പ്രശസ്തി കളഞ്ഞൊരു കളിക്കില്ല, ഐക്യൂ നിയോ 7 ഒരുങ്ങിത്തന്നെ, വാങ്ങാൻ തയാറായിക്കോ!

വിവോയുടെ സബ് ബ്രാൻഡായ ഐക്യു തങ്ങളുടെ ഏറ്റവും കിടിലൻ സ്മാർട്ട്ഫോണുകളിൽ ​ഒന്നായ ഐക്യൂ നിയോ 7 ഇന്ത്യയിൽ അ‌വതരിപ്പിക്കാൻ എല്ലാ തയാറെടുപ്പുകളും പൂർത്തിയാക്കിയിരിക്കുകയാണ്. ഫെബ്രുവരി 16 ന് ആണ് നിയോ 7 ന്റെ ഇന്ത്യയിലേക്കുള്ള വരവ്. ഇന്ത്യയിൽ ലോഞ്ച് ചെയ്യാൻ വിരലിലെണ്ണാവുന്ന ദിവസങ്ങൾ മാത്രം ശേഷിക്കെ കഴിഞ്ഞ ദിവസം ഐക്യൂ നിയോ 7 ന്റെ ഇന്ത്യയിലെ വില സംബന്ധിച്ച ചില സൂചനകൾ ഓ​ൺ​ലൈനുകളിൽ പ്രചരിച്ചിരുന്നു. ഇത് ഈ ഫോണിനുമേലുള്ള ഇന്ത്യക്കാരുടെ പ്രതീക്ഷകളുടെ ഭാരം വർധിപ്പിച്ചിരുന്നു.

ആരെയും നിരാശപ്പെടുത്തില്ല

ഐക്യൂവിന്റെ നിയോ 6 സ്മാർട്ട്ഫോൺ ഇന്ത്യയിൽ ഏറെപ്പേർക്ക് ഇഷ്ടപ്പെട്ടിരുന്നു. ഇപ്പോഴും നിയോ 6 വാങ്ങാൻ ആളുകൾ അ‌ന്വേഷിച്ച് നടക്കുന്നുമുണ്ട്. ഐക്യൂ നിയോ 6 നെക്കാൾ മികച്ച ഫോൺ തന്നെയാകും ഐക്യൂ നിയോ 7 5ജി എന്നാണ് വിലയിരുത്തൽ. നിയോ 6ലൂടെ ലഭിച്ച പേരിലും പ്രശസ്തിയിലും ജനസ്വീകാര്യതയിലും ഇടിവ് വരാതിരിക്കാൻ ഏറെ ശ്രദ്ധയോടെ തന്നെയാണ് ഇന്ത്യയിലേക്കുള്ള നിയോ 7 നെ കമ്പനി തയാറാക്കിയിരിക്കുന്നത്. കുറഞ്ഞ വിലയിൽ മികച്ച ഫീച്ചറുകൾ ആഗ്രഹിക്കുന്ന ഉപയോക്താക്കളെ വശത്താക്കാൻ ഐക്യൂ നിയോ 7 ന്റെ ഫീച്ചറുകൾ ധാരാളമാണ് എന്നാണ് വിലയിരുത്തൽ.

വരവ് ഒരുങ്ങിത്തന്നെ

കഴിഞ്ഞ മാസം, അ‌തായത് 2022 ഡിസംബറിൽ ആണ് നിയോ 7 ​ചൈനയിൽ ഔദ്യോഗികമായി പുറത്തിറങ്ങിയത്. ​ചൈനയിൽ പുറത്തിറങ്ങിയ ​അ‌തേ മോഡൽ ആയിരിക്കില്ല കമ്പനി ഇന്ത്യയിൽ അ‌വതരിപ്പിക്കുന്നത്. ഇന്ത്യൻ സാഹചര്യങ്ങൾക്കും മുൻഗണനകൾക്കും പ്രാധാന്യം നൽകിയുള്ള മാറ്റങ്ങളോടെയാണ് ഐക്യൂ നിയോ 7 5ജി സ്മാർട്ട്ഫോൺ ഇന്ത്യയിലത്തുക എന്ന് ഇതിനകം വ്യക്തമായിട്ടുണ്ട്. മണിക്കൂറുകൾക്കകം ഇന്ത്യയിൽ എത്തുന്ന ഈ സ്മാർട്ട്ഫോണിൽ ഉണ്ടാകുമെന്ന് കരുതുന്ന ഫീച്ചറുകളും കഴിഞ്ഞ ദിവസം ഓൺ​ലൈനുകളിലൂടെ പുറത്തുവന്ന വില അ‌ടക്കമുള്ള വിവരങ്ങളും പരിചയപ്പെടാം.

മികവിൽ വിട്ടുവീഴ്ചയില്ല

പെർഫോമൻസിന്റെ കാര്യത്തിൽ ഒരു വിട്ടുവീഴ്ചയ്ക്കും തയാറല്ല എന്ന് പ്രഖ്യാപിച്ചുകൊണ്ട് 30,000 രൂപയിൽ താഴെ വിലയിൽ നൽകാൻ കഴിയുന്ന മികച്ച പ്രൊസസറുകളിൽ ​ഒന്നായ മീഡിയടെക് ഡൈമെൻസിറ്റി 8200 SoC ആണ് നിയോ 7ന് കരുത്ത് പകരാൻ ഐക്യൂ നൽകിയിരിക്കുന്നത് എന്നാണ് റിപ്പോർട്ടുകൾ പറയുന്നത്. മീഡിയടെക്കിൽ നിന്നുള്ള ഏറ്റവും പുതിയ ചിപ്‌സെറ്റ് അവതരിപ്പിക്കുന്ന ഇന്ത്യയിലെ ആദ്യത്തെ സ്മാർട്ട്‌ഫോൺ എന്ന പെരുമ ഇതിലൂടെ ഐക്യൂ നിയോ 7 സ്വന്തമാക്കും. അ‌തിവേഗ പ്രവർത്തനം കാഴ്ചവയ്ക്കാൻ പ്രോസസറിന് അ‌കമ്പടിയായി LPDDR5 റാം, UFS 3.1 സ്റ്റോറേജ് എന്നിവയും ജോടിയായി എത്തുമെന്ന് പ്രതീക്ഷിക്കപ്പെടുന്നു.

64 എംപി ട്രിപ്പിൾ ക്യാമറ സജ്ജീകരണം

ഫുൾ HD+ റെസല്യൂഷൻ, 120Hz റിഫ്രഷ് റേറ്റ്, HDR10+ സർട്ടിഫിക്കേഷൻ, 1300 nits പീക്ക് ​ബ്രൈറ്റ്നെസ് എന്നിവയുള്ള 6.78 ഇഞ്ച് AMOLED ഡിസ്‌പ്ലേ ആണ് നിയോ 7 5ജിയിൽ ഉണ്ടാകുക. 64 എംപി ട്രിപ്പിൾ ക്യാമറ സജ്ജീകരണവും ഫ്രണ്ടിൽ 16 എംപി സെൽഫി ക്യാമറയും പ്രതീക്ഷിക്കുന്നു. 5000എംഎഎച്ചിന്റേതാകും ബാറ്ററി. ഇതോടൊപ്പം 120വാട്ട് ഫാസ്റ്റ് ചാർജിങ് സപ്പോർട്ടും ഉണ്ടാകും. ഉയർന്ന പെർഫോമൻസ് കാഴ്ചവയ്ക്കുന്ന സ്മാർട്ട്ഫോൺ തേടുന്ന ഇന്ത്യൻ ഉപയോക്താക്കളെ ആകർഷിക്കാൻ ​കഴിയുന്ന എല്ലാ മികച്ച ഫീച്ചറുകളും ഐക്യൂ നിയോ 7 5ജിയിൽ നൽകിയിട്ടുണ്ട്. 5ജി ബാൻഡുകളുടെ കാര്യത്തിലടക്കം മുൻഗാമിയെക്കാൾ ഏറെ മുന്നിലാണ് നിയോ 7.

ഇന്ത്യയിലെ വില

ഔദ്യോഗികമായി നിയോ 7 5ജി സ്മാർട്ട്ഫോണിന്റെ ഇന്ത്യയിലെ വില സംബന്ധിച്ച വിവരങ്ങളൊന്നും പുറത്ത് വന്നിട്ടില്ല. എന്നാൽ വിൽപ്പന ആരംഭിക്കുന്ന ഫെബ്രുവരി 16 ഓഫറുകൾ അ‌ടക്കം 26,999 രൂപ വിലയിൽ ഐക്യൂ നിയോ 7 ലഭ്യമാകും എന്നാണ് കഴിഞ്ഞ ദിവസം പുറത്തുവന്നത്. 30,000 രൂപയോ അ‌തിൽ താഴെ വിലയിലോ ആകും ഈ സ്മാർട്ട്ഫോൺ എത്തുക എന്നകാര്യം ഉറപ്പാണ്. 30,000 രൂപയിൽ താഴെ വിലയിൽ മികച്ച ഫീച്ചറുകളോടെ തെരഞ്ഞെടുക്കാവുന്ന നല്ലൊരു ഓപ്ഷൻ തന്നെയാകും ഐക്യൂ നിയോ 7. ആമസോൺ വഴിയും ഔദ്യോഗിക ​വെബ്​സൈറ്റ് വഴിയും വിവോ ഓഫ്‌ലൈൻ സ്റ്റോറുകളിലൂടെയും ഈ പുത്തൻ താരത്തെ സ്വന്തമാക്കാവുന്നതാണ്. നത്തിങ് ഫോൺ (1), റെഡ്മി നോട്ട് 12 പ്രോ+, റിയൽമി 10 പ്രോ+ 5 ജി എന്നിവയാകും ഇന്ത്യൻ വിപണിയിലെ നിയോ 7 ന്റെ പ്രധാന എതിരാളികൾ.