ഐഫോൺ 16ഇയിൽ അതില്ല, അതില്ലാതിരിക്കാൻ ഇതാണ് കാരണം

കാത്തിരിപ്പ് അവസാനിപ്പിച്ച് ഐഫോൺ 16ഇ സ്മാർട്ട്‌ഫോണിന്റെ വിൽപന ഇന്ത്യയിൽ ആരംഭിച്ചു കഴിഞ്ഞിരിക്കുന്നു. ആപ്പിളിന്റെ ബജറ്റ് ഫ്രണ്ട്‌ലി ഫോൺ ശ്രേണിയായിരുന്ന എസ്ഇ സീരീസിന് പകരം കൂടുതൽ വിലയിലും സ്പെസിഫിക്കേഷനുകളോടെയും ഇറക്കിയ മൊബൈൽ ഫോൺ മോഡലാണ് ഐഫോൺ 16ഇ. കഴിഞ്ഞ സെപ്റ്റംബറിൽ പുറത്തിറങ്ങിയ ഐഫോൺ 16 സീരീസിലെ പുതിയ മോഡൽ കൂടിയാണ് ഐഫോൺ 16ഇ. ഏറ്റവും പുതിയ A18 ചിപ്പും ആപ്പിൾ ഇന്റലിജൻസിനുള്ള പിന്തുണയും ഈ സ്മാർട്ട്‌ഫോണിൽ ഉൾപ്പെടുത്തിയിണ്ട്. എന്നാൽ ഡൈനാമിക് ഐലൻഡ്, മാഗ്‌സേഫ്, അൾട്രാ-വൈഡ്ബാൻഡ് (UWB) കണക്റ്റിവിറ്റിക്കുള്ള പിന്തുണയെല്ലാം ഒഴിവാക്കിയാണ് ഐഫോൺ 16ഇ ഇറക്കിയിരിക്കുന്നത്. ഇതിനുള്ള വിശദീകരണവുമായി എത്തിയിരിക്കുകയാണ് കമ്പനി.

ഐഫോൺ 16ഇ യെക്കുറിച്ചുള്ള അവലോകനത്തിൽ, മാഗ്‌സേഫിനുള്ള (MagSafe) പിന്തുണയുടെ അഭാവം ജോൺ ഗ്രുബർ എടുത്തുകാണിച്ചിരുന്നു. ഐഫോൺ 16ഇയുടെ ടാർഗെറ്റ് പ്രേക്ഷകരിൽ ഭൂരിഭാഗവും മാഗ്‌സേഫ് ഉപയോഗിക്കുന്നില്ലെന്ന് ആപ്പിളിന്റെ പുതിയ കണ്ടെത്തൽ. ഉപയോക്താക്കൾ സാധാരണയായി കേബിൾ ഉപയോഗിച്ച് ചാർജ് ചെയ്യാൻ ഇഷ്ടപ്പെടുന്നുവരാണ്.

2016 മുതൽ മാക് കംപ്യൂട്ടറുകളിൽ നിന്ന് മാഗ് സേഫ് അപ്രത്യക്ഷമാവുകയും പകരം യുഎസ്ബി-സി ചാർജിങ് പോർട്ടുകൾ അവതരിപ്പിക്കുകയുമായിരുന്നു. ഐഫോൺ 16ഇയിൽ മാഗ്‌സേഫിനുള്ള പിന്തുണയില്ലാത്തതിനാൽ ഉപയോക്താക്കൾക്ക് ക്വി ചാർജർ ഉപയോഗിച്ച് 7.5Wൽ മാത്രമേ സ്മാർട്ട്‌ഫോൺ ചാർജ് ചെയ്യാൻ കഴിയുകയുള്ളു.

ഐഫോൺ 16ഇ-യ്ക്ക് എ18 ചിപ്പ്, 6-കോർ സിപിയു, ആപ്പിൾ ഇന്റലിജൻസ്, ചാറ്റ്ജിപിടി ഇന്റഗ്രേഷൻ, 2x ഡിജിറ്റൽ സൂം സഹിതം 48 എംപി ഫ്യൂഷൻ സിംഗിൾ റീയർ ക്യാമറ, ഓട്ടോഫോക്കസ് സഹിതം 12 എംപി ട്രൂഡെപ്ത് സെൽഫി ക്യാമറ, 60 ഫ്രെയിം പെർ സെക്കൻഡ് സഹിതം 4കെ വീഡിയോ റെക്കോർഡിംഗ്, 26 മണിക്കൂർ വരെ വീഡിയോ പ്ലേബാക്ക്, 6.1 ഇഞ്ച് ഒലെഡ് ഡിസ്‌പ്ലെ, ഫേസ് ഐഡി, ആക്ഷൻ ബട്ടൺ, യുഎസ്ബി-സി പോർട്ട് എന്നിവയാണ് പ്രധാന സവിശേഷതകൾ.