വീണ്ടും അ‌തിശയിപ്പിക്കാൻ ഹോണർ! 23 ന് ലോഞ്ച് നടക്കാനിരിക്കെ 100 സീരീസിന്റെ വിവരങ്ങൾ പുറത്ത്

താരത​മ്യേന കുറഞ്ഞ വിലയിൽ പ്രീമിയം സ്മാർട്ട്ഫോണുകളിലെ ഫീച്ചറുകൾ അ‌ടങ്ങുന്ന സ്മാർട്ട്ഫോണുകൾ അ‌വതരിപ്പിച്ചിട്ടുള്ള ബ്രാൻഡാണ് ഹോണർ (Honor). അ‌ടുത്തിടെ ഹോണർ ഇന്ത്യയിൽ പുറത്തിറക്കിയ ഹോണർ 90 5ജി ഏറെ ശ്രദ്ധ നേടിയിരുന്നു. ഇപ്പോൾ ഹോണർ തങ്ങളുടെ ഏറ്റവും പുതിയ സ്മാർട്ട്ഫോൺ സീരീസ് പുറ​ത്തിറക്കാനുള്ള തയാറെടുപ്പിലാണ്.

ഹോണർ 100(Honor 100), ഹോണർ 100 പ്രോ(Honor 100 Pro) എന്നിങ്ങനെ രണ്ട് സ്മാർട്ട്ഫോണുകൾ അ‌ടങ്ങുന്ന ഹോണർ 100 സീരീസ് ഈ മാസം 23ന് ​ചൈനയിൽ കമ്പനി ലോഞ്ച് ചെയ്യും. ഉടൻ വിപണിയിലേക്ക് എത്താൻ പോകുന്ന ഈ ഫോണുകളുടെ ഡി​സൈൻ അ‌ടക്കമുള്ള വിവരങ്ങൾ ഇതിനകം പുറത്തുവന്നിട്ടുണ്ട്.

ലോഞ്ചിനൊരുങ്ങുന്ന ഹോണർ 100 സീരീസ് ഇപ്പോൾ ഗീക്ക്ബെഞ്ചിൽ കണ്ടതായി 91 മൊ​ബൈൽസ് റിപ്പോർട്ട് ചെയ്യുന്നു. 'HONOR MAA-AN00' എന്ന രഹസ്യനാമത്തിൽ ആണ് ഗീക്ക്ബെഞ്ചിൽ ഹോണർ 100 കണ്ടെത്തിയത് എന്ന് റിപ്പോർട്ടിൽ പറയുന്നു. കൂടാതെ സ്‌മാർട്ട്‌ഫോണിന്റെ ചിപ്‌സെറ്റിന് 'ക്രോ' SM7550 എന്ന കോഡ് നാമം നൽകിയിരിക്കുന്നു, ഇത് സ്‌നാപ്ഡ്രാഗൺ 7 ജെൻ 3 ചിപ്പ് ആണ്.

2.63 ജിഗാഹെർട്‌സിന്റെ ഏറ്റവും ഉയർന്ന സിപിയു വേഗതയുള്ള ഒക്ടാ-കോർ ചിപ്‌സെറ്റാണിത്. ഹോണർ 100 സിംഗിൾ കോർ ടെസ്റ്റിൽ 1139 പോയിന്റും മൾട്ടി കോർ ടെസ്റ്റിൽ 3375 പോയിന്റും നേടിയതായും 16 ജിബി റാമും ആൻഡ്രോയിഡ് 13 സഹിതമാകും ഈ ഫോൺ എത്തുകയെന്നും 91 മൊ​ബൈൽസ് പറയുന്നു.

ഗീക്ക്ബെഞ്ചിൽ കണ്ട വിവരങ്ങൾ പ്രകാരം ഹോണർ 100 സീരീസ് പ്രീമിയം മിഡ് റേഞ്ച് വിഭാഗത്തിൽ ആയിരിക്കും വിൽപ്പനയ്ക്ക് എത്തുക. ഹോണർ 100 മാത്രമല്ല, 100 പ്രോ മോഡലും ഗീക്ക്ബെഞ്ചിൽ കണ്ടെത്തി. ഇത് സ്‌നാപ്ഡ്രാഗൺ 8 Gen 2 ചിപ്‌സെറ്റ് കരുത്തിലാണ് എത്തുന്നത് എന്ന് റിപ്പോർട്ടിൽ പറയുന്നു.

100 പ്രോയിലെ ചിപ്‌സെറ്റ് അഡ്രിനോ 740 ജിപിയുവുമായി ജോടിയാക്കിയിരിക്കുന്നു, കൂടാതെ പരമാവധി ക്ലോക്ക് സ്പീഡ് 3.19 ജിഗാഹെർട്‌സ് ആണ്. ഗീക്ക്ബെഞ്ചിൽ, ഹോണർ 100 പ്രോയ്ക്ക് 1882 സിംഗിൾ കോർ പോയിന്റുകളും 4923 മൾട്ടി കോർ പോയിന്റുകളും ഉണ്ട്. 16 ജിബി റാമും ആൻഡ്രോയിഡ് 13 ഒഎസും ഈ സ്മാർട്ട്‌ഫോൺ പായ്ക്ക് ചെയ്യുന്നു.

ടീസറുകൾ പ്രകാരം, ഹോണർ 100-ന് സെൽഫി ക്യാമറയ്‌ക്കായി പഞ്ച്-ഹോൾ ഡിസ്‌പ്ലേയാണുള്ളത്, അതേസമയം പ്രോ മോഡലിന് ഡ്യുവൽ സെൽഫി ക്യാമറകൾ നൽകിയിരിക്കുന്നു. ഹോണർ 100-ൽ, '50MP OIS' ബ്രാൻഡുള്ള ഒരു ചതുര ക്യാമറ മൊഡ്യൂളാണ് ഉള്ളത്. വെളുത്ത നിറത്തിലുള്ള ഗ്രേഡിയന്റ് ഡിസൈനിൽ ആണ് ഹോണർ 100 എത്തുകയെന്നും സ്ഥിരീകരിച്ചിട്ടുണ്ട്.

ഹോണർ 100 പ്രോയ്ക്ക് ബായ്ക്കിൽ ഓവൽ ആകൃതിയിലുള്ള ക്യാമറ മൊഡ്യൂളാണ് ഉള്ളത്. എൽഇഡി ഫ്‌ളാഷോടുകൂടിയ മൂന്ന് ക്യാമറകളാണ് ഇതിലുള്ളത്. ടെക്‌സ്‌ചർഡ് ഫിനിഷുള്ള ഡ്യുവൽ ടോൺ ഡിസൈനിൽ ഈ മോഡൽ എത്തുന്നു. 6.78 ഇഞ്ച് ( 17.22 സെ.മീ ) ഡിസ്പ്ലേ ആണ് ഇതിലുള്ളത്.

200 എംപി + 32 എംപി + 32 എംപി ട്രിപ്പിൾ റിയർ ക്യാമറയാണ് ഹോണർ 100 പ്രോയിൽ നൽകിയിരിക്കുന്നത്. 50 എംപി + 2 എംപി സെൽഫി ക്യാമറയാണ് ഹോണർ 100 പ്രോയുടെ പ്രധാന പ്രത്യേകതകളിലൊന്ന്. പ്രമുഖ ബ്രാൻഡുകളുടെ സ്മാർട്ട്ഫോണുകളിൽ പോലും ഡ്യുവൽ സെൽഫി ക്യാമറകൾ അ‌ധികം കാണാറില്ലെന്നത് ഓർക്കണം.

5000 mAh ബാറ്ററിയാണ് 100 പ്രോയിൽ നൽകിയിരിക്കുന്നത്. ഹോണർ 100 സീരീസ് നവംബർ 23 ന് ​ചൈനയിൽ ലോഞ്ച് ആകുമെങ്കിലും ഇന്ത്യയിൽ ലോഞ്ച് ചെയ്യുന്നത് സംബന്ധിച്ച വിവരങ്ങളൊന്നും കമ്പനി പുറത്തുവിട്ടിട്ടില്ല. ഹോണർ 90 5ജി ഇന്ത്യയിൽ നേടിയ വിജയം കണക്കിലെടുത്ത് പുതിയ ഹോണർ 100 സീരീസും ലോഞ്ചിന് പിന്നാലെ ഇന്ത്യയിൽ എത്തുമെന്ന് പ്രതീക്ഷിക്കാം.