ഉത്സവപ്പറമ്പുകൾ ഭരിച്ച കിരീടമില്ലാത്ത രാജാവ്! ബാർബി സ്പെഷൽ റെട്രോ ഫ്ലിപ്പ് ഫോണുമായി എച്ച്എംഡി

മൊ​ബൈൽ ഫോൺ ഇറങ്ങിത്തുടങ്ങിയ കാലഘട്ടത്തിൽ ഉത്സവപ്പറമ്പുകൾ അ‌ടക്കി ഭരിച്ച ഐറ്റമായിരുന്നു ചല് ചയ്യ.. ചയ്യ.. ചയ്യാ ചയ്യാ... എന്ന പാട്ടോടുകൂടി ലഭ്യമായിരുന്ന കളിപ്പാട്ട മൊ​ബൈൽ. ഇപ്പോൾ ആ മൊ​ബൈലിനെ അ‌നുസ്മരിപ്പിക്കും വിധത്തിൽ പുത്തൻ ഭാവത്തിൽ കുട്ടികളുടെ പ്രിയപ്പെട്ട ബാർബി പാവക്കുട്ടിയുടെ പേരിൽ, പിങ്ക് കളർ സഹിതം അ‌ണിയിച്ചൊരുക്കി വിപണിയിൽ എത്തിച്ചിരിക്കുകയാണ് പ്രമുഖ സ്മാർട്ട്ഫോൺ ബ്രാൻഡായ എച്ച്എംഡി. നോക്കിയ ബ്രാൻഡഡ് സ്മാർട്ട്ഫോണുകൾ പുറത്തിറക്കിയിരുന്ന എച്ച്എംഡി ഈ വർഷം മുതൽ സ്വന്തം ബ്രാൻഡിലും മൊ​ബൈൽ പുറത്തിറക്കാൻ തുടങ്ങിയിരുന്നു. അ‌ത്തരത്തിൽ എച്ച്എംഡി ഇപ്പോൾ പുറത്തിറക്കിയിരിക്കുന്ന പുത്തൻ ഫീച്ചർ മൊ​ബൈലാണ് എച്ച്എംഡി ബാർബി ഫോൺ.

സ്മാർട്ട്ഫോണുകൾ ആളുകളുടെ സമയം അ‌നാവശ്യമായി നഷ്ടപ്പെടുത്താറുണ്ട്. സാമൂഹികമാധ്യമങ്ങളിലും മറ്റും മണിക്കൂറുകളോളം ചെലവഴിക്കാൻ സ്മാർട്ട്ഫോണുകൾ ആളുകളെ പ്രേരിപ്പിക്കുന്നു. എന്നാൽ എല്ലാ തിരക്കുകളിൽ നിന്നും ഒഴിഞ്ഞ് സ്വസ്ഥമായിരിക്കാൻ ആഗ്രഹിക്കുന്നവർക്ക് ഈ പുതിയ ബാർബി ഫോൺ മികച്ച ഓപ്ഷനായിരിക്കും എന്നാണ് എച്ച്എംഡി ഗ്ലോബൽ പറയുന്നത്. ബാർബി എന്ന കളിപ്പാവയുടെ പേരിൽ എത്തുന്ന ഈ ഫോൺ ശരിക്കും ഒരു കളിപ്പാട്ടം പോലെയാണ് തോന്നുക.

ബാർബി ഡോളിനെ അ‌നുസ്മരിപ്പിക്കും വിധത്തിൽ പിങ്ക് കളറിലാണ് എച്ച്എംഡി ബാർബി ഫോൺ എത്തുന്നത്. പണ്ടുകാലത്തെ ഫ്ലിപ്പ് സ്മാർട്ട്ഫോണുകളെ അ‌നുസ്മരിപ്പിക്കും വിധത്തിൽ ഫ്ലിപ്പ് ഡി​സൈനാണ് ഇതിന് നൽകിയിരിക്കുന്നത്. ഇതിന്റെ പുറത്ത് ഫ്രണ്ടിലായി മിറർ പോലെ ഉപയോഗിക്കാവുന്ന ഒരു സ്ക്രീനുണ്ട്. മാറ്റി മാറ്റി ഉപയോഗിക്കാവുന്ന രണ്ട് കവറുകളും ഈ ഫോണിനൊപ്പം എത്തുന്നു.

എച്ച്എംഡി ബാർബി ഫോണിനൊപ്പം പൂക്കൾ, അരയന്നങ്ങൾ, മഴവില്ലുകൾ എന്നിവയുൾപ്പെടെയുള്ള മനോഹരമായ റെട്രോ ബാർബി സ്റ്റിക്കറുകളും തിളങ്ങുന്ന സ്റ്റിക്ക്-ഓൺ ക്രിസ്റ്റലുകളുടെ സെറ്റും ലഭിക്കും. 1959 ലെ ചിക് സൺഗ്ലാസുകളുടെ മിനി ജോടി മുതൽ മാലിബു റോളർ സ്കേറ്റ്, ഈന്തപ്പന, 'ബി' എന്ന ബ്രാൻഡ് ഉള്ള ഹൃദയം, ഐസ്‌ക്രീം എന്നിവയുടെ മിനി രൂപങ്ങളും അ‌ലങ്കാരത്തിനായി ഇതോടൊപ്പം ലഭിക്കും.

കൂടാതെ ഈ ഫോണിൽ *#227243# അമർത്തി BARBIE എന്ന് ടൈപ്പ് ചെയ്യുമ്പോൾ നിങ്ങൾക്ക് ബാർബി വാൾപേപ്പറുകളും *#ken# അല്ലെങ്കിൽ *#536#, ഫോർമാറ്റിൽ കെന്നിൽ നിന്നുള്ള ആശംസകളും *#malibu# എന്ന് ഡയൽ ചെയ്താൽ മാലിബു ബീച്ച് സൗണ്ടും ലഭിക്കും. ഇത്തരത്തിൽ കൗതുകകരമായ ഒട്ടേറെ സംഗതികൾ ഈ റെട്രോ ഫ്ലിപ്പ് ഫോൺ അ‌വതരിപ്പിക്കുന്നുണ്ട്.

എച്ച്എംഡി ബാർബി ഫോണിന്റെ (HMD Barbie Phone) പ്രധാന ഫീച്ചറുകൾ: 2.8 ഇഞ്ച് QVGA ഇന്റേണൽ സ്‌ക്രീൻ, 1.77 ഇഞ്ച് എക്സ്റ്റേണൽ സ്‌ക്രീൻ, യൂണിസോക് T107 പ്രൊസസർ, 64 എംബി റാം, 128 എംബി ഇൻ്റേണൽ സ്റ്റോറേജ്, മൈക്രോ എസ്ഡി ഉപയോഗിച്ച് 32 ജിബി വരെ സ്റ്റോറേജ് വികസിപ്പിക്കാനുള്ള സൗകര്യം എന്നിവ ഇതിലുണ്ട്.

S30+ ഒഎസിൽ ആണ് പ്രവർത്തനം. ഡ്യുവൽ സിം, എൽഇഡി ഫ്ലാഷോടുകൂടിയ റിയർ വിജിഎ, 3.5mm ഹെഡ്‌ഫോൺ ജാക്ക്, MP3 പ്ലെയർ, FM റേഡിയോ (വയർഡ്/വയർലെസ്), ബ്ലൂടൂത്ത് 5.0, യുഎസ്ബി ടൈപ്പ്-സി എന്നിവയും GSM/GPRS 900/1800, WCDMA, LTE Cat1 നെറ്റ്വർക്ക് പിന്തുണയും ഈ ഫീച്ചർ ഫോണിലുണ്ട്.

108.4×55.1×18.9mm വലിപ്പവും 123.5 ഗ്രാം ഭാരവുമാണ് എച്ച്എംഡി ബാർബി ഫോണിനുള്ളത്. 9h വരെ ടോക്ക് ​ടൈം ലഭിക്കുന്ന 1450mAh റിമൂവബിൾ ബാറ്ററിയും ഇതിലുണ്ട്. HMD ബാർബി ഫോണിന് യുകെയിൽ 99 പൗണ്ടും (ഏകദേശം 11,008 രൂപ) യൂറോപ്പിൽ 129 യൂറോയും (ഏകദേശം 12,085 രൂപ) ആണ് വില, ഓഗസ്റ്റ് 28 മുതൽ ഈ ഫോൺ വാങ്ങാൻ ലഭ്യമാണ്.