

സെറ്റിങ്സിൽ പുതിയ ഓപ്ഷൻ എനേബിൾ ചെയ്യുന്നതോടുകൂടി ചാറ്റ് ലിങ്ക് ഉപയോഗിച്ച് ഒരു വ്യക്തി ഗ്രൂപ്പിൽ ചേരാൻ ശ്രമിക്കുമ്പോഴെല്ലാം, ഗ്രൂപ്പിൽ ചേരുന്നതിന് പുതിയ പങ്കാളി അഡ്മിനിൽ നിന്ന് അനുമതി തേടുന്നതായി പ്രസ്താവിക്കുന്ന ഒരു ചാറ്റ് പ്രോംപ്റ്റ് എല്ലാ അംഗങ്ങളും കാണും. ഇതുവഴി, ആർക്കൊക്കെ ചേരാമെന്നും കൂടുതൽ കാര്യക്ഷമമായി ഗ്രൂപ്പ് മാനേജ് ചെയ്യാമെന്നും നിയന്ത്രിക്കാൻ അഡ്മിന് കഴിയും.

മറ്റൊരു ബീറ്റ അപ്‌ഡേറ്റിൽ, ചാറ്റുകളിലേക്ക് 21 പുതിയ ഇമോജികൾ കൊണ്ടുവരാൻ വാട്ട്‌സ്ആപ്പ് പദ്ധതിയിടുന്നതായും റിപ്പോർട്ടുകളുണ്ട്. തുടരെ തുടരെ കൊണ്ടുവരുന്ന ഇത്തരം അ‌പ്ഡേറ്റുകളിലൂടെയും ഫീച്ചറുകളിലൂടെയും ഉപയോക്താക്കളെ സജീവമായി വാട്സആപ്പിൽ സജീവമായി നിലനിർത്താനാണ് വാട്സ്ആപ്പ് ശ്രമിക്കുന്നത്. സുരക്ഷയ്ക്കൊപ്പം ഉപയോഗം കൂടുതൽ എളുപ്പമാക്കുന്ന തരത്തിലുള്ള ഫീച്ചറുകളും വാട്സ്ആപ്പ് തയാറാക്കിവരുന്നു.