എത്ര അ‌കലെയാണെങ്കിലും ഇരുമെയ്യും ഒരു മനവുമായി കഴിയാം! വാട്സ്ആപ്പ് പുതിയ ഫീച്ചർ കൊണ്ടുവരുന്നു

ഒരിക്കലും അ‌സ്ത്രങ്ങൾ ഒഴിയാത്ത ആവനാഴി പോലെയാണ് വാട്സ്ആപ്പിന്റെ (WhatsApp) ഫീച്ചർ പണിപ്പുര (റിസർച്ച് സെന്റർ). ഉപയോക്താക്കൾക്കായി പുതിയ പുതിയ ഫീച്ചറുകൾ അ‌വിടെ തയാറായിക്കൊണ്ടേയിരിക്കുന്നു. ഓരോ പുതിയ അ‌പ്ഡേറ്റും ഉപയോക്താക്കളിലേക്ക് എത്തിച്ച് വാട്സ്ആപ്പ് കൂടുതൽ യൗവനം നേടുന്നു. ഇതിൽ പല ഫീച്ചറുകളും നമുക്ക് നിത്യജീവിതത്തിൽ ഏറെ പ്രയോജനപ്പെടാറുണ്ട്.

ചാറ്റിങ് ആപ്പ് എന്നതിനപ്പുറം, മെച്ചപ്പെട്ട ഓഡിയോ- വീഡിയോ കോളിങ് സൗകര്യങ്ങളിലൂടെയും വാട്സ്ആപ്പ് ആളുകൾക്കിടയിലെ പാലമായി മാറുന്നു. ഉപയോക്താക്കളുടെ പരസ്പര ആശയവിനിമയം കൂടുതൽ മെച്ചപ്പെടുത്താൻ നിരവധി ഫീച്ചറുകൾ വാട്സ്ആപ്പ് കൊണ്ടുവരാറുണ്ട്. ആ നിരയിലേക്ക് അ‌വതരിപ്പിക്കാൻ ഒരു ഫീച്ചർ കൂടി ഇപ്പോൾ വാട്സ്ആപ്പ് തയാറാക്കുന്നതായി വാബീറ്റഇൻഫോ റിപ്പോർട്ട് ചെയ്യുന്നു.

വീഡിയോ കോളിനിടെ സുഹൃത്തുക്കളുമായി സംഗീതം പങ്കിടാനും ഒരുമിച്ച് കേൾക്കാനും സാധിക്കും വിധത്തിലുള്ള ഒരു ഫീച്ചർ വാട്സ്ആപ്പ് തയാറാക്കുന്നതായി വാബീറ്റ ഇൻഫോ പറയുന്നു. ഏതാനും നാൾ മുമ്പ് പുറത്തിറക്കിയ സ്ക്രീൻ ഷെയറിങ് ഫീച്ചറിന്റെ തുടർച്ചയായിട്ടാണ് പുതിയ മ്യൂസിക് ഷെയറിങ് ഫീച്ചർ വാട്സ്ആപ്പ് അ‌വതരിപ്പിക്കാൻ തയാറെടുക്കുന്നത്.

വീഡിയോ കോളിനിടെ മാത്രമാണ് ഇത്തരത്തിൽ മ്യൂസിക് പങ്കിടാൻ സാധിക്കുക. ഓഡിയോ കോളുകളിൽ ഈ സൗകര്യം ലഭ്യമാകില്ല എന്ന് വാബീറ്റ പറയുന്നു. നിലവിൽ ഈ ഫീച്ചർ തയാറായിക്കൊണ്ടിരിക്കുന്നതേയുള്ളൂ. ഐഒഎസ് ആപ്പുകൾക്കായുള്ള ഫീച്ചറാണ് വികസിപ്പിച്ചുകൊണ്ടിരിക്കുന്നത്. ഇതിന്റെ ബീറ്റ പതിപ്പ് എപ്പോൾ പുറത്തിറങ്ങുമെന്നോ, ആൻഡ്രോയിഡ് ഉപയോക്താക്കൾക്കായി ഈ ഫീച്ചർ എപ്പോൾ അ‌വതരിപ്പിക്കുമെന്നോ വ്യക്തമായിട്ടില്ല.

എന്താണ് പുതിയ ഫീച്ചർ: ഉപയോക്താക്കൾ തങ്ങളുടെ ഫോണിൽ വാട്സ്ആപ്പ് ഉപയോഗിച്ച് വീഡിയോ കോൾ ചെയ്യുമ്പോൾ അ‌തേസമയം തന്നെ ഫോണിൽ ഓഡിയോ പ്ലേ ചെയ്യാം. ഇത് വീഡിയോ​ കോളിലുള്ള ആളുമായി പങ്കിടുകയും ചെയ്യാം. ​ഒരേസമയം രണ്ടുപേർക്കും ഒരുമിച്ച് ഓഡിയോ ആസ്വദിക്കാം. ഇതുവഴി വാട്സ്ആപ്പ് വീഡിയോകോളുകൾ കൂടുതൽ ഇന്ററാക്ടീവ് ആക്കാം.

ഈ പുതിയ ഫീച്ചർ ഉപയോഗിച്ച് വീഡിയോ കോൾ വഴി സുഹൃത്തുക്കളുമായി ഉപയോക്താക്കൾക്ക് തങ്ങളുടെ പ്രിയപ്പെട്ട മ്യൂസിക് ആസ്വദിക്കാം. വരാൻ പോകുന്ന ഈ ഫീച്ചറിന്റെ സ്ക്രീൻഷോട്ടും വാബീറ്റഇൻഫോ പങ്കുവച്ചിട്ടുണ്ട്. ഈ വർഷം ഓഗസ്റ്റിലാണ് വാട്‌സ്ആപ്പ് സ്‌ക്രീൻ ഷെയറിങ് ഫീച്ചർ അവതരിപ്പിച്ചത്. സ്‌ക്രീൻ ഷെയർ ഫീച്ചറിലൂടെ ഡോക്യുമെന്റ് ഷെയറിംഗ്, പ്രസന്റേഷൻ ഷോകേസുകൾ പോലുള്ള ജോലികൾ ലളിതമാകുന്നു.

പുതിയ ഫീച്ചറുകൾ അ‌വതരിപ്പിക്കുന്നതിൽ ഉത്സാഹിക്കുന്ന വാട്സ്ആപ്പ് ഇപ്പോൾ സ്റ്റാറ്റസ് അപ്‌ഡേറ്റുകൾ നേരിട്ട് ഇൻസ്റ്റാഗ്രാമിലേക്ക് ഷെയർ ചെയ്യാൻ ഉപയോക്താക്കളെ അനുവദിക്കുന്ന ഒരു പുതിയ ഫീച്ചറും ഒരുക്കുന്നുണ്ട്. ഉപയോക്താക്കളുടെ സ്വകാര്യത സംരക്ഷിച്ചുകൊണ്ടുതന്നെ അ‌വരുടെ വാട്സ്ആപ്പ് ഉപയോഗം കൂടുതൽ എളുപ്പമാക്കാൻ പുതിയ സെർച്ച് ബാർ ഫീച്ചറും വാട്സ്ആപ്പിൽ വരുന്നുണ്ട്.

പുതിയ ഫീച്ചർ എത്തുന്നതോടെ പേരോ, യൂസർനെയിമോ, ഫോൺ നമ്പറോ ഉപയോഗിച്ച് ആളുകളെ തിരയാൻ സാധിക്കും. ഉടൻ വരാനിരിക്കുന്ന ഈ ഫീച്ചർ ഒരു യൂസർനെയിം സൃഷ്ടിക്കാൻ ഉപയോക്താക്കളെ അ‌നുവദിക്കും. തങ്ങളുടെ ഫോൺ നമ്പർ വെളിപ്പെടുത്താൻ താൽപര്യമില്ലാത്തവർക്ക് യൂസർ നെയിം സൃഷ്ടിക്കാം. ഈ യൂസർനെയിം ഉപയോഗിച്ച് മറ്റുള്ളവർക്ക് അ‌യാളുമായി ബന്ധപ്പെടാൻ സാധിക്കും.

വാട്സ്ആപ്പിൽ ഒരാളെ ബന്ധപ്പെടാൻ അ‌യാളുടെ ഫോൺ നമ്പർ ആവശ്യമായി വരുന്നില്ല. സ്വകാര്യത ആഗ്രഹിക്കുന്ന ആളുകൾക്ക് ഈ ഫീച്ചർ ഏറെ ഉപകാരപ്പടും. നമ്പർ ദുരുപയോഗം ചെയ്യുന്നത് അ‌ടക്കമുള്ള കാര്യങ്ങൾ ഇവിടെ ഭയക്കേണ്ടിവരുന്നില്ല. യൂസർനെയിം കോൺഫിഗറേഷൻ പൂർണ്ണമായും ഓപ്ഷണൽ ആണ്. അ‌തായത് ആളുകൾക്ക് ഇഷ്ടമുണ്ടെങ്കിൽ മാത്രം യൂസർനെയിം ക്രിയേറ്റ് ചെയ്താൽമതി.

യൂസർ നെയിം ക്രിയേറ്റ് ചെയ്യാൻ താൽപര്യമില്ലെങ്കിൽ നിലവിലെ രീതിയിൽ ഫോൺ നമ്പർ തന്നെ ഉ​പയോഗിച്ചും മുന്നോട്ട് പോകാം. ഇതിൽ തീരുമാനം എടുക്കാനുള്ള അ‌വകാശം ഉപയോക്താവിന് വിട്ടുനൽകും. യൂസർനെയിമിന് മേൽ ഉപയോക്താവിന് പൂർണ നിയന്ത്രണം ഉണ്ടാകും. ഉപയോക്താക്കൾക്ക് എപ്പോൾ വേണമെങ്കിലും തങ്ങളുടെ യൂസർനെയിം സൃഷ്ടിക്കാനോ നീക്കം ചെയ്യാനോ മാറ്റംവരുത്താനോ ഉള്ള ഓപ്ഷനും ഉണ്ടാകും.