155 ഗ്രാം! ലോകത്തെ ഏറ്റവും ഭാരം കുറഞ്ഞ സ്മാർട്ട്ഫോണായി ഹോണർ മാജിക് 8 പ്രോ എയർ ലോഞ്ച് ചെയ്തു

കിടിലം സ്മാർട്ട്ഫോണുകൾ ഇറക്കി അ‌ദ്ഭുതപ്പെടുത്തിയിട്ടുള്ള ബ്രാൻഡുകളിലൊന്നാണ് ഹോണർ. ഇപ്പോൾ തങ്ങളുടെ മാജിക് 8 സീരീസിൽ ഒരു പുതിയ സ്മാർട്ട്ഫോൺ അ‌വതരിപ്പിച്ചുകൊണ്ട് ഹോണർ വീണ്ടും സ്മാർട്ട്ഫോൺ ലോകത്ത് ചർച്ചകളിലും ചരിത്രത്തിലും ഇടംപിടിച്ചിരിക്കുന്നു. ഹോണർ മാജിക് 8 സീരീസിന്റെ ഭാഗമായി ഹോണർ മാജിക് 8 പ്രോ എയർ (HONOR Magic8 Pro Air) എന്ന ഒരു പുതിയ മോഡൽ അ‌വതരിപ്പിക്കപ്പെട്ടിരിക്കുന്നു. ആപ്പിളിന്റെ ഏറ്റവും സ്ലിം ഐഫോൺ മോഡൽ എയർ എന്ന പേരിൽ എത്തിയതുപോലെ ഈ ഹോണർ എയർ മോഡലും ഒരു സ്ലിം സ്മാർട്ട്ഫോൺ ആണ്.

വെറുമൊരു സ്ലിം സ്മാർട്ട്ഫോണല്ല, ലോകത്തെ ഇതുവരെയുള്ളതിൽ വച്ച് ഏറ്റവും ഭാരം കുറഞ്ഞ ഫ്ലാഗ്ഷിപ്പ് സ്മാർട്ട്ഫോൺ എന്ന പ്രത്യേകതയുമായാണ് ഹോണർ മാജിക് 8 പ്രോ എയർ എത്തിയിരിക്കുന്നത്, വെറും 150 ഗ്രാം മാത്രമാണ് ഈ ഫോണിന്റെ ഭാരം. വെറും 6.1mm ആണ് ഈ ഫോണിന്റെ വലിപ്പം. നാല് വശങ്ങളിലും 1.08mm നാരോ ബെസലുള്ള 6.31 ഇഞ്ച് OLED ഡിസ്‌പ്ലേയാണ് ഇതിലുള്ളത്.

530MPa ശക്തിയുള്ള ഒരു യൂണിബോഡി എയ്‌റോസ്‌പേസ്-ഗ്രേഡ് അലുമിനിയം ഫ്രെയിം ഇതിനുണ്ട്. ആഡംബര കാറുകളുടെ അതേ 7-കോട്ട്, 7-ബേക്കിംഗ് ലൈറ്റ്-സെൻസിംഗ് ഓവർലേ കോട്ടിംഗ് പ്രക്രിയയാണ് ഇതിൽ ഉപയോഗിച്ചിരിക്കുന്നത്, ഇത് മെറ്റാലിക് സാറ്റിൻ ഫിനിഷിൽ കലാശിക്കുന്നു. ഫെയറി പർപ്പിൾ, ലൈറ്റ് ഓറഞ്ച്, ഫെതർ വൈറ്റ്, ഷാഡോ ബ്ലാക്ക് എന്നീ നാല് കളർ ഓപ്ഷനുകളിൽ ഈ ഫോൺ എത്തിയിരിക്കുന്നു.

പൊടി, ജലം എന്നിവയെ പ്രതിരോധിക്കാൻ IP68/IP69 റേറ്റിങ് സഹിതമാണ് ഹോണർ മാജിക് 8 പ്രോ എയർ എത്തിയിരിക്കുന്നത്. മീഡിയടെക് ഡൈമെൻസിറ്റി 9500 SoC ആണ് ഈ ഭാരം കുറഞ്ഞ ഫ്ലാഗ്ഷിപ്പ് ഫോണിന് കരുത്ത് പകരുന്നത്. ട്രിപ്പിൾ റിയർ ക്യാമറ സജ്ജീകരണം, ആൻഡ്രോയിഡിലെ ആദ്യത്തെ AI സൂം അറേ ഫ്ലാഷ് എന്നിവ ഉൾപ്പെടെയുള്ള ഫീച്ചറുകളും ഈ ഹോണർ ഫോൺ അ‌വതരിപ്പിച്ചിരിക്കുന്നു.

പ്രധാന ഫീച്ചറുകൾ

120Hz റിഫ്രഷ് റേറ്റുള്ള 6.31-ഇഞ്ച് (2640×1216 പിക്സൽസ്) 1.5K LTPO OLED സ്ക്രീൻ, HDR10+, 1800 nits വരെ ഗ്ലോബൽ പീക്ക് ബ്രൈറ്റ്നസ്, 6000 nits വരെ HDR പീക്ക് ബ്രൈറ്റ്നസ്, 4320Hz ഹൈ-ഫ്രീക്വൻസി PWM ഡിമ്മിംഗ്, ജയന്റ് റിനോ ഗ്ലാസ് പ്രൊട്ടക്ഷൻ എന്നിവ ഇതിലുണ്ട്.

ഒക്ടാ-കോർ ഡൈമെൻസിറ്റി 9500 3nm SoC ആണ് ഈ ഫോണിന്റെ കരുത്ത്. ആം മാലി-G1 അൾട്രാ MC12 GPU, 12GB / 16GB LPDDR5X റാം, 256GB / 512GB / 1TB UFS 4.0 സ്റ്റോറേജ് എന്നിവയും ഇതിലുണ്ട്. ആൻഡ്രോയിഡ് 16 അടിസ്ഥാനമാക്കിയുള്ള മാജിക് UI 10.0-ൽ ആണ് ഈ ഫോണിന്റെ പ്രവർത്തനം.

ഇതിലെ ട്രിപ്പിൾ റിയർ ക്യാമറ സജ്ജീകരണത്തിൽ 50MP വൈഡ് (1/3″ f/1.6)+ 50MP 11° അൾട്രാ വൈഡ് ക്യാമറ (f/2.2) 2.5cm മാക്രോ + 64MP ടെലിഫോട്ടോ ക്യാമറ (f/2.6, 3.2x ഒപ്റ്റിക്കൽ സൂം, 100x ഡിജിറ്റൽ സൂം, OIS); 4K വീഡിയോ 60fps റെക്കോർഡിംഗ്, സിംഗിൾ LED ഫ്ലാഷ് എന്നിവ അ‌ടങ്ങുന്നു.

സെൽഫിക്കും മറ്റുമായി 50MP ഫ്രണ്ട് ക്യാമറ (f/2.0) 4K 60fps വീഡിയോ റെക്കോർഡിംഗ് സഹിതം ഇതിലുണ്ട്. CCD സ്ട്രോബ് പോർട്രെയിറ്റ് മോഡ് അവതരിപ്പിക്കുന്ന ഇൻഡസ്ട്രിയിലെ ആദ്യ സ്മാർട്ട്ഫോൺ, ഏറ്റവും സമഗ്രമായ AI ഫ്ലാഷ് പ്രവർത്തനക്ഷമതയുള്ള ഫോൺ എന്നീ പ്രത്യേകതകളും ഹോണർ മാജിക് 8 പ്രോ എയറിന് ഉണ്ട്.

IP68 + IP69 റേറ്റിങ്, 3D അൾട്രാസോണിക് ഫിംഗർപ്രിന്റ് സെൻസർ, ഇൻഫ്രാറെഡ് സെൻസർ, യുഎസ്ബി ടൈപ്പ്-സി ഓഡിയോ, ഡ്യുവൽ സ്റ്റീരിയോ സ്പീക്കറുകൾ, ഡ്യുവൽ സിം (നാനോ + eSIM), 5G SA/NSA, ഡ്യുവൽ 4G VoLTE, 80W വയർഡ് സൂപ്പർചാർജും 50W വയർലെസ് ചാർജിംഗ് പിന്തുണയുമുള്ള 5500mAh ബാറ്ററി എന്നിവയാണ് മറ്റ് പ്രധാന ഫീച്ചറുകൾ.

വില

ഹോണർ മാജിക് 8 പ്രോ എയർ മോഡലിന്റെ 12GB+256GB വേരിയന്റിന് 4999 യുവാൻ (ഏകദേശം 65,205 രൂപ), 12GB+512GB വേരിയന്റിന് 5299 യുവാൻ (ഏകദേശം 69,120 രൂപ), 16GB+512GB വേരിയന്റിന് 5599 യുവാൻ (ഏകദേശം 73,030 രൂപ), 16GB+1TB വേരിയന്റിന് 5999 യുവാൻ (ഏകദേശം 78,250 രൂപ) എന്നിങ്ങനെയാണ് വില.