ബുക്ക് ചെയ്ത ട്രെയിൻ ടിക്കറ്റുകളിൽ ഒരെണ്ണം മാത്രമായി ക്യാൻസൽ ചെയ്യണോ? അ‌തിനുള്ള വഴി ഇതാ

ദീർഘദൂര യാത്രകൾക്ക് നമ്മൾ കൂടുതലായും ആശ്രയിക്കുന്നത് ട്രെയിൻ സർവീസുകളെയാണ്. യാത്രയുടെ സൗകര്യാർഥം പരമാവധി നേരത്തെ നാം ടിക്കറ്റുകൾ ബുക്ക് ചെയ്യാറുമുണ്ട്. കുടുംബത്തോ​ടൊപ്പമോ സുഹൃത്തുക്കൾക്ക് ഒപ്പമോ ഒക്കെ യാത്ര ചെയ്യാനായി ചിലപ്പോൾ നാം മൂന്ന്, നാല് ടിക്കറ്റുകൾ ഒന്നിച്ച് ബുക്ക് ചെയ്യും. എന്നാൽ ഇതിന് ശേഷം അ‌വിചാരിതമായ കാരണങ്ങളാൽ ഇതിൽ ആർക്കെങ്കിലും യാത്ര മാറ്റിവയ്​ക്കേണ്ടി വന്നേക്കാം.

ബാക്കിയുള്ളവർക്ക് യാത്ര ചെയ്യുകയും വേണം. ഇങ്ങനെ ഉള്ള അ‌വസ്ഥ പലർക്കും പല ഘട്ടങ്ങളിലും വന്നിട്ടുണ്ടാകാം. യാത്ര മുടങ്ങിയ ആളുകളുടെ ടിക്കറ്റ് ക്യാൻസൽ ചെയ്യാനാണ് ഈ ഘട്ടത്തിൽ നാം ശ്രമിക്കുക. എന്നാൽ അ‌ത് എങ്ങനെയാണ്, ഒന്നോ രണ്ടോ ആളുകളുടെ ടിക്കറ്റുകൾ മാത്രമായി ക്യാൻസൽ ചെയ്യാൻ സാധിക്കുമോ തുടങ്ങി പല സംശയങ്ങളും ഈ ഘട്ടത്തിൽ ഉയരുകയും ചെയ്യും. എന്നാൽ ആശങ്ക വേണ്ട. എല്ലാം നമുക്ക് നിസാരമായി പരിഹരിക്കാൻ സാധിക്കുന്ന പ്രശ്നങ്ങൾ മാത്രമാണ്.

ഇന്ത്യൻ റെയിൽവേ കാറ്ററിങ് ആൻഡ് ടൂറിസം കോർപ്പറേഷൻ അ‌ഥവാ ഐആർസിടിസി ( IRCTC ) ആണ് ഇന്ത്യൻ റെയിൽവേ ടിക്കറ്റിന്റെ റദ്ദാക്കൽ നയം സംബന്ധിച്ച തീരുമാനങ്ങൾ കൈകൊള്ളുന്നത്. ടിക്കറ്റ് ബുക്ക് ചെയ്യാൻ ഐആർസിടിസിയെയാണ് നാം ആശ്രയിക്കുന്നത്. ടിക്കറ്റ് ക്യാൻസൽ ചെയ്യാനുള്ള സൗകര്യവും ഇവിടെത്തന്നെ ലഭ്യമാണ്. അ‌തിനായി ഐആർസിടിസി ഇ-ടിക്കറ്റിങ് വെബ്​സൈറ്റിൽ ലോഗിൻ ചെയ്ത് നിർദേശങ്ങൾ പ്രകാരം പ്രവർത്തിച്ചാൽ മതിയാകും.

എന്നാൽ ഉറപ്പായ ടിക്കറ്റ് ക്യാൻസൽ ചെയ്യാനുള്ള സൗകര്യം ചാർട്ട് തയാറാകുന്നതിന് മുമ്പ് വരെ മാത്രമാണ് ഐആർസിടിസിയുടെ വെബ്​സൈറ്റിൽ ലഭ്യമാകുക. ഇന്ത്യൻ റെയിൽവേയുടെ ടിക്കറ്റ് കൗണ്ടറിൽ നേരിട്ടെത്തി ഇ- ടിക്കറ്റുകൾ ക്യാൻസൽ ചെയ്യാൻ സാധിക്കില്ല എന്നുള്ള കാര്യവും പ്രത്യേകം ശ്രദ്ധി​ക്കേണ്ടതുണ്ട്. മുൻ കൂട്ടി ബുക്ക് ചെയ്ത ടിക്കറ്റുകളിൽ ഒന്ന് നിങ്ങൾക്ക് ക്യാൻസൽ ചെയ്യണമെങ്കിൽ എന്തൊക്കെ നടപടികളാണ് സ്വീകരിക്കേണ്ടത് എന്ന് ഘട്ടം ഘട്ടമായി നമുക്ക് നോക്കാം.

ഠ ഐആർസിടിസിയുടെ ഇ- ടിക്കറ്റിങ് (IRCTC e-Ticketing) വെബ്​സൈറ്റ് ഓപ്പൺ ചെയ്യുക. തുടർന്ന് ശരിയായ യൂസർ നെയിമും പാസ്വേഡും നൽകി ലോഗിൻ ചെയ്യുക.
ഠ തുടർന്ന് ഒരു ടിക്കറ്റ് മാത്രമാണ് ക്യാൻസൽ ചെയ്യേണ്ടത് എങ്കിൽ ​മൈ ട്രാൻസാക്ഷൻസ് എന്ന ഓപ്ഷനിൽ ക്ലിക്ക് ചെയ്യുക.

ഠ തുടർന്ന് ​മൈ അ‌ക്കൗണ്ട് മെനുവിന് താഴെയുള്ള '' ബുക്ക്ഡ് ടിക്കറ്റ് ഹിസ്റ്ററി '' എന്ന ലിങ്കിൽ ക്ലിക്ക് ചെയ്യുക.
ഠ ഇവിടെ നിങ്ങൾ ബുക്ക് ചെയ്തിരിക്കുന്ന ടിക്കറ്റുകളുടെ സെക്ഷൻ കാണാൻ സാധിക്കും. ഇപ്പോൾ ക്യാൻസൽ ചെയ്യേണ്ട ടിക്കറ്റ് സെലക്ട് ചെയ്തശേഷം ക്യാൻസൽ ടിക്കറ്റ് എന്നതിൽ ക്ലിക്ക് ചെയ്യുക.

ഠ ആരുടെ ടിക്കറ്റ് ആണോ റദ്ദാക്കേണ്ടത് അ‌വരുടെ ടിക്കറ്റ് മാത്രം സെലക്ട് ചെയ്താണ് ക്യാൻസൽ ഓപ്ഷൻ നൽകേണ്ടത്.
ഠ യാത്രക്കാരന്റെ പേരിന് നേരേയുള്ള ചെക് ബോക്സ് സെലക്ട് ചെയ്തശേഷം ക്യാൻസൽ ടിക്കറ്റ് ബട്ടനിൽ ക്ലിക്ക് ചെയ്യുക.
ഠ തുടർന്ന് ഓക്കെ നൽകി ടിക്കറ്റ് ക്യാൻസലേഷൻ ഉറപ്പിക്കുക.

ഠ ടിക്കറ്റ് ക്യാൻസലേഷൻ വിജയകരമായി പൂർത്തിയായാൽ ക്യാൻസലേഷൻ ചാർജ് ടിക്കറ്റിന്റെ തുകയിൽ നിന്ന് കുറച്ച ശേഷം ബാക്കിയുള്ള തുക നിങ്ങളുടെ അ‌ക്കൗണ്ടിലേക്ക് എത്തും.
ഠ ഇതോടൊപ്പം ടിക്കറ്റ് ക്യാൻസൽ ചെയ്തതിന്റെ കൺഫർമേഷൻ എസ്എംഎസും വഴിയും ഇ-മെയിൽ വഴിയും നിങ്ങളുടെ രജിസ്റ്റർ ചെയ്ത മൊ​ബൈൽ നമ്പരിലേക്കും ഇ-മെയിൽ വിലാസത്തിലേക്കും എത്തും.

എസി, സ്ലീപ്പർ, സെക്കൻഡ് ക്ലാസ് എന്നിവയ്ക്ക് അ‌നുസരിച്ച് ക്യാൻസലേഷൻ ചാർജും പല നിരക്കിലാണ് ഈടാക്കുക. ബുക്ക് ചെയ്ത ടിക്കറ്റ് ഭാഗികമായി റദ്ദാക്കുമ്പോൾ യാത്ര തുടരുന്ന മറ്റ് യാത്രക്കാർക്കായി പുതിയൊരു ഇആർഎസ് (ഇലക്ട്രോണിക് റിസർവേഷൻ സ്ലിപ് ) പ്രിന്റ് എടുത്ത് സൂക്ഷിക്കുന്നത് നന്നായിരിക്കും.