നിങ്ങളുടെ TWS ഇയർബഡ്സിൽ ഉണ്ടാകാൻ ഇടയുള്ള 5 തകരാറുകളും അ‌വ പരിഹരിക്കാനുള്ള ടിപ്സും

ഒരു പാട്ട് കേൾക്കാനോ വീഡിയോ കാണാനോ അ‌ത്യാവശ്യമായി ഇയർബഡ്സ് എടുക്കുമ്പോൾ, ആദ്യം അ‌തിന്റെ കുരുക്കഴിച്ചെടുക്കേണ്ടി വന്ന അ‌നുഭവം നേരിട്ടിരുന്ന നിരവധി പേരുണ്ടാകാം. എന്നാൽ സ്മാർട്ട്ഫോണുകളിൽ മാറ്റങ്ങൾ വന്നതുപോലെ ഇയർഫോണുകളിലും മാറ്റങ്ങൾ വന്നു. വയേർഡ് ഇയർബഡുകൾ ബ്ലൂടൂത്ത് ഇയർബഡ്സുകളായും നെക്ക് ബാൻഡുകളായും ഇപ്പോൾ ടിഡബ്ലുഎസ്(TWS) ഇയർബഡ്സുകളായും മാറി.

ഇന്ന് ഏറെപ്പേരും ഉപയോഗിക്കാൻ ഇഷ്ടപ്പെടുന്നത് ട്രൂ വയർലെസ് സ്റ്റീരിയോ ഇയർബഡ്സുകളാണ് ( TWS Earbuds ). വയർലെസ് ഇയർഫോണുകളുടെ ഏറ്റവും ജനപ്രിയമായ രൂപമായി ടിഡബ്ലുഎസ് ഇയർബഡ്സുകൾ മാറിയിരിക്കുന്നു. പ്രമുഖ സ്മാർട്ട്ഫോൺ ബ്രാൻഡുക​ളെല്ലാം തന്നെ തങ്ങളുടെ സ്മാർട്ട്ഫോണുകൾക്കായി സ്വന്തം ഇയർബഡ്സ് ഇപ്പോൾ പുറത്തിറക്കുന്നു.

ഇത് കൂടാതെ പ്രമുഖരായ പല ബ്രാൻഡുകളും ടിഡബ്ലുഎസ് ഇയർബഡ്സ് വിപണിയിൽ ഇറക്കുന്നുണ്ട്. വെറും ഒരു ഇയർബഡ്സ് എന്നതിലുപരി നോയിസ് ക്യാൻസലേഷൻ, വിൻഡ് നോയിസ് അൽഗോരിതം, അൾട്രാ ലോ ലേറ്റൻസി ഗെയിം മോഡ് തുടങ്ങി ഒട്ടനവധി ഫീച്ചറുകളോടെയാണ് ഈ ടിഡബ്ലുഎസ് ഇയർബഡ്സുകൾ എത്തുന്നത്.

ഉപയോഗിക്കാൻ ഏറെ സുഖവും എളുപ്പവുമാണെങ്കിലും ഈ ഇയർബഡ്സുകൾക്കും ചില പ്രശ്നങ്ങൾ ഉണ്ടാകാറുണ്ട്. ചില തകരാറുകൾ പഴക്കംകൊണ്ട് ഉണ്ടാകുന്നതായിരിക്കാം. എന്നാൽ മറ്റ് ചിലത് ചെറിയ ചില സാങ്കേതിക തകരാറുകൾ കൊണ്ട് ഉണ്ടാകുന്നതാകാം. ഇതിൽ ചിലത് നമുക്ക് തന്നെ പരിഹരിക്കാൻ കഴിയുന്നവയാണ്. ടിഡബ്ലുഎസ് ഇയർബഡ്സുകളിൽ സാധാരണയായി കാണുന്ന ചില പ്രശ്നങ്ങളും അ‌വയ്ക്കുള്ള പരിഹാരവും പരിചയപ്പെടാം.

പെയർ ചെയ്യാൻ കഴിയാതിരിക്കുക: ഇയർബഡ്സും സ്മാർട്ട്ഫോണും തമ്മിൽ കണക്ടാകാതിരിക്കുക (പെയർ ആക്കാൻ കഴിയാതിരിക്കുക) എന്നത് പലപ്പോഴും കാണപ്പെടുന്നൊരു പ്രശ്നമാണ്. ഇങ്ങനെ പെയർ ആകാതിരിക്കുന്നതിന് പല കാരണങ്ങൾ ഉണ്ടാകാം. മിക്ക ഫോണുകൾക്കും വയർലെസ് ഇയർഫോണുകൾക്കും ഒരേസമയം ഒരു ഉപകരണത്തിലേക്ക് മാത്രമേ കണക്‌റ്റ് ചെയ്യാനാകൂ. അ‌തിനാൽ, ഫോണും ഇയർബഡുകളും മറ്റൊരു ഡി​വൈസുമായി ജോടിയാക്കിയിട്ടില്ലെന്ന് ഉറപ്പാക്കുകയാണ് ആദ്യം ചെയ്യേണ്ടത്.

കൂടാതെ നിങ്ങളുടെ ഫോണിലെ ബ്ലൂടൂത്ത് ഓൺ ആണെന്നും ഉറപ്പാക്കുക. ഇവയാണ് ഈ പ്രശ്നത്തിനുള്ള ഏറ്റവും മികച്ച പ്രശ്നപരിഹാരമാർഗം. ചില സ്‌മാർട്ട്‌ഫോണുകൾ വൈദ്യുതി ഉപഭോഗം കുറയ്ക്കുന്നതിന് ഉപയോഗത്തിലില്ലാത്തപ്പോൾ ബ്ലൂടൂത്ത് പെയറിങ് മോഡ് ഓട്ടോമാറ്റിക്കായി ഡിസേബിൾ ചെയ്യാറുണ്ട്. ഒരു പുതിയ ഉപകരണവുമായി ജോടിയാക്കാൻ ബ്ലൂടൂത്ത് വീണ്ടും പ്രവർത്തനക്ഷമമാക്കേണ്ടതുണ്ട്.

ഇയർബഡുകൾ മറ്റൊരു സ്മാർട്ട്‌ഫോണുമായി ജോടിയാക്കുകയും അൺപെയർ ചെയ്യുകയും ചെയ്യുക എന്നതാണ് ഈ പ്രശ്നം പരിഹരിക്കാനുള്ള മറ്റൊരു മാർഗം. ഒരു സെക്കൻഡറി സ്‌മാർട്ട്‌ഫോണിലും ബഡ്‌സ് ജോടിയാക്കാൻ കഴിയുന്നില്ലെങ്കിൽ, ഇയർബഡിൽ പ്രശ്‌നം ഉണ്ടാവാം. നിങ്ങളുടെ ഫോണിന് അനുയോജ്യമല്ലാത്ത ബ്ലൂടൂത്ത് വേർഷൻ മുതൽ ഓപ്പറേറ്റിംഗ് സിസ്റ്റത്തിലെ പ്രശ്‌നങ്ങൾ വരെയുള്ള കാരണങ്ങൾകൊണ്ടും ഇത്തരം പ്രശ്നങ്ങൾ ഉണ്ടാകാം.

ഓഡിയോ മുറിഞ്ഞ് കേൾക്കുക: ബ്ലൂടൂത്ത് കണക്ഷന് പരിമിതമായ റേഞ്ചും ബാൻഡ്‌വിഡ്ത്തും ആണ് ഉള്ളത്. ഇയർബഡ്സ് വച്ചിരിക്കുമ്പോൾ ശബ്ദം ഇടയ്ക്കിടയ്ക്ക് മുറിഞ്ഞ് കേൾക്കുന്നുണ്ട് എങ്കിൽ ബഡ്സും ഫോണും തമ്മിൽ ആവശ്യത്തിന് അ‌ടുപ്പമുണ്ടെന്ന് ഉറപ്പുവരുത്തണം. മിക്ക ഇയർബഡുകൾക്കും (TWS) ഏകദേശം 10 മീറ്റർ പരിധി ഉണ്ടായിരിക്കും, അതിനാൽ ഫോണും ഇയർബഡുകളും ആ പരിധിക്കുള്ളിൽ തന്നെയാണെന്ന് ഉറപ്പാക്കുക.

ഇയർബഡുകൾ ചാർജ് ചെയ്യാനാകാതിരിക്കുക: രണ്ട് വർഷത്തിലധികം പഴക്കമുള്ള ഇയർബഡ്സുകളിൽ തേയ്മാനം മൂലം ചില പ്രശ്നങ്ങൾ ഉണ്ടാകുക സ്വാഭാവികമാണ്. ചാർജാകാതിരിക്കുക എന്നതും അ‌ത്തരം ​ഒരു പ്രശ്നമാണ്. പോർട്ടിന്റെ പ്രശ്നം മൂലം ചാർജ് ചെയ്യാൻ കഴിയുന്നില്ലെങ്കിൽ Qi- സർട്ടി​ഫൈഡ് ചാർജർ ഉപയോഗിക്കാം. കൂടാതെ ചാർജിങ് പോർട്ടിൽ തടസങ്ങളൊന്നുമില്ലെന്നും ചാർജിങ് പിൻ പോർട്ടുമായി ശരിയായി കണക്ട് ചെയ്തിട്ടുണ്ടെന്നും ഉറപ്പാക്കണം.

ഒരു ബഡിൽ മാത്രം ഓഡിയോ കേൾക്കുക: ബജറ്റ് വിലയിലുള്ള ടിഡബ്ലുഎസ് ഇയർബഡുകളിലാണ് സാധാരണയായി ഈ പ്രശ്നം കണ്ടുവരുന്നത്. ഒരു ഇയർബഡ് ഫോണുമായി കണക്ടാകുകയും മറ്റേ ഇയർബഡിലേക്കുള്ള പാലമായി പ്രവർത്തിക്കുകയും ചെയ്യുന്നു. മറ്റേ ഇയർബഡിലേക്ക് കണക്ടാകാൻ കഴിയാതെ വരുമ്പോഴാണ് ഒരു ഇയർബഡിൽ മാത്രമായി സൗണ്ട് കേൾക്കുന്നത്.

ഇയർബഡ് അൺപെയർ ചെയ്യുന്നതിലൂടെ ഈ പ്രശ്‌നം പരിഹരിക്കാനാകും. ഇയർബഡ് അൺപെയർ ചെയ്യാനും സ്‌മാർട്ട്‌ഫോൺ വീണ്ടും പെയർ ചെയ്യാനും ടിഡബ്ലുഎസ് മാനുവലിലെ നിർദ്ദേശങ്ങൾ പാലിക്കുക. കേസിൽ നിന്ന് രണ്ട് ഇയർബഡുകളും പുറത്തെടുത്ത് ഒരേ സമയം തിരികെ വയ്ക്കുക അല്ലെങ്കിൽ ചാർജിംഗ് ഭാഗത്തെ ബട്ടൺ ദീർഘനേരം അമർത്തുക.

ബാറ്ററി ചാർജ് പെട്ടെന്ന് തീരുക: വിചാരിക്കുന്നതിലും വേഗത്തിൽ പലപ്പോഴും ഇയർബഡുകളുടെ ചാർജ് തീരാറുണ്ട്. ഇയർബഡിന് ഏറെ പഴക്കമുള്ളതാണ് എങ്കിൽ അ‌ത് സ്വാഭാവികമാണ്, പ്രത്യേകിച്ചൊന്നും ചെയ്യാനില്ല. എന്നാൽ താരതമ്യേന പുതിയ ഇയർബഡിലാണ് ഇത്തരം ബാറ്ററി തീരൽ പ്രശ്നങ്ങൾ നേരിടുന്നത് എങ്കിൽ ചില കാര്യങ്ങൾ ചെയ്ത് നോക്കാവുന്നതാണ്.

ആക്ടീവ് നോയ്സ് ക്യാൻസലേഷൻ ഡിസേബിൾ ആക്കുക എന്നതാണ് ബാറ്ററി ചാർജ് ദീർഘനേരം നിലനിർത്താനുള്ള ഒരു ഓപ്ഷൻ. ഇതിലൂടെ ബാറ്ററി ലൈഫിൽ കാര്യമായ പുരോഗതി ഉണ്ടായേക്കാം. ഗെയിമിംഗ് മോഡ് പോലുള്ള പ്രത്യേക മോഡുകൾ ഉണ്ടെങ്കിൽ, അവയും ഡിസേബിൾ ചെയ്യാൻ ശ്രമിക്കുക. നോർമൽ മോഡിനെ അ‌പേക്ഷിച്ച് ഇവയും ധാരാളം ബാറ്ററി ഉപയോഗിക്കാറുണ്ട്.