പ്രോ ഫോണിന് പ്രോ പ്രോസസർ തന്നെ ഇരിക്കട്ടെ! നത്തിങ് CMF 2 പ്രോയ്ക്ക് ഡൈമെൻസിറ്റി 7300 പ്രോ കരുത്ത്

നത്തിങ്ങിന്റെ സബ് ബ്രാൻഡായ സിഎംഎഫ് തങ്ങളുടെ രണ്ടാമത്തെ സ്മാർട്ട്ഫോൺ ഏപ്രിൽ 28ന് ഇന്ത്യയിൽ ലോഞ്ച് ചെയ്യാൻ പോകുകയാണ്. ലോഞ്ച് തിയതി ഇതിനകം സ്ഥിരീകരിച്ച നത്തിങ് ഈ വരാൻ പോകുന്ന സിഎംഎഫ് ഫോൺ 2 പ്രോയുടെ (CMF Phone 2 Pro) ഫീച്ചറുകൾ ഓരോന്നായി ഇപ്പോൾ വെളിപ്പെടുത്തിക്കൊണ്ടിരിക്കുന്നു. ഇത്തരത്തിൽ ഏറ്റവും ഒടുവിൽ നത്തിങ് പുറത്തുവിട്ട വിവരങ്ങൾ പ്രകാരം ഒരു 'പ്രോ' ചിപ്സെറ്റിന്റെ അ‌കമ്പടിയിലാണ് സിഎംഎഫ് ഫോൺ 2​ പ്രോ എത്തുക. മീഡിയടെക് ഡൈമെൻസിറ്റി 7300 പ്രോ ആണ് ആ ​പ്രോസസർ.

സിഎംഎഫ് ഇതിന് മുൻപ് ഒരു സ്മാർട്ട്ഫോൺ മാത്രമാണ് പുറത്തിറക്കിയിട്ടുള്ളത്. സിഎംഎഫ് ഫോൺ 1 എന്ന പേരുള്ള ആ സ്മാർട്ട്ഫോണിൽ ഡൈമെൻസിറ്റി 7300 പ്രോസസർ ആണ് നത്തിങ് നൽകിയത്. എന്നാൽ വരാൻ പോകുന്ന സിഎംഎഫ് ഫോൺ 2 പ്രോയിൽ ഡൈമെൻസിറ്റി 7400 ചിപ്പ് ആണ് നത്തിങ് അ‌വതരിപ്പിക്കുക എന്നാണ് പൊതുവിൽ പ്രതീക്ഷിക്കപ്പെട്ടിരുന്നത്.

പക്ഷേ അ‌ഭ്യൂഹങ്ങളെയും ലീക്ക് റിപ്പോർട്ടുകളെയുമൊക്കെ പൊളിച്ചെഴുതിക്കൊണ്ട്, മീഡിയടെക് ഡൈമെൻസിറ്റി 7300 പ്രോ ചിപ്സെറ്റാണ് സിഎംഎഫ് ഫോൺ 2 പ്രോയിൽ നൽകിയിരിക്കുന്നത് എന്ന് നത്തിങ് ഇപ്പോൾ വ്യക്തമാക്കിയിരിക്കുന്നു. സിഎംഎഫ് ഫോൺ 1-ലെ പ്രോസസറുമായി താരതമ്യപ്പെടുത്തുമ്പോൾ പുതിയ പ്രോ ചിപ്പ് 10% വേഗതയേറിയ സിപിയുവും 5% ഗ്രാഫിക്സ് ഇംപ്രൂവ്മെന്റും വാഗ്ദാനം ചെയ്യുന്നു.

6th ജെനറേഷൻ NPU ഈ ചിപ്പ് ഈ ഫോണിൽ ഉപയോഗിക്കുന്നുണ്ടെന്നും ഇത് 4.8 TOPS AI വാഗ്ദാനം ചെയ്യുമെന്നും നത്തിങ് പറയുന്നു. കൂടാതെ, BGMI-യിൽ 120 fps ഗെയിമിംഗ്, നെറ്റ്‌വർക്കിൽ 53% മെച്ചപ്പെടുത്തലുകൾ, 1000Hz ടച്ച് സാമ്പിൾ റേഷ്യോ എന്നിവയും ഈ സിഎംഎഫ് ഫോൺ 2 പ്രോയിൽ ഉണ്ടാകും.

വരാൻ പോകുന്ന ഫോണിനെ പരിചയപ്പെടുത്തുന്നതിന്റെ ഭാഗമായി അ‌ടുത്തിടെ നത്തിങ് സിഎംഎഫ് ഫോൺ 2 പ്രോയുടെ ബെസൽ വലുപ്പം കാണിക്കുന്ന ചിത്രം പുറത്തുവിട്ടിരുന്നു. അൾട്രാ സ്ലിം, അൾട്രാ ലൈറ്റ്, അൾട്രാ സ്ലീക്ക് ഡിസൈൻ ആണ് ഈ ഫോണിനുള്ളത് എന്നാണ് നത്തിങ് പറയുന്നത്. കസ്റ്റ​മൈസ് ചെയ്യാവുന്ന രൂപകൽപ്പനയെക്കുറിച്ച് സൂചന നൽകുന്ന, സ്ക്രൂ ഉള്ള ഒരു സ്ലീക്ക്, മെറ്റാലിക് കോർണറിന്റെ ക്ലോസ്-അപ്പ് ചിത്രവും പുറത്തുവിട്ടിരുന്നു.

സിഎംഎഫ് ഫോൺ 2 പ്രോ എത്താൻ പോകുന്നു എന്നറിഞ്ഞതുമുതൽ ആരാധകർ ആകാംക്ഷയോടെ ചോദിച്ചിരുന്ന ഒരു ചോദ്യത്തിന്റെ ഉത്തരവും ഇപ്പോൾ ലഭ്യമായിട്ടുണ്ട്. സിഎംഎഫ് ഫോൺ 2 പ്രോ ബോക്സിൽ ചാർജർ ഉണ്ടാകുമോ എന്നതായിരുന്നു ആ ചോദ്യം. ട്വിറ്ററിലൂടെ നത്തിങ് ഇന്ത്യ മേധാവി അ‌കിസ് ഇവാഞ്ചലിഡിസ് (Akis Evangelidis) ആണ് ഇതിനുള്ള ഉത്തരം നൽകിയത്.

ചാർജിങ് അഡാപ്റ്ററിനായി ഒരു പ്രത്യേക സ്ലോട്ട് കാണിക്കുന്ന നത്തിങ് സിഎംഎഫ് 2 പ്രോ 5ജിയുടെ ബോക്സിന്റെ ചിത്രം ഉൾക്കൊള്ളുന്ന ഒരു പോസ്റ്റ് ഇവാഞ്ചലിഡിസ് ട്വിറ്ററിൽ പങ്കുവച്ചു. ഇതോടെ ചാർജർ സഹിതമാണ് ഈ ഫോൺ വരുന്നത് എന്ന് ഉറപ്പായിരിക്കുന്നു. ഇന്ത്യയിൽ 20000 രൂപയിൽ താഴെ വിലയിലാകും ഈ പ്രോ ഫോൺ എത്തുക എന്നാണ് ലീക്ക് റിപ്പോർട്ടുകൾ പറയുന്നത്.

നത്തിങ് അ‌ടുത്തിടെ തങ്ങളുടെ 3എ സീരീസ് അ‌വതരിപ്പിച്ചിരുന്നു. അ‌ത് 22999 രൂപ പ്രാരംഭ വിലയിലാണ് എത്തിയത്. സിഎംഎഫ് ഫോൺ 2 പ്രോയുടെ പ്രധാന ആകർഷണം അതിന്റെ ഡി​സൈനും ക്യാമറയുമാകാമെന്ന് ടീസറുകൾ സൂചിപ്പിക്കുന്നു. വരും ദിവസങ്ങളിൽ ഈ സ്മാർട്ട്ഫോണിനെ സംബന്ധിച്ച കൂടുതൽ ഡീറ്റെയിൽസ് അറിയാൻ കഴിയും.