നിങ്ങളുടെ ഫോണിൽ ഈ ഗെയിമുകൾ ഒറ്റയ്ക്ക് ഇരുട്ടിൽ കളിച്ചുനോക്കാൻ എത്ര പേർക്ക് ധൈര്യമുണ്ട്?

Eyes - The Horror Game

ഏറെ ഭയപ്പെടുത്താൻ സാധ്യതയുള്ള ഒരു ഗെയിം ആണിത്. പല ഗെയിമുകളിലും ജീവികളെയും സത്വങ്ങളെയുമെല്ലാം കൊല്ലുകയും മുന്നേറുകയുമാണെങ്കിൽ ഇവിടെ അതൊന്നുമല്ല വിഷയം. പകരം ഒരു കെട്ടിടത്തിനുള്ളിൽ നമ്മൾ തനിയെ ആണ്. നമുക്ക് അതിനുള്ളിൽ എവിടേക്ക് വേണമെങ്കിലും സഞ്ചരിച്ചു നോക്കാം. പക്ഷെ അങ്ങനെ സഞ്ചരിച്ചുകൊണ്ടിരിക്കുമ്പോൾ ആയിരിക്കും പെട്ടെന്ന് അത്-ആ സംഭവം നടക്കുക. പേടിക്കാൻ താല്പര്യമുണ്ടെങ്കിൽ മാത്രം കളിച്ചു നോക്കുക.

Five Nights at Freddy's പരമ്പര

വളരെ ജനപ്രീതിയുള്ള ഭീകര ഗെയിമുകളുടെ ഒരു പരമ്പരയാണ് ഇത്. ഓരോ ഗെയിമും പണമടച്ച് തന്നെ വാങ്ങേണ്ടതുണ്ട്. പെട്ടെന്നുള്ള പേടിപ്പെടുത്തുന്ന രംഗങ്ങൾ തന്നെയാണ് ഈ ഗെയിമുകളുടെ പ്രത്യേകത. റോബോട്ടുകളെ നോക്കി കണ്ണ് തുറന്നിരിക്കുക എന്നതാണ് കളിയുടെ മർമ്മഭാഗം. അവർ നമ്മെ കൊല്ലാൻ ശ്രമിക്കും. നമുക്ക് നിലനിൽക്കാൻ കഴിയുമെങ്കിൽ ഗെയിം വിജയിക്കും.

Fran Bow പരമ്പര

പേടിപ്പെടുത്തുന്ന മറ്റൊരു ഗെയിം പരമ്പരയാണ് ഇത്. ഓരോ ഗെയിമുകൾക്കും അതിന്റേതായ കഥയും പേരുകളുമുണ്ട്. മറ്റു പല ഗെയിമുകളെയും അപേക്ഷിച്ചു നോക്കുമ്പോൾ ഈ ഗെയിമിനെ പ്രശസ്തമാക്കുന്നത് ഓരോ ഭാഗങ്ങളായി തന്നെ ഡൗൺലോഡ് ചെയ്യാൻ സാധിക്കും എന്നതാണ്. അൽപ്പം ഭയപ്പെടുത്തുന്ന ഒരു അവതരണത്തോട് കൂടിയ ഈ ഗെയിം കളിച്ചു നോക്കാവുന്നതാണ്.

Limbo

ഹൊറർ ഗെയിമുകളുടെ കൂട്ടത്തിൽ എടുത്തുപറയേണ്ട മറ്റൊരു ഗെയിം ആണ് ഇത്. തന്റെ നഷ്ടപ്പെട്ട സഹോദരിയെ തിരയുന്ന ഒരു കഥാപാത്രമായാണ് നമ്മൾ ഇതിൽ കളിക്കുക. ഓരോ പസ്സിലുകളും പ്രശ്നങ്ങളും പരിഹരിച്ച് മുന്നോട്ട് നീങ്ങും. ഈ ഗെയിം ഹെഡ്സെറ്റ് ഉപയോഗിച്ചു കളിച്ചുനോക്കുകയാണെങ്കിൽ ഒന്നുകൂടെ പേടിപ്പെടുത്തുന്ന ഒരു അന്തരീക്ഷം നമുക്ക് ലഭിക്കും. സംഗീതവും പശ്ചാത്തലവുമെല്ലാം തന്നെ ഒരു പ്രത്യേക ഹൊറർ മൂഡ് ഉണ്ടാക്കിയെടുക്കും.

Dead Effect 2

Dead Effect 2 അൽപ്പം ഞെട്ടിപ്പിക്കുന്ന ഒരു Sci-fi ഷൂട്ടർ ആണ്. നിങ്ങൾ മൂന്നു കഥാപാത്രങ്ങളിൽ ഒന്നായിരിക്കും. നിങ്ങളുടെ ലക്ഷ്യം ഓരോ ലെവലുകളും താണ്ടി മൂന്നോട്ട് പോകുക, പുതിയ ആയുധങ്ങൾ കണ്ടെത്തുക, വില്ലന്മാരെ പരാജയപ്പെടുത്തുക എന്നതാണ്. ഈ രീതിയിൽ കളിച്ചു മുന്നോട്ട് പോകാം. നല്ല ഗ്രാഫിക്സ് ഉള്ള ഈ ഗെയിം നിങ്ങൾക്ക് ഇഷ്ടപ്പെടും എന്ന് തീർച്ച. എന്നിരുന്നാലും നിങ്ങളുടേത് ഒരു എൻവിഡിയ ഷീൽഡ് ഫോൺ ആണെങ്കിൽ ഒന്നുകൂടെ ഗ്രാഫിക്സ് മനോഹരമായിരിക്കും.

മറ്റു പ്രധാന ഹൊറർ ഗെയിമുകൾ

Room, Slender Man, Unkilled, Walking Dead, Dead Trigger, Oxenfree, Into the dead, Distraint, Another World, Forrest, Horror Hospital എന്നിങ്ങനെ ഒരുപിടി നല്ല ഹൊറർ ഗെയിമുകളും ആൻഡ്രോയിഡ് പ്ളേ സ്റ്റോറിൽ ലഭ്യമാണ്. എല്ലാം നിങ്ങളുടെ താല്പര്യത്തിനും ഇഷ്ടത്തിനും അനുസരിച്ച് മാത്രം കളിക്കുക. ഇനി ഇതൊക്കെ കളിച്ചിട്ടും എനിക്ക് പേടി വരുന്നില്ല, വന്നില്ല എന്ന് തോന്നുകയാണെങ്കിൽ അതിന് പ്രത്യേകിച്ച് ഒന്നും ചെയ്യാനുമില്ല. കാരണം ഓരോരുത്തരുടെയും ആസ്വാദനവും മാനസികമായ കരുത്തും എല്ലാം തന്നെ വ്യത്യസ്തമായിരിക്കുമല്ലോ.