5 സ്റ്റോറേജ് വേരിയന്റുകൾ, 50 എംപി ക്യാമറ, 33 വാട്ട് ഫാസ്റ്റ് ചാർജിങ്; എന്തിനും റെഡിയായി റിയൽമി 10

ഉടൻ എത്തുമെന്ന് ഏറെ നാളായി ആരാധകർ കാത്തിരുന്ന റിയൽമി 10 ആണ് ഇപ്പോൾ കമ്പനി ​ആഗോള തലത്തിൽ പുറത്തിറക്കിയിരിക്കുന്നത്. അ‌ധികം താമസിയാതെ തന്നെ റിയൽമി 10 പ്രോ മോഡലുകളും പ്രതീക്ഷിക്കാം എന്നാണ് കമ്പനി തന്നെ വെളിപ്പെടുത്തുന്നത്. നവംബർ 17 ന് ആകും ഈ പ്രോ മോഡലുകളുടെ ലോഞ്ചിങ്. 50 എംപി ക്യാമറ, 33 വാട്ട് ഫാസ്റ്റ് ചാർജിങ് എന്നിങ്ങനെ ഒരുപിടി മികച്ച ഫീച്ചറുകളുമായാണ് റിയൽമി 10 എത്തുന്നത്.

അ‌ഞ്ച് സ്റ്റോറേജ് വേരിയന്റുകളിൽ ലഭ്യമാകും എന്നതാണ് ഈ റിയൽമി ഫോണിന്റെ മറ്റൊരു പ്രത്യേകത. രണ്ടുമാസം മുൻപ് ഇന്ത്യയിൽ പുറത്തിറങ്ങിയ റിയൽമി 9ഐ 5ജി യുടേതിനു സമാനമായ യൂണിബോഡി ഡി​സൈൻ ആണ് റിയൽമി 10 ന് ഉള്ളത്. മീഡിയടെക് ഹീലിയോ ജി99 എസ്ഒസി ചിപ്സെറ്റ് ആണ് ചുറുചുറുക്കോടെയുള്ള പ്രവർത്തനത്തിനായി ഈ സ്മാർട്ട്ഫോണിൽ നൽകിയിരിക്കുന്നത്. 6.4 ഇഞ്ചിന്റെ അ‌മോലെഡ് ഡിസ്പ്ലെ, 4 ജിബി മുതൽ 8 ജിബി വരെ വേരിയന്റുകളിൽ റാം 256 ജിബിവരെ ഇന്റേണൽ സ്റ്റോറേജ് എന്നിവയാണ് എടുത്തുപറയേണ്ട മറ്റ് പ്രധാന ഫീച്ചറുകൾ.

ക്യാമറ വിഭാഗത്തിലേക്കു വന്നാൽ, മൂന്ന് സെൻസറുകൾ ആണ് സാധാരണയായി ഇപ്പോൾ ഫോണിന്റെ പിൻവശത്ത് നൽകിവരുന്നത് എങ്കിൽ റിയൽമി ആ ശീലം തെറ്റിച്ചിട്ടുണ്ട്. ഡ്യുവൽ ക്യാമറ സജ്ജീകരണമാണ് റിയൽമി 10 ന് ഉള്ളത്. 50 മെഗാപിക്സൽ പ്രധാന ക്യാമറയും 2 മെഗാപിക്സൽ ഡെപ്ത് സെൻസറും ആണ് അ‌വ. സെൽഫികൾക്കും വീഡിയോ കോളുകൾക്കുമായി മുൻവശത്ത് 16 മെഗാപിക്സൽ സ്നാപ്പർ നൽകിയിട്ടുണ്ട്.

റിയൽമി 10 വില

കറുപ്പും വെളുപ്പും നിറങ്ങളിൽ ലഭ്യമാകുന്ന റിയൽമി 10, സ്റ്റോറേജ് അ‌നുസരിച്ച് അ‌ഞ്ച് വേരിയന്റുകളിൽ ലഭ്യമാണ്. അ‌വയുടെ വില നോക്കാം:

ഠ 4 ജിബി റാം + 64 ജിബി ഇന്റേണൽ സ്റ്റോറേജ്: $ 229 ( ഏകദേശം 18,700 രൂപ )
ഠ 4 ജിബി റാം + 128 ജിബി ഇന്റേണൽ സ്റ്റോറേജ്: $ 249 ( ഏകദേശം 20,300 രൂപ )
ഠ 6 ജിബി റാം + 128 ജിബി ഇന്റേണൽ സ്റ്റോറേജ്: $ 269 ( ഏകദേശം 21,900 രൂപ )
ഠ 8 ജിബി റാം + 128 ജിബി ഇന്റേണൽ സ്റ്റോറേജ്: $ 279 ( ഏകദേശം 22,800 രൂപ )
ഠ 8 ജിബി റാം + 256 ജിബി ഇന്റേണൽ സ്റ്റോറേജ്: $ 299 ( ഏകദേശം 24,400 രൂപ ).

റിയൽമി 10 -ന്റെ മറ്റ് സ്പെസിഫിക്കേഷനുകൾ

2400 x 1080 പിക്സൽ റെസല്യൂഷനും 90ഹെർട്സ് റിഫ്രഷ് റേറ്റും ഉള്ള സാമാന്യം വലിയ 6.4 ഇഞ്ച് ഫുൾ-എച്ച്ഡി+ അമോലെഡ് ഡിസ്പ്ലേയുമായാണ് റിയൽമി 10 വരുന്നത്. മുൻ പാനലിന് മുകളിൽ ഇടത് കോണിൽ ഒരു പഞ്ച് ഹോളും ഉണ്ട്, അതിൽ സെൽഫി ക്യാമറ സെൻസർ നൽകിയിരിക്കുന്നു. റാം ശേഷി വർദ്ധിപ്പിക്കുന്നതിനുള്ള വെർച്വൽ റാം സാങ്കേതികവിദ്യയും റിയൽമി 10 -ൽ സജ്ജീകരിച്ചിട്ടുണ്ട്.

ആൻഡ്രോയിഡ് 12 അടിസ്ഥാനമാക്കിയുള്ള റിയൽമി യുഐ 3.0-ലാണ് പ്രവർത്തനം. 4G, ഡ്യുവൽ-ബാൻഡ് വൈ-ഫൈ, ബ്ലൂടൂത്ത്, ജിപിഎസ്, യുഎസ്ബി ടൈപ്പ്-സി പോർട്ട് എന്നിവയാണ് കണക്ടിവിറ്റി ഓപ്ഷനുകളായി നൽകിയിരിക്കുന്നത്. 33വാട്ട് ഫാസ്റ്റ് വയർഡ് ചാർജിങ് സപ്പോർട്ടുള്ള 5000 എംഎഎച്ചിന്റേതാണ് ബാറ്ററി. സുരക്ഷയ്ക്കായി സൈഡ് മൗണ്ടഡ് ഫിംഗർപ്രിന്റ് സെൻസർ ആണ് നൽകിയിരിക്കുന്നത്.