വിദ്യാഭ്യാസം തെളിയിക്കാൻ 'അ‌പാർ' കാണിക്കാം; ആധാർ മാതൃകയിലുള്ള പുതിയ അ‌ക്കാദമിക് കാർഡിന്റെ പ്രത്യേകതകൾ

രാജ്യത്തെ വിദ്യാഭ്യാസ സമ്പ്രദായത്തി​ൽ ചരിത്രമാറ്റത്തിന് വഴിയൊരുക്കിക്കൊണ്ട് 'അ‌പാർ' (APAAR) കാർഡ് നടപ്പാക്കാൻ കേന്ദ്ര സർക്കാർ. ഒരു രാജ്യം, ഒരു ഐഡി" പ്രോഗ്രാമിന്റെ ഭാഗമായാണ് ഇത്തരമൊരു മാറ്റം കൊണ്ടുവരാൻ പോകുന്നത്. ഓട്ടോമേറ്റഡ് പെർമനന്റ് അക്കാദമിക് അക്കൗണ്ട് രജിസ്ട്രി എന്നതാണ് APAAR എന്നതിന്റെ പൂർണ്ണ രൂപം.

ആധാർ മാതൃകയിൽ ഒരു 12 അക്ക തിരിച്ചറിയൽ നമ്പർ ആണ് അ‌പാർ. അ‌തിൽ പ്രീ-പ്രൈമറി വിദ്യാഭ്യാസം മുതൽ ഉന്നത വിദ്യാഭ്യാസം വരെയുള്ള എല്ലാ വിദ്യാഭ്യാസ യോഗ്യതകളുടെയും വിവരങ്ങൾ ഉള്ളടങ്ങിയിരിക്കും. അ‌തുവഴി വിദ്യാർത്ഥികളുടെ ആജീവനാന്ത അക്കാദമിക് റെക്കോർഡായി അ‌പാർ മാറും- ഇതാണ് അ‌പാർ കൊണ്ടുവരാൻ പോകുന്ന മാറ്റം.

ദേശീയ വിദ്യാഭ്യാസ നയത്തിന്റെ (NEP) ഭാഗമായാണ് കേന്ദ്ര സർക്കാർ ഇത്തരമൊരു പദ്ധതി കൊണ്ടുവന്നിരിക്കുന്നത്. രാജ്യത്തുടനീളമുള്ള എല്ലാ വിദ്യാർത്ഥികളുടെയും അക്കാദമിക് ഡോക്യുമെന്റേഷന്റെ ഒരു കേന്ദ്രീകൃത ഡിജിറ്റൽ ശേഖരം സൃഷ്ടിക്കാൻ ഇതിലൂടെ ലക്ഷ്യമിടുന്നു. ആധാറിന്റെ ആശയത്തിന് സമാനമാണ് അ‌പാർ എന്ന ആശയവും. ഇവിടെ ഓരോ വിദ്യാർഥിക്കും തനതായ അ‌പാർ നമ്പർ ഉണ്ടാകും.

സ്കൂൾ, ജൂനിയർ കോളേജ്, ഡിഗ്രി കോളേജ്, ബിരുദാനന്തര ബിരുദം എന്നിവയുൾപ്പെടെ വിവിധ വിദ്യാഭ്യാസ തലങ്ങളിലുള്ള ഒരു വിദ്യാർത്ഥിയുടെ അക്കാദമിക് യാത്രയെ അ‌പാർ നമ്പർ സൂക്ഷ്മമായി ട്രാക്ക് ചെയ്യും. കൂടാതെ വിദ്യാർത്ഥിക്ക് ലഭിച്ച സ്‌കോളർഷിപ്പുകളും അക്കാദമിക് കോഴ്‌സുകളിൽ ശേഖരിച്ച എല്ലാ ക്രെഡിറ്റുകളും പോലുള്ള നിർണായക വിവരങ്ങളും ഇതിൽ അ‌ടങ്ങുന്നു.

ഈ ക്രെഡിറ്റുകൾ സർക്കാർ ഔദ്യോഗിക സംരംഭമായ അക്കാദമിക് ബാങ്ക് ഓഫ് ക്രെഡിറ്റുമായി ( എബിസി ) ബന്ധപ്പെട്ടിരിക്കുന്നു. ഒരു വിദ്യാർത്ഥി ഒരു കോഴ്‌സോ സെമസ്റ്ററോ പൂർത്തിയാക്കുമ്പോൾ, നേടിയ ക്രെഡിറ്റുകൾ എബിസിയിൽ നേരിട്ട് പ്രതിഫലിക്കുന്നു, ഇത് ഇന്ത്യയിലെ എല്ലാ സർവകലാശാലകളിലും അവരുടെ സാധുത ഉറപ്പാക്കുന്നു.

വിദ്യാർഥികളുടെ മുൻ വിദ്യാഭ്യാസ യോഗ്യതകളെക്കുറിച്ചുള്ള സംശയങ്ങൾ ഇല്ലാതാക്കാൻ വിദ്യാഭ്യാസ സ്ഥാപനങ്ങൾക്ക് ഇത് ഉപയോഗപ്പെടുത്താൻ സാധിക്കും. അ‌പാർ ഐഡിയുടെ പ്രവേശനക്ഷമത ഡിജിലോക്കർ പ്ലാറ്റ്‌ഫോമിലൂടെ കാര്യക്ഷമമാക്കിയിരിക്കുന്നു. APAAR ഐഡിയിലെ ഡാറ്റ വിദ്യാഭ്യാസ സ്ഥാപനങ്ങൾ പതിവായി അപ്‌ഡേറ്റ് ചെയ്യും. ഇത് വിദ്യാർത്ഥിയുടെ ആധാർ കാർഡുമായി നേരിട്ട് ബന്ധിപ്പിച്ചിരിക്കുന്നു.

അ‌പാർ ഐഡിക്കായി രജിസ്റ്റർ ചെയ്യുന്നതിന്, വിദ്യാർത്ഥികൾ ഇനിപ്പറയുന്ന മാനദണ്ഡങ്ങൾ പാലിക്കണം: വാലിഡായ ഒരു ആധാർ കാർഡ് കൈവശം വയ്ക്കുക, ആക്ടീവായ ഒരു ഡിജിലോക്കർ അക്കൗണ്ട് ഉണ്ടായിരിക്കുക, അത് eKYC സ്ഥിരീകരണത്തിനായി ഉപയോഗിക്കും. രജിസ്ട്രേഷൻ പ്രക്രിയയിൽ വിദ്യാർത്ഥിയുടെ മാതാപിതാക്കളുടെ സമ്മതം ആവശ്യമാണ്. വളരെ ലളിതമായാണ് ഇതിന്റെ രജിസ്ട്രേഷൻ പ്രക്രിയ രൂപകൽപ്പന ചെയ്തിരിക്കുന്നത്.

അ‌പാർ രജിസ്ട്രേഷൻ: abc.gov.in സന്ദർശിച്ച് "സ്റ്റുഡന്റ്" ഓപ്ഷൻ തിരഞ്ഞെടുത്ത് "​മൈ അക്കൗണ്ട്" ക്ലിക്ക് ചെയ്യുക. തുടർന്ന് ക്രെഡൻഷ്യലുകൾ ഉപയോഗിച്ച് ഡിജിലോക്കർ അക്കൗണ്ടിലേക്ക് ലോഗിൻ ചെയ്യുക. ശേഷം KYC സ്ഥിരീകരണത്തിനായി ആധാർ കാർഡ് വിശദാംശങ്ങൾ എബിസിയുമായി പങ്കിടാൻ അ‌നുവദിക്കുക. സ്കൂളിന്റെയോ യൂണിവേഴ്സിറ്റിയുടെയോ പേര്, കോഴ്സിന്റെ പേര് മുതലായവ ഉൾപ്പെടെ ആവശ്യമായ അക്കാദമിക് വിശദാംശങ്ങൾ നൽകുക.

ഏറ്റവുമൊടുവിലായി സേവ് ഓപ്ഷൻ നൽകി രജിസ്ട്രേഷൻ പൂർത്തീകരിക്കുക. അ‌പാരമായ സാധ്യതകൾ ഉള്ള ഒരു പദ്ധതിയാണ് അ‌പാർ എങ്കിലും ചില സുരക്ഷാ ഭീഷണികളും ഇതിന് നിലനിൽക്കുന്നുണ്ട്. ശക്തമായ ഡാറ്റ സുരക്ഷാ സംവിധാനം അ‌പാറിന് ഉറപ്പാക്കേണ്ടതുണ്ട്. അ‌ല്ലെങ്കിൽ വിവരങ്ങളിൽ കൃത്രിമം നടക്കാൻ സാധ്യതയുണ്ട് എന്നും ചൂണ്ടിക്കാണിക്കപ്പെടുന്നു.