ബയോ ട്രാക്കിംഗ് പി‌പി‌ജി സെൻസറുള്ള അമാസ്ഫിറ്റ് ടി-റെക്സ് പ്രോ അവതരിപ്പിച്ചു: വില, സവിശേഷതകൾ

അമാസ്ഫിറ്റ് ടി-റെക്സ് പ്രോ: വിലയും, ലഭ്യതയും

ഇന്ത്യയിൽ അമാസ്ഫിറ്റ് ടി-റെക്സ് പ്രോയുടെ വിലയും ലഭ്യതയും കമ്പനി ഇതുവരെ വ്യക്തമാക്കിയിട്ടില്ല. ആമസോൺ ഇന്ത്യ, അമാസ്ഫിറ്റ് ഓൺലൈൻ സ്റ്റോർ പേജിൽ നിലവിൽ ലോഞ്ച് തീയതിയെക്കുറിച്ച് കൂടുതൽ വിവരങ്ങളില്ലാത്തതിനാൽ ‘നോട്ടിഫൈ മി' എന്ന ഓപ്ഷൻ നൽകിയിട്ടുണ്ട്. രാജ്യത്ത് അമാസ്ഫിറ്റ് ടി-റെക്സ് പ്രോയുടെ ലഭ്യതയെക്കുറിച്ചുള്ള കൂടുതൽ വിവരങ്ങൾക്ക് ഇനിയും ലഭിക്കാനുണ്ട്. ഡെസേർട്ട് ഗ്രേ, മെറ്റോറൈറ്റ് ബ്ലാക്ക്, സ്റ്റീൽ ബ്ലൂ നിറങ്ങളിൽ ഈ സ്മാർട്ട് വാച്ച് വിപണിയിൽ ലഭ്യമാകും. യുഎസ്, യൂറോപ്യൻ വിപണികളിൽ അമാസ്ഫിറ്റ് ടി-റെക്സ് പ്രോ അവതരിപ്പിച്ചു. ആമസോൺ യുഎസിൽ ഇത് 179.99 ഡോളർ (ഏകദേശം 13,000 രൂപ) വിലയ്ക്ക് പട്ടികപ്പെടുത്തിയിട്ടുണ്ട്.

അമാസ്ഫിറ്റ് ടി-റെക്സ് പ്രോ സവിശേഷതകൾ

360x360 പിക്‌സൽ റെസല്യൂഷനോടുകൂടിയ 1.3 ഇഞ്ച് എച്ച്ഡി അമോലെഡ് എല്ലായ്‌പ്പോഴും ഓൺ ഡിസ്‌പ്ലേയാണ് അമാസ്ഫിറ്റ് ടി-റെക്‌സ് പ്രോയ്ക്ക് ലഭിക്കുന്നത്. ഇതിന് പോളികാർബണേറ്റ് ഡയലും സിലിക്കൺ റബ്ബർ സ്ട്രാപ്പുകളും ഉണ്ട്. സ്മാർട്ട് വാച്ച് 10ATM വാട്ടർ റെസിസ്റ്റന്റ് ആണ്, ഇത് അമാസ്ഫിറ്റ് ടി-റെക്സിൽ കാണപ്പെടുന്ന 5ATM വാട്ടർ റെസിസ്റ്റൻസിൽ നിന്നുള്ള അപ്‌ഗ്രേഡാണ്. മെച്ചപ്പെട്ട ഹെൽത്ത് ട്രാക്കിംഗ്, ഹാർട്ട് റേറ്റ് ട്രാക്കിംഗ്, സ്ലീപ്പ് മോണിറ്ററിംഗ്, ത്രീ-ആക്സിസ് ആക്സിലറേഷൻ സെൻസർ, ത്രീ-ആക്സിസ് ഗൈറോസ്കോപ്പ് സെൻസർ, ജിയോ മാഗ്നറ്റിക് സെൻസർ, ആംബിയന്റ് ലൈറ്റ് സെൻസർ, ബാരാമെട്രിക് ആൽറ്റിമീറ്റർ എന്നിവയ്ക്കായി ബയോട്രാക്കർ 2 പിപിജി ബയോ ട്രാക്കിംഗ് ഒപ്റ്റിക്കൽ സെൻസർ പ്രോ വേരിയന്റിലുണ്ട്. കണക്റ്റിവിറ്റിക്കായി ബ്ലൂടൂത്ത് 5.0 വരുന്ന ജിപിഎസും ഇതിലുണ്ട്.

മാഗ്നെറ്റിക് പോഗോ പിൻ അഡാപ്റ്റർ ഉപയോഗിച്ച് 1.5 മണിക്കൂറിനുള്ളിൽ പൂർണ്ണമായും ചാർജ് ചെയ്യുവാൻ സാധിക്കുന്ന 390 എംഎഎച്ച് ബാറ്ററിയാണ് അമാസ്ഫിറ്റ് ടി-റെക്സ് പ്രോ സ്മാർട്ട് വാച്ചിൽ ഉൾപ്പെടുത്തിയിരിക്കുന്നത്. സാധാരണ ഉപയോഗത്തോടെ സ്മാർട്ട് വാച്ചിന് 18 ദിവസം വരെയും, കൂടുതൽ ഉപയോഗത്തോടെ ഒമ്പത് ദിവസം വരെയും, തുടർച്ചയായ ജിപിഎസ് ഉപയോഗത്തിൽ 40 മണിക്കൂർ വരെയും നിലനിൽക്കുമെന്ന് അമാസ്ഫിറ്റ് അവകാശപ്പെടുന്നു. ഓട്ടം, സൈക്ലിംഗ്, നീന്തൽ, ഔട്ട്‌ഡോർ, ഇൻഡോർ സ്‌പോർട്‌സ്, ഡാൻസ്, ബോൾ സ്‌പോർട്‌സ് തുടങ്ങി നിരവധി സ്‌പോർട്‌സ് മോഡുകൾക്കായി സ്മാർട്ട് വാച്ച് സജ്ജമാണ്. അമാസ്ഫിറ്റ് ടി-റെക്സ് പ്രോ 47.7x47.7x13.5 മില്ലിമീറ്റർ അളവിൽ 59.4 ഗ്രാം ഭാരമാണ് വരുന്നത്.