ഐഫോൺ 13 ന്റെ ഉടമയാകാൻ ​തയാറാണോ? എന്നാൽ 49,900 രൂപയുമായി വേഗം ബിഗ് ബില്യൺ ഡേയ്ക്ക് വിട്ടോ...

പ്രമുഖ സ്മാർട്ട്ഫോൺ നിർമാതാക്കളെല്ലാം ഈ ഉത്സവദിനങ്ങളിൽ ബിഗ് ബില്യൺ ഡേയിൽ ഓഫറുകൾ പ്രഖ്യാപിച്ച് കച്ചവടം ഉഷാറാക്കാൻ രംഗത്തെത്തിക്കൊണ്ടിരിക്കുകയാണ്. ഈ നിരയിലേക്ക് ഇപ്പോൾ ഒരു ആഗോള ബ്രാൻഡ് മികച്ച ഓഫറിൽ വന്നതും ആ ഓഫറുമാണ് ഇപ്പോൾ ഉപഭോക്താക്കളെ രോമാഞ്ചം കൊള്ളിക്കുന്നത്. ബ്രാൻഡ് ഏതാണെന്നല്ലേ? ഇപ്പോൾ എല്ലായിടത്തും ചർച്ചയായ ആപ്പിളിന്റെ ഐഫോൺ ആണ് ആ സൂപ്പർതാരം.

എന്നാൽ ഐഫോൺ എന്നു കേട്ട് ഏറ്റവും പുതിയ 14 ആണെന്ന് ആവേശം കൊള്ളരുത്. തൽക്കാലം നമ്മൾ പറഞ്ഞു വരുന്നത് ഐഫോൺ 13 നെപ്പറ്റി ആണ്. 13 എന്നു കേട്ട് ചിലർ ചിലപ്പോൾ നെറ്റി ചുളിച്ചേക്കും. അ‌യ്യേ 13 ആയിരുന്നോ. പഴയതല്ലേ എന്നൊക്കെ. എന്നാൽ ഐഫോണുകളെപ്പറ്റി അ‌റിയാവുന്നവർ ചിലപ്പോൾ അ‌ങ്ങനെ പുച്ഛിക്കില്ല. പ്രത്യേകിച്ച് ഐഫോണിന് നൽകിയിരിക്കുന്ന ഓഫർ കൂടി കേൾക്കുമ്പോൾ തീ​രെ പുച്ഛിക്കാൻ സാധിക്കില്ല.

കാരണം 49,900 രൂപയാണ് ബിഗ് ബില്യൺ ഡേയിൽ ഐഫോൺ 13 ന് ഓഫർ വിലയായി തീരുമാനിച്ചിരിക്കുന്നത് എന്നാണ് പുറത്തുവരുന്ന വിവരം. ഐഫോൺ 13 ഇന്ത്യയിൽ ഇതുവരെ വിറ്റതിൽ ഏറ്റവും വലിയ വിലക്കുറവാണ് ഇത്. ഒരു ഐഫോൺ വാങ്ങണം എന്ന് നാളുകളായി കരുതിപ്പോരുന്ന ചിലർ കാണും. വിലയാണ് അ‌വരുടെ ആഗ്രഹത്തിന് തടസമായിരുന്നതെങ്കിൽ ഇത് അ‌ത്തരം ആളുകൾക്കുള്ള ഒരു സുവർണാവസരമാണ് എന്നാണ് പൊതുവിൽ വിലയിരുത്തപ്പെടുന്നത്.

കുറഞ്ഞ വിലയ്ക്ക് അ‌ത്ര മോശമല്ലാത്ത ഒരു ഐ​ഫോൺ മോഡൽ, അ‌തും ഐഫോണിന്റെ പുത്തൻ മോഡലായ 14 ൽ നിന്ന് അ‌ധികം വ്യത്യാസങ്ങളൊന്നും ഇല്ലാത്ത ഒരു മോഡൽ സ്വന്തമാക്കാനുള്ള അ‌വസരത്തെ സുവർണാവസരം എന്നു പറയുന്നതിൽ തെറ്റില്ലല്ലോ അ‌ല്ലേ!. ഈ ഓഫറിൽ വാങ്ങണോ എന്നത് താൽപര്യവും സാഹചര്യവും അ‌നുസരിച്ച് ഓരോരുത്തരും സ്വയം തീരുമാനം എടുക്കേണ്ട കാര്യമാണ്. സെപ്റ്റംബർ 23 മുതൽ 30 വരെയാണ് ബിഗ് ബില്യൺ ഡേ സെയിൽ നടക്കുന്നത്.

കഴിഞ്ഞ വർഷം ആണ് ഐഫോൺ 13 വിപണിയിലെത്തിയത്. ഇറങ്ങിയിട്ട് ഒരു വർഷമായതു കൊണ്ട് പഴഫോൺ ആണ് എന്നു കരുതേണ്ട ആവശ്യം ഐഫോണിന്റെ കാര്യത്തിൽ ഇല്ല എന്നറിയാമല്ലോ. ''ഐഫോണിന്റെ മൊഞ്ചൊന്നും അ‌ത്ര പെട്ടെന്ന് പൊയ്പ്പോവൂല്ല സാറേ'' എന്ന് വേണമെങ്കിൽ പറയാം. എന്നാലും ഐഫോണിന്റെ 14 സീരീസ് ഇറങ്ങിയതോ​ടെ 13 ന്റെ വില സ്വാഭാവികമായും അ‌ൽപ്പം കുറയും എന്ന് ചിലർ ഇതിനകം ഊഹിച്ചിരിക്കും. എന്നാൽ ഊഹത്തിനും അ‌പ്പുറത്തുള്ള ഓഫർ വിലയാണ് ഇപ്പോൾ ലഭ്യമായിരിക്കുന്നത് എന്നാണ് ഐഫോൺ ആരാധകർ പറയുന്നത്.

ആപ്പിളിന്റെ ഇന്ത്യയിലെ വെബ്​സൈറ്റിൽ ഐഫോൺ 13 ന്റെ 128 ജിബി ഇന്റേണൽ സ്റ്റോറജുള്ള വേരിയന്റ് 10, 000 രൂപ വിലക്കുറ​വോടെ 69,900 രൂപയ്ക്കാണ് ലിസ്റ്റ് ചെയ്തിരിക്കുന്നത്. ഈ സാഹചര്യം നിലനിൽക്കെയാണ് ബിഗ് ബില്യൺ ഡേയിൽ ഫ്ലിപ്കാർട്ടിലൂടെ 49,900 രൂപയ്ക്ക് ഐഫോൺ 13 ലഭ്യമായിരിക്കുന്നത്.

60ഹെർട്സ് 6.1 ഇഞ്ച് ഒഎൽഇഡി ഡിസ്പ്ലെ, ഫേസ് ​ഐഡി സെൻസറോടുകൂടിയ 12 എംപി ഫ്രണ്ട് ക്യാമറ, ആപ്പിൾ എ15 ബയോണിക് ചിപ്, പിന്നിൽ 12 എംപി ഡ്യൂവൽ ക്യാമറ എന്നിങ്ങനെ എല്ലാ കിടിലൻ ഫീച്ചറുകളും ഐഫോൺ 13 ൽ ഉണ്ട്. 12 മെഗാപിക്സൽ ഡ്യുവൽ ക്യാമറ സജ്ജീകരണമുള്ള ഫോണിൽ സിനിമാറ്റിക് മോഡ് ഉൾപ്പെടെ ലഭ്യമാകും. അ‌തിനാൽത്തന്നെ ഐഫോൺ 14 നൊപ്പം പിടിച്ചു നിൽക്കാൻ കെൽപ്പുള്ള ഐറ്റമാണ് ഐഫോൺ 13 എന്ന് പറയാം.

അ‌ഡീഷണൽ ജിപിയു(GPU), അ‌ൽപ്പം വലിയ ബാറ്ററി, ഓട്ടോ ഫോക്കസോടു കൂടിയ വലിയൊരു ക്യാമറ സെൻസർ, എന്നിങ്ങനെ എതാനും ഘടകങ്ങൾ പുതിയ മോഡലിൽ ഉണ്ട് എന്നതാണ് ഇരു മോഡലുകളും തമ്മിലുള്ള ചെറിയ വ്യത്യാസങ്ങൾ. ഐഫോൺ 14 വാങ്ങണമെങ്കിൽ ഇന്ത്യയിൽ 79,900 രൂപ മുടക്കണം എന്നതും ഈ ഘട്ടത്തിൽ ഓർക്കാവുന്നതാണ്.

ഐഫോൺ 13 വാങ്ങുന്നത് ആകർഷകമാക്കാൻ മറ്റൊരു വമ്പൻ ഓഫർകൂടി ഫ്ലിപ്കാർട്ട് മുന്നോട്ടു വയ്ക്കുന്നുണ്ട്. നിങ്ങളുടെ പഴയ സ്മാർട്ട്ഫോൺ നൽകുന്നതിലൂടെ 19,000 രൂപ വരെ ഇളവ് ​ലഭിക്കും എന്നതാണ് ആ ഓഫർ. എന്നാൽ ഈ ഘട്ടത്തിൽ ഓർക്കേണ്ട ഒരു കാര്യം നിങ്ങൾ നൽകുന്ന പഴയ ഫോണിന്റെ കണ്ടീഷനും വാല്യുവും കണക്കാക്കിയാകും എത്ര രൂപ എക്സ്ചേഞ്ച് ഇനത്തിൽ കുറയ്ക്കും എന്നത് തീരുമാനിക്കുക എന്നതാണ്.