അ‌തിവേഗ ചാർജിങ്ങിൽ മിടുമിടുക്കൻ! റിയൽമി ജിടി 3 സ്മാർട്ട്ഫോൺ പുറത്തിറങ്ങി

ബാറ്ററി ചാർജിങ്ങിൽ പുത്തൽ വേഗതയുടെ പാഠങ്ങൾ പകരാനുള്ള കരുത്തുമായി റിയൽമി ജിടി 3( Realme GT 3 ) സ്മാർട്ട്ഫോൺ ആഗോള തലത്തിൽ ലോഞ്ച് ചെയ്തു. ജിടി സീരീസിൽ എത്തുന്ന ഈ സ്മാർട്ട്ഫോണിന് നിലവിൽ അ‌ടുത്തിടെ വിപണിയിൽ എത്തിയ വൺപ്ലസ് 11 ആണ് എതിരാളിയായിട്ടുള്ളത്.

ലോകത്തിലെ ഏറ്റവും വലിയ ടെക് ഷോ ആയ മൊബൈൽ വേൾഡ് കോൺഗ്രസ് (MWC) 2023 ന്റെ വേദിയിൽ വച്ചായിരുന്നു റിയൽമി സൂപ്പർഫാസ്റ്റ് ചാർജിങ് സ്പീഡുള്ള തങ്ങളുടെ ഈ സ്മാർട്ട്ഫോൺ പുറത്തിറക്കിയത്. 240 വാട്ട് ഫാസ്റ്റ് ചാർജിങ് ആണ് ഈ സ്മാർട്ട്ഫോണിന്റെ ഏറ്റവും വലിയ പ്രത്യേകതയായി എടുത്തുകാണിക്കപ്പെടുന്നത്.

240 വാട്ട് ഫാസ്റ്റ് ചാർജിങ് സപ്പോർട്ടുള്ള ആദ്യ സ്മാർട്ട്ഫോണാണ് റിയൽമി ജിടി 3 എന്നും വെറും 9 മിനിറ്റുകൊണ്ട് 90 ശതമാനം ചാർജ് ചെയ്യാൻ ഈ 240W ചാർജറിന് നിസാരമായി സാധിക്കുമെന്നും റിയൽമി അ‌വകാശപ്പെടുന്നു. പരമാവധി വേഗത്തിൽ തങ്ങളുടെ സ്മാർട്ട്ഫോൺ ചാർജ് ആകണം എന്ന് ആഗ്രഹിക്കുന്നവരെയാണ് കമ്പനി ഇതിലൂടെ ലക്ഷ്യമിട്ടിരിക്കുന്നത്.

സ്മാർട്ട്ഫോൺ ചാർജിങ് സാങ്കേതികവിദ്യയിൽ തങ്ങൾക്കുള്ള മികവ് ജിടി 3യിലൂടെ റിയൽമി വ്യക്തമാക്കുന്നുണ്ട്. 2022-ൽ 150വാട്ട് ഫാസ്റ്റ് ചാർജിങ് ശേഷിയുള്ള ഫോൺ ആദ്യമായി പുറത്തിറക്കിയത് റിയൽമി ആയിരുന്നു. ഇപ്പോൾ 2023 ൽ 240 വാട്ട് ഫാസ്റ്റ് ചാർജിങ്ങ് ആദ്യമായി അ‌വതരിപ്പിച്ചുകൊണ്ട് റിയൽമി തങ്ങളുടെ കഴിവും കരുത്തും ഒരിക്കൽക്കൂടി അ‌ടിവരയിട്ട് ഉറപ്പിച്ചിരിക്കുന്നു.

ഫാസ്റ്റ് ചാർജിങ്ങിൽ മാത്രമല്ല, ഫാസ്റ്റ് പെർഫോമൻസിലും ഈ റിയൽമി സ്മാർട്ട്ഫോൺ മുന്നിട്ടുനിൽക്കും എന്നാണ് കമ്പനി പറയുന്നത്. സ്‌നാപ്ഡ്രാഗൺ 8+ ജെൻ 1 ചിപ്സെറ്റ് കരുത്തുമായാണ് റിയൽമി ജിടി 3 എത്തുന്നത്. എത്ര കഠിനമായ പ്രവർത്തനങ്ങളിൽ ഏ​ർപ്പെട്ടാലും താപനില നിലനിർത്താൻ സ്റ്റെയിൻലെസ് സ്റ്റീൽ വേപ്പർ കൂളിംഗ് സിസ്റ്റവും ഇതിൽ നൽകിയിരിക്കുന്നു.

144Hz-റിഫ്രഷ് റേറ്റുള്ള 6.74 ഇഞ്ച് സ്‌ക്രീൻ ആണ് ജിടി 3യിൽ നൽകിയിരിക്കുന്നത്. 40Hz, 45Hz, 60Hz, 72Hz, 90Hz, 120Hz, 144Hz എന്നീ റിഫ്രഷ് റേറ്റുകൾക്കിടയിൽ ഓട്ടോമാറ്റിക് ആയി പ്രവർത്തിക്കാൻ ഈ സ്മാർട്ട്ഫോണിൽ സംവിധാനമുണ്ട് എന്ന് കമ്പനി അവകാശപ്പെടുന്നു. 1,400 nits പീക് ​​ബ്രൈറ്റ്നസും 2772 x 1240 പിക്സൽ (1.5K) റെസല്യൂഷനും ഇതിലുണ്ട്.

റിയൽമി ജിടി 3യുടെ ക്യാമറ വിഭാഗവും മോശമല്ലാത്ത പ്രകടനം കാഴ്ചവയ്ക്കാൻ കരുത്തുള്ളതാണ്. ഒഐഎസ് പിന്തുണയോടെയുള്ള 50എംപി പ്രൈമറി ക്യാമറ നയിക്കുന്ന ട്രിപ്പിൾ ക്യാമറ സജ്ജീകരണമാണ് ഈ സ്മാർട്ട്ഫോണിലുള്ളത്. 2എംപി മൈക്രോസ്കോപ്പ് ലെൻസും 8എംപി അൾട്രാ വൈഡ് ആംഗിൾ ലെൻസുമാണ് പ്രധാന ക്യാമറയോടൊപ്പം എത്തുന്നത്. ഗംഭീര സെൽഫികൾക്കും വീഡിയോ കോളിങ്ങിനുമായി 16എംപി ഫ്രണ്ട് ക്യാമറയുമുണ്ട്.

4600എംഎഎച്ച് ബാറ്ററി ആണ് ഈ സ്മാർട്ട്ഫോണിൽ നൽകിയിരിക്കുന്നത്. എക്സ്-ആക്സിസ് ലീനിയർ മോട്ടോറിനുള്ള പിന്തുണ, ഡോൾബി അറ്റ്‌മോസുള്ള ഡ്യുവൽ സ്റ്റീരിയോ സ്പീക്കറുകൾ, ഇൻ-ഡിസ്‌പ്ലേ ഫിംഗർപ്രിന്റ് സ്കാനർ എന്നിവയാണ് മറ്റ് സവിശേഷതകൾ. ബാറ്ററി ലെവൽ, ഇൻകമിംഗ് കോളുകൾ, അറിയിപ്പുകൾ, ക്യാമറ കൗണ്ട്ഡൗൺ എന്നിവ സൂചിപ്പിക്കുന്ന കസ്റ്റമൈസ് ചെയ്യാവുന്ന ലൈറ്റ് റിംഗ് സഹിതമാണ് ജിടി 3 എത്തുന്നത്.

ഇപ്പോൾ ആഗോള തലത്തിൽ ലോഞ്ച് ചെയ്യപ്പെട്ട റിയൽമി ജിടി 3 അ‌ധികം ​വൈകാതെ ഇന്ത്യയിലും എത്തും. ലോഞ്ചിങ് സ്ഥിരീകരിച്ചിട്ടുണ്ട് എങ്കിലും കൃത്യമായ തീയതിയും ഇന്ത്യയിലെ വിലയും കമ്പനി ഇതുവരെ വ്യക്തമാക്കിയിട്ടില്ല. എങ്കിലും അ‌തിവേഗ ചാർജിങ്ങിൽ മിന്നുന്ന പ്രകടനവുമായി എത്തുന്ന ജിടി 3 യെ വരവേൽക്കാൻ റിയൽമിയുടെ ഇന്ത്യയിലെ ആരാധകർ ആവേശത്തോടെ കാത്തിരിക്കുകയാണ്.