ആപ്പിൾ 15 സീരീസിലെ ഏറ്റവും കേമന്മാർ; ഐഫോൺ 15 പ്രോ, പ്രോമാക്സ് എന്നിവ എത്തി!

ലോകം കണ്ണിമ ചിമ്മാതെ ഉറ്റുനോക്കിയ ആപ്പിൾ വണ്ടർ ലസ്റ്റ് ഇവന്റിൽ ഏറ്റവും പുതിയ ഐഫോൺ 15 സീരീസ് ഫോണുകൾ അ‌വതരിപ്പിച്ച് ആപ്പിൾ. ഐഫോൺ 15, ഐഫോൺ 15 പ്ലസ്, ഐഫോൺ 15 പ്രോ, ഐഫോൺ 15 പ്രോ മാക്സ് എന്നീ നാല് മോഡലുകളാണ് ആപ്പിൾ ഐഫോൺ 15 സീരീസിൽ അ‌വതരിപ്പിച്ചിരിക്കുന്നത്.

ഡൈനാമിക് ഐലൻഡ് സാങ്കേതികവിദ്യയും ടൈപ് സി പോർടും ഉൾപ്പടെ അ‌വതരിപ്പിച്ചുകൊണ്ടാണ് ഐഫോൺ 15 സീരീസ് എത്തിയിരിക്കുന്നത്. ഐഫോൺ 15 സീരീസിലെ ഏറ്റവും മികച്ച മോഡലുകളായ ഐഫോൺ 15 പ്രോ, ഐഫോൺ 15 പ്രോ മാക്സ് എന്നിവ ടൈറ്റാനിയം ബോഡിയോടെ ആണ് എത്തിയിരിക്കുന്നത്. ആപ്പിളിന്റെ എക്കാലത്തെയും ഭാരം കുറഞ്ഞ പ്രോ മോഡലാണ് ഇപ്പോൾ അ‌വതരിപ്പിക്കപ്പെട്ടിരിക്കുന്നത്.

ശക്തമായ ക്യാമറ അപ്‌ഗ്രേഡുകൾ ആണ് പ്രോ മോഡലുകളുടെ ഏറ്റവുംവലിയ പ്രത്യേകത. ഐഫോൺ 15 പ്രോ, ഐഫോൺ 15 പ്രോ മാക്‌സ് എന്നിവയുടെ വിലയും ആപ്പിൾ പ്രഖ്യാപിച്ചു. ഐഫോൺ 15 പ്രോ 999 ഡോളർ പ്രാരംഭ വിലയിൽ ലഭ്യമാകും. എന്നാൽ ഐഫോൺ 15 പ്രോ മാക്‌സ് 1,999 ഡോളർ എന്ന ഉയർന്ന വിലയിൽ ആണ് ലഭ്യമാകുക.

മുമ്പത്തെ പ്രോ മാക്‌സ് മോഡലിൽ കണ്ട 6.7 ഇഞ്ച് ഒഎൽഇഡി സ്‌ക്രീനും പ്രോ പതിപ്പിൽ 6.1 ഇഞ്ച് സ്‌ക്രീനും ആപ്പിൾ നിലനിർത്തിയിട്ടുണ്ട്. രണ്ട് പ്രോ മോഡലുകളിലും പ്രൊമോഷൻ സാങ്കേതികവിദ്യ ഘടിപ്പിച്ച സൂപ്പർ റെറ്റിന XDR ഡിസ്‌പ്ലേകൾ ഉണ്ട്. ഓൾവെയ്സ് ഓൺ ഡിസ്‌പ്ലേ ഫീച്ചറും അടുത്തിടെ അവതരിപ്പിച്ച സ്റ്റാൻഡ്‌ബൈ മോഡിനെയും ഈ ഡിസ്പ്ലേകൾ പിന്തുണയ്ക്കുന്നു.

A17 പ്രോ ചിപ്പാണ് ഈ രണ്ട് പ്രോ മോഡലുകളുടെയും നട്ടെല്ല്. ഈ ചിപ്പ് സ്മാർട്ട്‌ഫോൺ മേഖലയിൽ സമാനതകളില്ലാത്ത പ്രകടനം നൽകുന്നുവെന്ന് ആപ്പിൾ അവകാശപ്പെടുന്നു. മെച്ചപ്പെടുത്തിയ GPU ഉപയോഗിച്ച്, ഗെയിമിംഗ് അനുഭവം പുതിയ ഉയരങ്ങളിലേക്ക് ഉയർത്താൻ കഴിവുള്ളവയാണ് ഈ രണ്ട് മോഡലുകളും എന്ന് ആപ്പിൾ വിശദീകരിക്കുന്നു.

ഉയർന്ന നിലവാരമുള്ള പിസികൾക്ക് പോലും ഐഫോൺ 15 പ്രോ, ഐഫോൺ 15 പ്രോ മാക്സ് എന്നിവ എതിരാളിയാകാൻ സാധ്യതയുണ്ട്. ഐഫോൺ 15 പ്രോ ബ്ലാക്ക് ടൈറ്റാനിയം, വൈറ്റ് ടൈറ്റാനിയം, ബ്ലൂ ടൈറ്റാനിയം, നാച്ചുറൽ ടൈറ്റാനിയം എന്നിവയുൾപ്പെടെ പുതിയ കളർ ഓപ്ഷനുകളിൽ ലഭ്യമാകും.

ഏറ്റവും മികവ് ഈ മോഡലുകളിലെ ക്യാമറകളിലാണ്. ഐഫോൺ 15 പ്രോ മോഡലുകളിലെ ക്യാമറ സിസ്റ്റം "നിങ്ങളുടെ പോക്കറ്റിലെ ഏഴ് ക്യാമറ ലെൻസുകൾക്ക് തുല്യമാണ്" എന്ന് ആപ്പിൾ അവകാശപ്പെടുന്നു. ഐഫോൺ 15 പ്രോ മോഡലുകളിൽ മികച്ച ലോ-ലൈറ്റ്, ലെൻസ് ഫ്ലെയർ ഫ്രീ ഫോട്ടോകൾക്കായി 48 മെഗാപിക്സൽ ക്യാമറയുണ്ട്.

ഉപയോക്താക്കൾക്ക് ഫോക്കൽ ലെങ്ത് ( 24mm, 28mm, 35mm ) തമ്മിൽ മാറാനും 120mm വരെ 5x ഒപ്റ്റിക്കൽ സൂം നേടാനും കഴിയും. 4K60 ProRes വീഡിയോ റെക്കോർഡിംഗും USB-C പോർട്ട് വഴി നേരിട്ടുള്ള ബാഹ്യ ഡ്രൈവ് കണക്റ്റിവിറ്റിയും ഈ ഫോണുകൾ പിന്തുണയ്ക്കുന്നു.

ക്യാമറയുടെ കാര്യത്തിൽ, ഐഫോൺ 15 പ്രോ 48MP പ്രൈമറി ക്യാമറ, 12MP ടെലിഫോട്ടോ, 12MP അൾട്രാവൈഡ് ക്യാമറ എന്നിവയുമായാണ് വരുന്നത്. ഐഫോൺ 15 പ്രോ മാക്സിൽ, ആപ്പിൾ 5 എക്സ് ടെലിഫോട്ടോ ക്യാമറ നൽകിയിട്ടുണ്ട്. ഫ്ലൂയിഡ് ഡൈനാമിക് ഐലൻഡിനൊപ്പം, പുതിയ ഐഫോൺ പ്രോ മോഡലുകളിൽ പ്രോ ഡിസ്‌പ്ലേയും പ്രോ മോഷനും ഫീച്ചർ ചെയ്യുന്നു.

ഐഫോൺ ഇവന്റിൽ ഏറ്റവും ശ്രദ്ധ നേടിയത് പ്രോ, പ്രോമാക്സ് മോഡലുകൾ ആയിരുന്നു. ഐഫോൺ 15 പ്രോയുടെ വില 1,34,900 രൂപയും (128 ജിബി) പ്രോ മാക്‌സ് 1,59,900 രൂപയുമാണ് (256 ജിബി). ഐഫോൺ 15 പ്രോയ്ക്ക് 6.1 ഇഞ്ച് ഡിസ്‌പ്ലേയും, പ്രോ മാക്‌സിന് 6.7 ഇഞ്ച് ഡിസ്‌പ്ലേയുമാണ് ഉള്ളത്.