വീഡിയോ കോളിൽ ലൈറ്റ് ഒരു പ്രശ്നമല്ലന്നേ! പുതിയ വീഡിയോ കോൾ ഫീച്ചറുമായി വാട്ട്‌സ്ആപ്പ്

ജനപ്രിയ മെസ്സേജിങ് പ്ലാറ്റ്ഫോമായ വാട്ട്‌സ്ആപ്പ് അതിൻ്റെ ഉപയോക്താക്കൾക്ക് വീഡിയോ കോളിംഗ് അനുഭവം വർദ്ധിപ്പിക്കാൻ സഹായിക്കുന്ന ഒരു പുതിയ അപ്‌ഡേറ്റ് പുറത്തിറക്കി. പുതിയ അപ്‌ഡേറ്റിൽ, ഇപ്പോൾ ഉപഭോക്താക്കൾക്ക് വീഡിയോ കോളുകൾക്കിടയിൽ ലോ-ലൈറ്റ് മോഡ് ഉപയോഗിക്കാൻ കഴിയും. മങ്ങിയ വെളിച്ചമുള്ള ക്രമീകരണങ്ങളിൽ വീഡിയോ ഗുണനിലവാരം മെച്ചപ്പെടുത്തുന്നതിനാണ് ഫീച്ചർ രൂപകൽപ്പന ചെയ്തിരിക്കുന്നത്. വീഡിയോ കോൾ സമയത്ത് ഉപയോക്താക്കൾ പുതിയ ഫിൽട്ടറുകളും പശ്ചാത്തല സവിശേഷതകളും ശ്രദ്ധിച്ചിരിക്കാമെങ്കിലും, പല സമയങ്ങളിലും നമുക്ക് ഉപകാരപ്പെടുന്ന ലോ-ലൈറ്റ് മോഡ് എന്ന മികച്ച സവിശേഷത നിങ്ങളുടെ ശ്രദ്ധയിൽ പെട്ടിരുന്നോ?

വാട്ട്‌സ്ആപ്പിൻ്റെ ലോ-ലൈറ്റ് മോഡ് എന്താണ്? പേര് സൂചിപ്പിക്കുന്നത് പോലെ, ലോ-ലൈറ്റ് മോഡ് കുറഞ്ഞ വെളിച്ചമുള്ള പരിതസ്ഥിതിയിൽ കോളുകൾ ചെയ്യുമ്പോൾ വീഡിയോ ഗുണനിലവാരം വർദ്ധിപ്പിക്കാൻ ലക്ഷ്യമിടുന്ന വാട്ട്‌സ്ആപ്പിന്റെ പുതിയ ഫീച്ചർ ആണ്. ഫീച്ചർ പരീക്ഷിക്കുകയും ഉപയോഗിക്കുകയും ചെയ്യുമ്പോൾ, മൊത്തത്തിൽ ഉള്ള തെളിച്ചം ഗണ്യമായി മെച്ചപ്പെടുന്നു. മുഖത്തിന് അധിക പ്രകാശം നൽകുകയും ഇരുട്ട് സമയങ്ങളിൽ വീഡിയോയിലെ വ്യക്തതയെ തടസ്സപ്പെടുത്തുന്ന ഗ്രെയിനിനെസ്സ് കുറയ്ക്കുകയും ചെയ്യുന്നു.

അതായത് നിങ്ങൾ വീഡിയോ കോൾ ചെയ്യുമ്പോൾ ലൈറ്റിംഗ് അവസ്ഥകൾ എന്തായാലും നിങ്ങളുടെ സുഹൃത്തുക്കൾക്കും കുടുംബാംഗങ്ങൾക്കും നിങ്ങളെ നന്നായി കാണാൻ കഴിയും എന്നാണ് ഇതിന് അർത്ഥം. എന്നാൽ വാട്ട്‌സ്ആപ്പിൽ ലോ-ലൈറ്റ് മോഡ് എങ്ങനെ പ്രവർത്തനക്ഷമമാക്കാം എന്ന കാര്യത്തിൽ നിങ്ങൾക്ക് സംശയം ഉണ്ടോ? ലോ-ലൈറ്റ് മോഡ് ഫീച്ചർ ഉപയോഗിക്കാൻ വളരെ എളുപ്പമാണ്. ഇത് പ്രവർത്തനക്ഷമമാക്കാൻ താഴെ പറയുന്ന ഘട്ടങ്ങൾ പാലിക്കുക.

നിങ്ങളുടെ ഫോണിലെ വാട്ട്‌സ്ആപ്പ് ഓപ്പൺ ആക്കുക. നിങ്ങൾക്ക് ആഗ്രഹമുള്ള വ്യകിതിയെ വീഡിയോ കോൾ ചെയ്യുക. നിങ്ങളുടെ വീഡിയോ ഫീഡ്, അതായത് നിങ്ങളുടെ ഫേസ് വരുന്ന സ്‌ക്രീൻ ഫുൾ സ്ക്രീനിലേക്ക് വികസിപ്പിക്കുക. ലോ-ലൈറ്റ് മോഡ് സജീവമാക്കാൻ മുകളിൽ വലത് കോണിലുള്ള 'ബൾബ്' ഐക്കണിൽ ടാപ്പ് ചെയ്യുക. ഇപ്പോൾ ലോ-ലൈറ്റ് മോഡ് ഫീച്ചർ പ്രവർത്തനക്ഷമമായി കഴിഞ്ഞു.

ഇനി ഫീച്ചർ പ്രവർത്തനരഹിതമാക്കാൻ, ബൾബ് ഐക്കണിൽ വീണ്ടും ടാപ്പ് ചെയ്യുക മാത്രം മതി. ഈ ഗുണകരമായ ഇൻ്റർഫേസ് സവിശേഷത നിങ്ങൾക്ക് ആവശ്യാനുസരണം വേഗത്തിൽ മാറ്റാൻ കഴിയുമെന്ന് ഉറപ്പാക്കുന്നു. എന്നാൽ ഇതിൽ ശ്രദ്ധിക്കേണ്ട പ്രധാന ചില കാര്യങ്ങൾ ഉണ്ട്. വ്യത്യസ്ത പ്ലാറ്റ്‌ഫോമുകളിൽ ഉടനീളമുള്ള വാട്ട്‌സ്ആപ്പിലെ ലോ-ലൈറ്റ് മോഡിനെ കുറിച്ചുള്ള പ്രധാന വിശദാംശങ്ങൾ ഇതാ...

ഫീച്ചർ ലഭ്യത: വാട്ട്‌സ്ആപ്പിൻ്റെ ഐഒഎസ് (iOS), ആൻഡ്രോയിഡ് (Android) പതിപ്പുകളിൽ ലോ-ലൈറ്റ് മോഡ് ലഭ്യമാണ്. പക്ഷെ നിർഭാഗ്യവശാൽ, വിൻഡോസ് വാട്ട്‌സ്ആപ്പ് ആപ്പിൽ ഈ ഫീച്ചർ ലഭ്യമല്ല. എന്നിരുന്നാലും, വാട്ട്‌സ്ആപ്പ് ഉപയോക്താക്കൾക്ക് അവരുടെ വീഡിയോ കോളുകൾക്കായി ഇപ്പോഴും ബ്രൈറ്റ്നസ് നില ക്രമീകരിക്കാൻ സാധിക്കും.

താൽക്കാലിക ആക്ടിവേഷൻ : ലോ-ലൈറ്റ് മോഡ് ഓരോ കോളിനും സജീവമാക്കേണ്ടതുണ്ട്. കാരണം ഇത് ശാശ്വതമായി പ്രവർത്തനക്ഷമമാക്കാൻ നിലവിൽ ഓപ്ഷനുകൾ ഒന്നുമില്ല. ഈ പുതിയ ലോ-ലൈറ്റ് മോഡ് ഉപയോഗിച്ച്, അനുയോജ്യമല്ലാത്ത ലൈറ്റിംഗ് സാഹചര്യങ്ങളിൽപ്പോലും ഉപയോക്താക്കൾക്ക് പ്രിയപ്പെട്ടവരുമായി കണക്റ്റ് ചെയ്യുന്നത് വാട്ട്‌സ്ആപ്പ് എളുപ്പമാക്കുന്നു. അതിനാൽ, അടുത്ത തവണ നിങ്ങൾ മങ്ങിയ വെളിച്ചമുള്ള മുറിയിൽ വീഡിയോ കോൾ ചെയ്യുമ്പോൾ, വ്യക്തവും കൂടുതൽ ഊർജസ്വലവുമായ വീഡിയോ കോളിംഗ് അനുഭവത്തിനായി ഈ ഹാൻഡി ഫീച്ചർ സജീവമാക്കാൻ മറക്കരുത്!