ഐഫോൺ 17 പ്രോ മോഡലുകളിൽ റിവേഴ്‌സ് വയർലെസ് ചാർജിംഗ് ഫീച്ചർ ഉണ്ടായേക്കും; വിവരം ചോർന്നത് ​ചൈനയിൽ നിന്ന്

അ‌ടുത്ത മാസം അ‌വതരിപ്പിക്കും എന്ന് കരുതപ്പെടുന്ന ആപ്പിളിന്റെ ഐഫോൺ 17 സീരീസിലെ പ്രോ മോഡലുകളിൽ റിവേഴ്‌സ് വയർലെസ് ചാർജിംഗ് ഫീച്ചർ ഉണ്ടാകാൻ സാധ്യതയുണ്ട് എന്ന് ലീക്ക് റിപ്പോർട്ട്. ​ചൈനയിൽ നിന്നാണ് ഈ വിവരം ചോർന്നിരിക്കുന്നത്. ​ചൈനീസ് സാമൂഹിക മാധ്യമമായ വെയ്ബോയിലൂടെ ഫിക്സഡ് ഫോക്കസ് ഡിജിറ്റൽ എന്ന ടിപ്സ്റ്റർ ആണ് ഇക്കാര്യം വെളിപ്പെടുത്തിയിരിക്കുന്നത്. പുതിയ ഹൈ-എൻഡ് സ്മാർട്ട്‌ഫോണുകൾക്കായി ആപ്പിൾ റിവേഴ്‌സ് വയർലെസ് ചാർജിംഗ് പരീക്ഷിച്ചിട്ടുണ്ടെന്ന് ഫിക്സഡ് ഫോക്കസ് ഡിജിറ്റൽ അ‌വകാശപ്പെടുന്നു. എന്നാൽ അ‌ടുത്ത മാസം ഫോണുകൾ ഇറങ്ങുമ്പോൾ ഈ ഫീച്ചറുകൾ അ‌തിൽ ഉണ്ടാകുമോ എന്നത് കണ്ടറിയണമെന്നും ലീക്കർ പറയുന്നുണ്ട്.

അ‌തായത് റിവേഴ്‌സ് വയർലെസ് ചാർജിംഗ് ഫീച്ചറിനായി പരീക്ഷണങ്ങൾ നടന്നു, പക്ഷേ അ‌ത് വിജയിച്ചോ, ഫോണുകളിൽ ഉണ്ടാകുമോ എന്നൊക്കെയുള്ള വിവരങ്ങൾ സ്ഥിരീകരിക്കാനായിട്ടില്ല എന്ന് വേണം ടിപ്സ്റ്ററിന്റെ വാക്കുകളിൽ നിന്ന് ഊഹിക്കാൻ. റിവേഴ്‌സ് വയർലെസ് ചാർജിംഗ് ഫീച്ചർ നൽകാൻ കഴിഞ്ഞാൽ 17 സീരീസിലെ പ്രോ മോഡലുകൾക്ക് അ‌ത് ഒരു അ‌ലങ്കാരമായിരിക്കും.

റിവേഴ്‌സ് വയർലെസ് ചാർജിംഗ് ഫീച്ചർ

ഐഫോൺ 17 സീരീസിൽ റിവേഴ്‌സ് വയർലെസ് ചാർജിംഗ് ഫീച്ചർ ആപ്പിൾ അ‌വതരിപ്പിച്ചാൽ ഈ പ്രോ മോഡലുകൾ ഉപയോഗിക്കുന്ന ഉപയോക്താക്കൾക്ക് ഫോണുപയോഗിച്ച് അ‌ടിയന്തര ഘട്ടങ്ങളിൽ തങ്ങളുടെ എയർപോഡ്സ്, ആപ്പിൾ വാച്ച് എന്നിവയൊക്കെ ചാർജ് ചെയ്യാൻ സാധിക്കും. എന്നാൽ ഇത്തവണ ഈ ഫീച്ചർ അ‌വതരിപ്പിക്കപ്പെടുമോ എന്ന് ലോഞ്ചിന് ശേഷം മാത്രമേ സ്ഥിരീകരിക്കാനാകൂ.

ഐഫോൺ 17 സീരീസിനെ ചുറ്റിപ്പറ്റി ധാരാളം അ‌ഭ്യൂഹങ്ങൾ ഇതിനകം തന്നെ വന്നിട്ടുണ്ട്. അ‌തിൽ റിവേഴ്‌സ് വയർലെസ് ചാർജിങ് ഫീച്ചറുമായി ബന്ധപ്പെട്ട് ഇതിന് മുൻപ് ഒരു തവണ ചില ലീക്ക് റിപ്പോർട്ടുകൾ വന്നിരുന്നു. ഇപ്പോൾ ലോഞ്ചിനോട് അ‌ടുത്തി​രിക്കെ ഇത് രണ്ടാം തവണയും റിവേഴ്‌സ് വയർലെസ് ചാർജിങ് സംബന്ധിച്ച വിവരങ്ങൾ പുറത്തേക്ക് വരുന്നത് ആരാധകരിൽ പ്രതീക്ഷകൾ ഉണർത്തുന്നുണ്ട്.

7.5W റിവേഴ്‌സ് വയർലെസ് ചാർജിങ്

ഐഫോൺ 17 പ്രോ, ഐഫോൺ 17 പ്രോ മാക്‌സ് എന്നീ പ്രോ മോഡലുകളിൽ ആപ്പിൾ 7.5W റിവേഴ്‌സ് വയർലെസ് ചാർജിങ് പരീക്ഷിച്ചുകൊണ്ടിരുന്നതായും എയർപോഡുകൾ, ആപ്പിൾ വാച്ച്, അല്ലെങ്കിൽ വരാനിരിക്കുന്ന മാഗ്‌സേഫ് ബാറ്ററി പായ്ക്ക് പോലുള്ള മറ്റ് ആപ്പിൾ ആക്‌സസറികൾ ചാർജ് ചെയ്യാൻ ഇത് ഉപയോഗിക്കാമെന്നും ആണ് വെയ്‌ബോയിലൂടെ ലീക്കർ ഇൻസ്റ്റന്റ് ഡിജിറ്റൽ ഇപ്പോൾ വെളിപ്പെടുത്തിയിരിക്കുന്നത്.

റിവേഴ്‌സ് വയർലെസ് ചാർജിംഗ് ഫീച്ചറുകൾ ഐഫോണുകൾ അ‌വതരിപ്പിക്കാൻ ആപ്പിൾ ശ്രമിക്കുന്നതായി ഇതിന് മുൻപ് പല തവണ റിപ്പോർട്ടുകൾ വന്നിട്ടുണ്ട്. ഇക്കാര്യത്തിൽ നിർണായക നേട്ടം ​കൈവരിക്കപ്പെട്ടത് 2021ൽ ആയിരുന്നു. പരിമിതമായ രീതിയിലാണെങ്കിലും - ആപ്പിൾ ഐഫോൺ 12 നും പുതിയ മോഡലുകൾക്കുമായി അ‌ന്ന് മാഗ്‌സേഫ് ബാറ്ററി പായ്ക്ക് പുറത്തിറക്കി.

ലൈറ്റ്‌നിംഗ് വഴി ചാർജ് ചെയ്യുന്ന ഒരു ഐഫോണിൽ ഘടിപ്പിക്കുമ്പോൾ, ഐഫോണിന് മാഗ്‌സേഫ് ബാറ്ററി പാക്കിലേക്ക് പവർ നൽകാൻ കഴിയും, ഒരു ഐഫോണിന് ഒരു ആക്‌സസറി ഉപകരണത്തിലേക്ക് പവർ റൂട്ട് ചെയ്യാൻ കഴിയുന്ന ആദ്യ ഉദാഹരണമായിരുന്നു അ‌ത്. 2023 സെപ്റ്റംബറിൽ ലൈറ്റ്‌നിംഗ് മാറ്റി യുഎസ്ബി-സി പോർട്ട് അ‌വതരിപ്പിച്ച് ഐഫോൺ 15 ലൈനപ്പ് പുറത്തിറക്കിയതോടെ ആപ്പിൾ മാഗ്‌സേഫ് ബാറ്ററി പായ്ക്ക് നിർത്തലാക്കി.

മാഗ്‌സേഫ് ബാറ്ററി പായ്ക്ക് നിർത്തലാക്കിയതിനുശേഷം ആപ്പിൾ ഡി​വൈസുകൾക്കായി വയർലെസ് റിവേഴ്‌സ് ചാർജിങ് ഫീച്ചർ കമ്പനി കൊണ്ടുവന്നിട്ടില്ല. പ​ക്ഷേ ഐഫോൺ 15, 16 മോഡലുകളിൽ യുഎസ്ബി-സി പോർട്ട് വഴി 4.5 വാട്ട് വരെ പവർ ഡെലിവറി പിന്തുണയ്ക്കുന്ന ആപ്പിൾ വാച്ച്, എയർപോഡുകൾ, മറ്റ് ചെറിയ ഉപകരണങ്ങൾ എന്നിവ റിവേഴ്‌സ് ചാർജ് ചെയ്യാൻ കഴിയും.

പുതിയ ഐഫോൺ 17 സീരീസ് പ്രോ മോഡലുകളിലൂടെ റിവേഴ്‌സ് വയർലെസ് ചാർജിങ് കൊണ്ടുവരാൻ കഴിഞ്ഞാൽ അ‌ത് ഒരു അ‌ധിക നേട്ടമാകും എന്ന് കരുതപ്പെടുന്നു. ഇക്കാര്യത്തിൽ ആപ്പിൾ ഔദ്യോഗികമായി ഒരു പ്രതികരണവും നടത്തിയിട്ടില്ല. 2025 സെപ്റ്റംബർ രണ്ടാം ആഴ്ചയിൽ പ്രതീക്ഷിക്കുന്ന ഐഫോൺ ഇവന്റിൽ വച്ച് ഇത് സംബന്ധിച്ച സംശയങ്ങളെല്ലാം ആപ്പിൾ തീർക്കും എന്ന് പ്രതീക്ഷിക്കപ്പെടുന്നു.