സാറ്റലൈറ്റ് കണക്റ്റിവിറ്റി, ഇ-സിം: ഐഫോൺ 14, ഐഫോൺ 14 പ്ലസ് സ്മാർട്ട്ഫോണുകൾ പുറത്തിറങ്ങി

14 സീരീസിലെ ഏറ്റവും വില കുറഞ്ഞ ഐഫോൺ 14 ബേസ് മോഡൽ എത്തുന്നത് 6.1 ഡിസ്പ്ലെയുമായാണ്. ഐഫോൺ മാക്സ് എന്ന പേരിൽ ലീക്ക് റിപ്പോർട്ടുകളിൽ പരാമർശിച്ചിരുന്ന ഡിവൈസ് ഐഫോൺ 14 പ്ലസ് എന്ന പേരിലാണ് ലോഞ്ച് ചെയ്തിരിക്കുന്നത്. ഐഫോൺ 14നെക്കാളും കുറച്ച് കൂടി വലിയ 6.7 ഇഞ്ച് ഡിസ്പ്ലെയുമായാണ് ഐഫോൺ 14 പ്ലസ് മോഡൽ ആപ്പിൾ അവതരിപ്പിച്ചിരിക്കുന്നത്. നമ്പർ ലൈനപ്പിലെ നോൺ പ്രോ വിഭാഗത്തിൽ ഇന്ന് വരെ പുറത്തിറങ്ങിയതിൽ ഏറ്റവും വലിയ ഐഫോൺ കൂടിയാണ് ഐഫോൺ 14 പ്ലസ്.

ഐഫോൺ 14 ലും ഐഫോൺ 14 പ്ലസിലും നോച്ച് ഡിസ്പ്ലെ നിലനിർത്തിയിട്ടുണ്ടെന്നത് ആരാധകരെ കുറച്ചെങ്കിലും നിരാശപ്പെടുത്തിയേക്കാം. ഐഫോൺ 14 കാഴ്ചയിൽ ഏതാണ്ട് ഐഫോൺ 13 ന് സമാനവുമാണ്. പുതിയ കളർ ഓപ്ഷനുകളാണ് പ്രധാനമായും തോന്നിപ്പിക്കുന്ന വ്യത്യാസം.

എ15 ബയോണിക് പ്രോസസറും ഐഫോൺ 14 ( നോൺ പ്രോ ) സീരീസിൽ ആപ്പിൾ നിലനിർത്തിയിട്ടുണ്ട്. 5 കോർ ജിപിയു, 6 കോർ സിപിയു എന്നിവയും പ്രോസസറിലുണ്ട്. 128 ജിബി, 256 ജിബി, 512 ജിബി ഇന്റേണൽ സ്റ്റോറേജ് ഓപ്ഷനുകളും ലഭ്യമാണ്. ആപ്പിൾ ഐഫോൺ റാം, ബാറ്ററി സൈസ് എന്നിവ സംബന്ധിച്ച് ഇപ്പോഴും വലിയ വ്യക്തത വന്നിട്ടില്ല.

ഐഫോൺ 14 ( നോൺ പ്രോ മോഡലുകൾ ) സീരീസ് ഡിവൈസുകളിൽ 12 എംപി + 12 എംപി ക്യാമറ സെറ്റപ്പാണ് നൽകിയിരിക്കുന്നത്. കൂടുതൽ വലിയ സെൻസറാണ് പ്രൈമറി ക്യാമറയിൽ നൽകിയിരിക്കുന്നത്. 12 എംപി സെൽഫി ക്യാമറ സെൻസറും ഡിവൈസുകളിൽ ലഭ്യമാണ്. ലോ ലൈറ്റ് സാഹചര്യങ്ങളിൽ പോലും മികച്ച ചിത്രങ്ങൾ പകർത്താൻ ഈ സെൻസറുകൾക്ക് ശേഷിയുണ്ട്.

സെൽഫി ക്യാമറയിൽ ഓട്ടോഫോക്കസ് ഫീച്ചറും നൽകിയിട്ടുണ്ട്. സോഫ്റ്റ്വെയർ അപ്ഡേറ്റുകൾക്ക് അനുസരിച്ച് ക്യാമറ ഫീച്ചറുകളുടെ മികവ് വർധിക്കുമെന്നും കമ്പനി പറയുന്നു. 5 കളർ ഓപ്ഷനുകളിലാണ് ആപ്പിൾ ഐഫോൺ 14, ഐഫോൺ 14 പ്ലസ് ഡിവൈസുകൾ എത്തുന്നത്.

പ്രതീക്ഷിച്ചിരുന്നത് പോലെ സാറ്റലൈറ്റ് എമർജൻസി എസ്ഒഎസ് ഫീച്ചറുമായിട്ടാണ് ആപ്പിൾ ഐഫോൺ 14, 14 പ്ലസ് മോഡലുകൾ ആപ്പിൾ അവതരിപ്പിക്കുന്നത്. ആദ്യ ഘട്ടത്തിൽ അമേരിക്കയിലും കാനഡയിലുമായിരിക്കും ഈ ഫീച്ചർ ലഭ്യമാകുക. ഇന്ത്യ പോലുള്ള രാജ്യങ്ങളിൽ ഈ സൌകര്യം ലഭ്യമാകുമോയെന്ന് കാത്തിരുന്ന് കാണാം. ഇ സിം സാങ്കേതികവിദ്യയ്ക്ക് കൂടുതൽ പിന്തുണ നൽകാനും ആപ്പിൾ തയ്യാറാകുന്നുണ്ട്. അമേരിക്കയിൽ ലോഞ്ച് ആകുന്ന ഐഫോൺ 14, 14 പ്ലസ് മോഡലുകളിൽ സിം ട്രേ ഉണ്ടാകില്ല. എന്നാൽ ഇന്ത്യയടക്കമുള്ള ആഗോള വിപണികളിൽ സിം സ്ലോട്ടുമായിട്ടാകും ഈ രണ്ട് ഡിവൈസുകളും ലോഞ്ച് ആകുക.

ആപ്പിൾ ഐഫോൺ 14, 14 പ്ലസ് മോഡലുകൾ സെപ്റ്റംബർ 9 മുതൽ പ്രീ ഓർഡറിന് ലഭ്യമാകും. ഐഫോൺ 14 മോഡൽ സെപ്റ്റംബർ 16ന് വിൽപ്പനയ്ക്കെത്തും. പ്ലസ് വേരിയന്റ് ഒക്ടോബർ 7നും വിൽപ്പനയ്ക്ക് എത്തും. ഐഫോൺ 14 മോഡലിന് ഐഫോൺ 13ന് സമാനമായ നിരക്കാണ് ( 799 ഡോളർ ) ആപ്പിൾ ഈടാക്കുന്നത്. ഐഫോൺ 14 പ്ലസ് മോഡലിന് 899 ഡോളറും വില വരും.

ആപ്പിൾ ഐഫോൺ 14 128 ജിബി - 79,900 രൂപ
ആപ്പിൾ ഐഫോൺ 14 256 ജിബി - 89,900 രൂപ
ആപ്പിൾ ഐഫോൺ 14 512 ജിബി - 1,09,900 രൂപ

ആപ്പിൾ ഐഫോൺ 14 പ്ലസ് ഇന്ത്യയിലെ വില

ആപ്പിൾ ഐഫോൺ 14 പ്ലസ് 128 ജിബി - 89,900 രൂപ
ആപ്പിൾ ഐഫോൺ 14 പ്ലസ് 256 ജിബി - 99,900 രൂപ
ആപ്പിൾ ഐഫോൺ 14 പ്ലസ് 512 ജിബി - 1,19,900 രൂപ