വാട്സ്ആപ്പ് മെസേജുകൾ സേവ് ചെയ്യുന്നത് എങ്ങനെ?

ഒരു മെസേജ് സേവ് ചെയ്യുന്നത് എങ്ങനെ എന്ന് നോക്കാം. ആദ്യം വാട്സ്ആപ്പ് ചാറ്റ് തുറക്കുക. ചാറ്റിലെ ഏത് മെസേജ് ആണോ സേവ് ചെയ്യേണ്ടത്, അതിൽ ലോങ് പ്രസ് ചെയ്യുക. ഇങ്ങനെ ദീർഘനേരം അമർത്തിപ്പിടിച്ചാൽ സ്ക്രീനിന്റെ മുകളിലായി ഒരു നക്ഷത്ര ചിഹ്നം കാണാൻ കഴിയും. ഈ സ്റ്റാർ ചിഹ്നത്തിൽ ടാപ്പ് ചെയ്യുക. ശേഷം നിങ്ങൾക്ക് സേവ് ചെയ്യേണ്ട സന്ദേശത്തിലും ഒരു സ്റ്റാർ ചിഹ്നം പ്രത്യക്ഷപ്പെടും. നിങ്ങളുടെ മെസേജ് സ്റ്റാർഡ് അല്ലെങ്കിൽ സേവ് ആയി എന്നാണ് ഇതിന് അർഥം.

സ്റ്റാർഡ് മെസേജസ് എങ്ങനെ ആക്സസ് ചെയ്യാം?

• നിങ്ങളുടെ വാട്സ്ആപ്പ് ഹോം പേജിന്റെ മുകളിൽ വലത് കോണിലുള്ള മൂന്ന് ഡോട്ടുകളിൽ ക്ലിക്ക് ചെയ്യുക.
• സ്റ്റാർഡ് മെസേജുകളിലേക്ക് പോകുക.
• സേവ് ചെയ്ത സന്ദേശത്തിന് മുകളിൽ അയച്ചയാളുടെയും സ്വീകർത്താവിന്റെയും പേരും കാണാൻ കഴിയും. മെസേജ് അയച്ച തീയതിയും മെസേജിനൊപ്പം കാണാനാകും.
• ഈ മെസേജ് അയച്ചയാളുടെ ചാറ്റിൽ കാണാൻ അതിൽ ടാപ്പ് ചെയ്യുക.
• ഇങ്ങനെ ചെയ്ത് കഴിഞ്ഞാൽ ഏത് ദിവസമാണോ ആ മെസേജ് ചാറ്റ് ബോക്സിലെത്തിയത്, ആ പൊസിഷനിലേക്ക് വാട്സ്ആപ്പ് നാവിഗേറ്റ് ചെയ്യും.
• വ്യക്തിയുടെയോ ഗ്രൂപ്പിന്റെയോ പേരിൽ ക്ലിക്ക് ചെയ്തും സ്റ്റാർഡ് മെസേജസ് പരിശോധിക്കാവുന്നതാണ്.
• താഴേക്ക് സ്ലൈഡ് ചെയ്ത് സ്റ്റാർഡ് മെസേജസ് ഓപ്ഷനിലേക്ക് പോവുക.
• നക്ഷത്ര ചിഹ്നമിട്ട എല്ലാ സന്ദേശങ്ങളുടെയും ഒരു ലിസ്റ്റ് കാണാൻ കഴിയും.



ഒരു മെസേജിലെ സ്റ്റാർഡ് ചിഹ്നം നീക്കം ചെയ്യാനും വളരെ എളുപ്പം സാധിക്കും. ആദ്യം സ്റ്റാർഡ് മെസേജസ് ഓപ്ഷനിലേക്ക് പോകുക. ശേഷം ആ സന്ദേശത്തിൽ ലോങ് പ്രസ് ചെയ്യുക. സ്‌ക്രീനിന്റെ മുകൾ ഭാഗത്ത് സ്റ്റാർ ചിഹ്നം നീക്കം ചെയ്യാനുള്ള ഓപ്ഷൻ കാണാൻ കഴിയും. ഇതിൽ ടാപ്പ് ചെയ്താൽ മെസേജിലെ സ്റ്റാർ ചിഹ്നം ഇല്ലാതാകും. ഇങ്ങനെ ചെയ്ത് കഴിയുമ്പോൾ ആ സന്ദേശത്തിന് ഉണ്ടായിരുന്ന എല്ലാ സംരക്ഷണവും ഇല്ലാതാകും. അതിനാൽ സേവ് ചെയ്ത് സൂക്ഷിക്കേണ്ടതില്ലാത്ത മെസേജുകൾ മാത്രം ഇങ്ങനെ അൺസ്റ്റാർ ചെയ്യുക.



ഒരു ചാറ്റ് മുഴുവൻ സേവ് ചെയ്യുന്നത് എങ്ങനെ?

ആവശ്യമെങ്കിൽ ഒരു ചാറ്റ് ഹിസ്റ്ററി മുഴുവനായും സേവ് ചെയ്ത് സൂക്ഷിക്കാവുന്നതാണ്. ചാറ്റ് മറച്ചുപിടിക്കുന്ന ആർക്കൈവ് ഓപ്ഷൻ അല്ലാതെ വാട്സ്ആപ്പിൽ നേരിട്ട് ഇങ്ങനെ ഒരു ഓപ്ഷൻ ഇല്ല. പകരം മറ്റൊരു വഴി ഉപയോഗിച്ച് നമ്മുക്ക് ചാറ്റ് ഹിസ്റ്ററി സംരക്ഷിക്കാൻ കളിയും. ചാറ്റ് പൂർണമായും എക്സ്പോർട്ട് ചെയ്ത് മെയിൽ അയച്ചാണ് സൂക്ഷിക്കാൻ കഴിയുന്നത്. ഇത് എങ്ങനെയാണ് സാധ്യമാകുന്നത് എന്ന് അറിയാൻ താഴേക്ക് വായിക്കുക.


• ആദ്യം ആരുടെ ചാറ്റ് ആണോ ഇമെയിൽ ചെയ്യേണ്ടത്, ആ വ്യക്തിയുടെ ചാറ്റ് തുറക്കുക.
• മുകളിൽ വലത് കോണിൽ കാണുന്ന മൂന്ന് ഡോട്ടുകളിൽ ടാപ്പ് ചെയ്യുക.
• ശേഷം എക്സ്പോർട്ട് ചാറ്റിലേക്ക് പോകുക.
• ചാറ്റുകൾ ഇമെയിൽ, ബ്ലൂടൂത്ത്, മറ്റ് വിവിധ ആപ്പുകൾ എന്നിവ വഴി ചാറ്റുകൾ എക്‌സ്‌പോർട്ട് ചെയ്യാനാകും.
• ഇതിൽ നിന്നും ഇമെയിൽ ഓപ്ഷൻ തെരഞ്ഞെടുക്കുക.
• ശേഷം എക്സ്പോർട്ട് ഓപ്ഷനിൽ ടാപ്പ് ചെയ്യുക.
• ഇമെയിൽ അഡ്രസ് നൽകി മെയിൽ സെൻഡ് ചെയ്യുക.

ഇതോടെ ആ ചാറ്റും ചാറ്റ് ഹിസ്റ്ററിയും നൽകിയ മെയിൽ ഐഡിയിൽ ലഭ്യമാകും. അങ്ങനെ ചാറ്റ് മൊത്തത്തിൽ സേവ് ചെയ്യാനാകും.