ഫയർ-ബോൾട്ട് ഇനി സ്മാർട്ട്‌ഫോൺ വിപണിയിലേക്ക്! 6000mAh ബാറ്ററിയും ജെമിനി എഐയുമായി 'ബോൾട്ട്' ഫോണുകൾ വരുന്നു

ഇന്ത്യൻ വെയറബിൾ ബ്രാൻഡായ ഫയർ-ബോൾട്ട് (Fire-Boltt) ഇനി സ്മാർട്ട്‌ഫോൺ രംഗത്തേക്കും കടക്കുന്നു. ഓഗസ്റ്റ് 25-ന് ഉച്ചയ്ക്ക് 12 മണിക്ക് ഫോണുകൾ ഔദ്യോഗികമായി പുറത്തിറക്കും. 'ബോൾട്ട്' (Boltt) എന്ന പുതിയ ബ്രാൻഡ് നെയിമിലാണ് കമ്പനി തങ്ങളുടെ ആദ്യ സ്മാർട്ട്‌ഫോണുകൾ വിപണിയിലെത്തിക്കുന്നത്. ബോൾട്ട് ഏസ് 5ജി (Boltt Ace 5G), ബോൾട്ട് ഇവിഒ 4ജി (Boltt Evo 4G) എന്നിവയാണ് ഈ സീരീസിലെ ആദ്യ ഫോണുകൾ. ബജറ്റ് ഫോൺ വിപണി ലക്ഷ്യമിട്ടെത്തുന്ന ഈ മോഡലുകൾ പ്രമുഖ ഇ-കോമേഴ്‌സ് പ്ലാറ്റ്‌ഫോമായ ഫ്ലിപ്കാർട്ടിലൂടെ മാത്രമായിരിക്കും വിൽപ്പനയ്‌ക്കെത്തുക.

ലോഞ്ചിന് മുന്നോടിയായി ഫ്ലിപ്കാർട്ടിലെ പ്രത്യേകം മൈക്രോസൈറ്റിലൂടെ ഫോണുകളുടെ പ്രധാന ഫീച്ചറുകൾ കമ്പനി പുറത്തുവിട്ടിട്ടുണ്ട്. 120Hz റിഫ്രഷ് റേറ്റുള്ള 6.79 ഇഞ്ച് HD+ ഡിസ്‌പ്ലേയാണ് രണ്ട് ഫോണുകളിലുമുള്ളത്. 18W ചാർജിംഗ് പിന്തുണയുള്ള 6,000mAh വൻ ബാറ്ററിയാണ് ഇതിന്റെ പ്രധാന ആകർഷണം. ബ്ലോട്ട്‌വെയറുകൾ ഒന്നുമില്ലാത്ത ക്ലീൻ ആൻഡ്രോയിഡ് (Pure Android) അനുഭവവും ഗൂഗിൾ ജെമിനി എഐ (Google Gemini AI) സവിശേഷതകളും ഇതിൽ ലഭ്യമാകും.

ബോൾട്ട് ഏസ് 5ജി, ഇവിഒ 4ജി: പ്രധാന സവിശേഷതകൾ

കണക്റ്റിവിറ്റിയിലും റിയർ ക്യാമറയിലുമാണ് ഈ രണ്ട് ഫോണുകളും പ്രധാനമായും വേർതിരിയുന്നത്. വൈൻ റെഡ് കളറിലെത്തുന്ന ഏസ് 5ജിയിൽ 64 മെഗാപിക്സൽ പ്രൈമറി ക്യാമറയാണുള്ളത്. അതേസമയം ആർട്ടിക് വൈറ്റ് ഫിനിഷിലുള്ള ഇവിഒ 4ജിയിൽ 50 മെഗാപിക്സൽ പ്രധാന ക്യാമറ നൽകിയിരിക്കുന്നു. വലിയ ബാറ്ററി ശേഷിയുണ്ടെങ്കിലും 7.95mm മാത്രമാണ് ഈ ഫോണുകളുടെ കനം.

ഫ്ലിപ്കാർട്ട് ഉപഭോക്താക്കൾക്ക് ഇൻസ്റ്റന്റ് ബാങ്ക് ഡിസ്‌കൗണ്ടുകളും നോ-കോസ്റ്റ് ഇഎംഐ സൗകര്യവും ലഭ്യമായിരിക്കും. ആദ്യ ഘട്ടത്തിൽ വാങ്ങുന്നവർക്ക് മികച്ച എക്സ്ചേഞ്ച് ഓഫറുകളിലൂടെ കുറഞ്ഞ വിലയിൽ ഫോൺ സ്വന്തമാക്കാനും സാധിക്കും. ഫോണുകളുടെ ഔദ്യോഗിക വിലയും റാം/സ്റ്റോറേജ് വേരിയന്റുകളും ലോഞ്ച് വേളയിൽ വ്യക്തമാക്കും. ക്ലീൻ സോഫ്റ്റ്‌വെയർ അനുഭവം നൽകി ബജറ്റ് സ്മാർട്ട്‌ഫോൺ വിപണിയിലെ വമ്പൻമാരെ വെല്ലുവിളിക്കാനാണ് ഫയർ-ബോൾട്ടിന്റെ നീക്കം.