6000mAh ബാറ്ററി, ഇൻഡസ് AI കരുത്ത്! 15,000 രൂപയിൽ താഴെ എച്ച്‌എംഡി വൈബ് 2 പ്രോ 5ജി വിപണിയിൽ

എച്ച്‌എംഡി (HMD) തങ്ങളുടെ പുതിയ വൈബ് 2 പ്രോ 5ജി (Vibe 2 Pro 5G) സ്മാർട്ട്‌ഫോൺ ഇന്ത്യയിൽ അവതരിപ്പിച്ചു. 6ജിബി/128ജിബി വേരിയന്റിന് 15,999 രൂപയും 8ജിബി/128ജിബി മോഡലിന് 17,999 രൂപയുമാണ് വില. ഫ്ലിപ്പ്കാർട്ട് ബിഗ് ബില്യൺ ഡേയ്‌സിന്റെ ഭാഗമായി ഒക്‌ടോബർ 8 മുതൽ ഏർലി ആക്‌സസ് സെയിൽ ആരംഭിക്കും. ഓഫർ നിരക്കിൽ യഥാക്രമം 14,999 രൂപയ്ക്കും 16,999 രൂപയ്ക്കും ഫോൺ സ്വന്തമാക്കാം. 64MP സോണി സെൻസർ, 6,000mAh കൂറ്റൻ ബാറ്ററി, ഇന്ത്യൻ ഉപഭോക്താക്കൾക്കായി പ്രത്യേകം സജ്ജമാക്കിയ 'ഇൻഡസ് AI' എന്നിവയാണ് ഈ ഫോണിന്റെ പ്രധാന സവിശേഷതകൾ.

മീഡിയാടെക് ഡൈമൻസിറ്റി 6300 പ്രൊസസറിൽ പ്രവർത്തിക്കുന്ന ഈ ഫോൺ ആൻഡ്രോയിഡ് 16 അധിഷ്‌ഠിതമായാണ് എത്തുന്നത്. 6.78 ഇഞ്ച് ഫുൾ എച്ച്ഡി പ്ലസ് 120Hz എൽസിഡി ഡിസ്‌പ്ലേ, 64MP സോണി പ്രൈമറി ക്യാമറ, 13MP സെൽഫി ക്യാമറ എന്നിവ ഇതിലുണ്ട്. 33W ഫാസ്റ്റ് ചാർജിംഗ് പിന്തുണയുള്ള 6,000mAh ബാറ്ററിയാണ് ഫോണിന്റെ കരുത്ത്. 33W അഡാപ്റ്റർ, ടൈപ്പ്-സി കേബിൾ, പ്രൊട്ടക്റ്റീവ് കേസ് എന്നിവ ബോക്സിനൊപ്പം ലഭിക്കും. അക്വാ ഗ്രീൻ, കോസ്മിക് പർപ്പിൾ, സിൽവർ മിസ്റ്റ് എന്നീ ആകർഷകമായ നിറങ്ങളിലാണ് ഫോൺ ലഭ്യമാകുക.

എച്ച്‌എംഡി വൈബ് 2 പ്രോ 5ജി: വിലയും ഫ്ലിപ്പ്കാർട്ട് വിൽപ്പനയും

ഫ്ലിപ്പ്കാർട്ടിൽ ഒക്ടോബർ 8-ന് ഏർലി ആക്‌സസ് വിൽപ്പനയും ഒക്ടോബർ 9 മുതൽ പൊതുവിൽപ്പനയും ആരംഭിക്കും. ബാങ്ക് ഓഫറുകൾ ഉൾപ്പെടെ 6ജിബി മോഡൽ 14,999 രൂപയ്ക്കും 8ജിബി മോഡൽ 16,999 രൂപയ്ക്കും വാങ്ങാം. ആക്‌സിസ്, ഐസിഐസിഐ കാർഡുകൾക്ക് 10 ശതമാനം വരെ തൽക്ഷണ ഡിസ്‌കൗണ്ടും നോ-കോസ്റ്റ് ഇഎംഐ സൗകര്യവും ലഭിക്കും.

എച്ച്‌എംഡി വൈബ് 2 പ്രോ 5ജി: മികച്ച ഫീച്ചറുകൾ

'സർവം' വികസിപ്പിച്ചെടുത്ത 'ഇൻഡസ് AI' സിസ്റ്റത്തിൽ ഇൻ-ബിൽറ്റായി നൽകിയിട്ടുണ്ട്. 22 ഇന്ത്യൻ ഭാഷകളും മിശ്രഭാഷാ പ്രയോഗങ്ങളും ഇതിൽ പിന്തുണയ്ക്കും. ഫോൺ സുരക്ഷയ്ക്കായി കേന്ദ്ര ടെലികോം വകുപ്പിന്റെ 'സഞ്ചാർ സാഥി' ആപ്പും ഇതിൽ ഉൾപ്പെടുത്തിയിട്ടുണ്ട്. ഉപഭോക്താക്കൾക്ക് സ്വന്തം ഭാഷയിൽ വോയ്‌സ് അസിസ്റ്റന്റ് സേവനങ്ങളും, ഫോൺ മോഷ്ടിക്കപ്പെടുകയോ നഷ്ടപ്പെടുകയോ ചെയ്താൽ ബ്ലോക്ക് ചെയ്യാനുള്ള സൗകര്യവും ഇതിലൂടെ ലഭിക്കും.

രണ്ട് വർഷത്തെ സെക്യൂരിറ്റി അപ്‌ഡേറ്റുകളാണ് കമ്പനി വാഗ്ദാനം ചെയ്യുന്നത്; എന്നാൽ പ്രധാന ആൻഡ്രോയിഡ് അപ്‌ഗ്രേഡുകളെ കുറിച്ച് സൂചനയില്ല. n1, n3, n5, n8, n28, n40, n77, n78 എന്നീ പ്രധാന ഇന്ത്യൻ 5ജി ബാൻഡുകളെ ഫോൺ പിന്തുണയ്ക്കുന്നുണ്ട്. ഇൻ-ബോക്‌സ് ചാർജർ, വലിയ ബാറ്ററി, പ്രാദേശിക ഭാഷാ പിന്തുണ എന്നിവയൊക്കെയായി 20,000 രൂപയിൽ താഴെ വിലയിൽ മികച്ചൊരു 5ജി ഫോൺ തിരയുന്നവർക്ക് പറ്റിയ ഫോണാണ് വൈബ് 2 പ്രോ.