ഗൂഗിൾ പിക്‌സൽ 5 സ്മാർട്ഫോണിൻറെ സവിശേഷതകൾ ചോർന്നു; നിങ്ങൾക്ക് അറിയേണ്ടതെല്ലാം

ചോർന്ന റെൻഡറുകൾ സൂചിപ്പിക്കുന്നത് പിക്‌സൽ 5 ഫ്രണ്ട് ഹോൾ-പഞ്ച് ഡിസ്‌പ്ലേയും പിന്നിലായി ഡ്യുവൽ റിയർ ക്യാമറ സജ്ജീകരണവും വരുന്നു എന്നാണ്. പ്രൈസ്ബാബ ഓൺ‌ലീക്സുമായി സഹകരിച്ച്, വരാനിരിക്കുന്ന പിക്‌സൽ 5 ന്റെ ഉയർന്ന നിലവാരം പുലർത്തുന്ന റെൻഡറുകൾ പ്രസിദ്ധീകരിച്ചു. പിക്‌സൽ 4എ ഫോണിൽ വരുന്നത് പോലെ മുകളിൽ ഇടത് കോണിൽ സ്ഥാപിച്ചിരിക്കുന്ന കട്ട്ഔട്ടിനൊപ്പം ഒരു പഞ്ച്-ഹോൾ ഡിസ്പ്ലേ ഉണ്ടായിരിക്കാമെന്ന് റെൻഡറുകൾ സൂചിപ്പിക്കുന്നു.

പിൻഭാഗത്ത്, ചതുരാകൃതിയിലുള്ള മൊഡ്യൂളിനുള്ളിൽ ഡ്യൂവൽ ക്യാമറകളുമായി പിക്‌സൽ 5 വരുന്നു. ഈ മൊഡ്യൂൾ ബാക്ക് പാനലിന്റെ മുകളിൽ ഇടത് മൂലയിൽ സ്ഥാപിച്ചിരിക്കുന്നു. രണ്ട് ഇമേജ് സെൻസറുകൾക്കൊപ്പം ഒരു ഫ്ലാഷും മറ്റൊരു സെൻസറും വരുന്നു. ക്യാമറ സെറ്റപ്പിന്റെ സാങ്കേതിക വിശദാംശങ്ങൾ ഇതുവരെ വെളിപ്പെടുത്തിയിട്ടില്ല. ചോർന്ന റെൻഡറുകൾ കാണിക്കുന്നത് പിക്‌സൽ 5ൽ ഫിംഗർപ്രിന്റ് സെൻസർ ഉണ്ടായിരിക്കാമെന്നും ഇൻ-ഡിസ്‌പ്ലേയിൽ ഇത് വരുന്നില്ലെന്നുമാണ്.

പിക്‌സൽ 5ൽ തിളക്കമുള്ള ബാക്ക് പാനൽ ഫിനിഷും അതേസമയം വോളിയവും പവർ ബട്ടണുകളും കാണപ്പെടുന്നു. യുഎസ്ബി ടൈപ്പ്-സി പോർട്ടും സ്പീക്കർ ഗ്രില്ലുകളും താഴത്തെ വശങ്ങളിൽ കാണാം, അതേസമയം സിം ട്രേ സ്ലോട്ട് ഡിവൈസിൻറെ ഇടതുവശത്തായി സ്ഥിതി ചെയ്യുന്നു. പ്രൈസ്ബാബ റിപ്പോർട്ട് അനുസരിച്ച്, പിക്‌സൽ 5 ന് 5.7 മുതൽ 5.8 ഇഞ്ച് ഡിസ്പ്ലേയ് ലഭിച്ചേക്കാം.

128 ജിബി സ്റ്റോറേജുമായി പിക്‌സൽ 5 വരാമെന്ന് ടിപ്‌സ്റ്റർ റോളണ്ട് ക്വാണ്ട് പ്രത്യേകം എടുത്തുപറഞ്ഞു. ഇത്തവണ 64 ജിബി ബേസ് സ്റ്റോറേജ് മോഡൽ ഉണ്ടാകണമെന്നില്ലെന്ന് ക്വാണ്ട് പറയുന്നു. ഗൂഗിൾ പിക്‌സൽ 5 എയ്‌ക്കൊപ്പം പിക്‌സൽ 4 എ 5 ജിയും സെപ്റ്റംബർ 30 ന് വിപണിയിലെത്തുമെന്ന് അടുത്തിടെ വന്ന ഒരു റിപ്പോർട്ട് സൂചിപ്പിക്കുന്നു. സ്‌നാപ്ഡ്രാഗൺ 765 ജി പ്രോസസ്സർ പിക്‌സൽ 5ൽ പ്രവർത്തിക്കുന്നു.