ഇതുവരെയുള്ളതിൽ ഏറ്റവും വേഗതയേറിയ ആൻഡ്രോയിഡ് ഫോണുകളിലൊന്ന്! ഐക്യൂ 15 അ‌ൾട്ര ഡീറ്റെയിൽസ് പുറത്ത്

ഐക്യൂ തങ്ങളുടെ പ്രീമിയം മോഡലുകളുടെ നിര കൂടുതൽ ശക്തമായ അ‌ൾട്ര സ്മാർട്ട്ഫോൺ മോഡലുകളുമായി വിപുലീകരിക്കാൻ പോവുകയാണെന്നും അ‌തിന്റെ ഭാഗമായി ഐക്യൂ 15 അ‌ൾട്ര (iQOO 15 Ultra) എന്ന ഐക്യൂ അ‌ൾട്ര നിരയിലെ ആദ്യ ഫോൺ ഫെബ്രുവരി 5ന് ​ചൈനയിൽ ലോഞ്ച് ചെയ്യുമെന്നും ഇതിനകം സ്ഥിരീകരിക്കപ്പെട്ടിട്ടുണ്ട്. ഇപ്പോൾ ലോഞ്ചിന് മുന്നോടിയായി കമ്പനി തന്നെ വരാൻ പോകുന്ന ഈ ഫോണിനെക്കുറിച്ചുള്ള കൂടുതൽ ഡീറ്റെയിൽസ് വെളിപ്പെടുത്തിയിരിക്കുന്നു. ക്യാമറകളുടെ കാര്യത്തിൽ പുതിയ അ‌ൾട്ര മോഡൽ കൂടുതൽ ശ്രദ്ധ ചെലുത്തിയിട്ടുണ്ട് എന്ന് പുതിയ വിവരങ്ങൾ വ്യക്തമാക്കുന്നുണ്ട്.

ട്രിപ്പിൾ റിയർ ക്യാമറ സജ്ജീകരണം ഐക്യൂ 15 അ‌ൾട്രയിൽ ഉണ്ടാകും. അ‌തിൽ 3x ഒപ്റ്റിക്കൽ സൂമും ഒപ്റ്റിക്കൽ ഇമേജ് സ്റ്റെബിലൈസേഷനുമുള്ള 50MP സോണി പെരിസ്കോപ്പ് ടെലിഫോട്ടോ ക്യാമറ ഉൾപ്പെടുന്നു എന്ന് പുറത്തുവന്ന പുതിയ ഡീറ്റെയിൽസ് വെളിപ്പെടുത്തുന്നു. മാജിക് 2.0 ഇമേജ് റെസ്റ്റോറേഷൻ എഞ്ചിൻ, നൈസ് 3.0 ഒപ്റ്റിക്കൽ റീകൺസ്ട്രക്ഷൻ എഞ്ചിൻ എന്നിവയുൾപ്പെടെ വിവോയുടെ ഇമേജ് പ്രോസസ്സിംഗ് സിസ്റ്റങ്ങളും ഈ ഫോണിലുണ്ടാകും.

ഈ ഐക്യൂ ഫോണിന്റെ പെർഫോമൻസിന് കരുത്ത് പകരുക സ്നാപ്ഡ്രാഗൺ 8 എലൈറ്റ് ജെൻ 5 പ്രോസസർ ആണ് എന്ന് പ്രതീക്ഷിക്കുന്നു. ഇത് ഐക്യൂവിന്റെ സ്വന്തം ക്യു 3 ഗെയിമിംഗ് ചിപ്പ് സഹിതമാണ് എത്തുക. 4.5 ദശലക്ഷത്തിലധികം AnTuTu സ്കോർ ഈ മോഡലിന് ഉണ്ട് എന്ന് കമ്പനി അവകാശപ്പെടുന്നു.

ഇതുവരെ പ്രഖ്യാപിച്ചതിൽ വച്ച് ഏറ്റവും വേഗതയേറിയ ആൻഡ്രോയിഡ് ഫോണുകളിൽ ഒന്നാണ് ഐക്യൂ 15 അ‌ൾട്ര എന്ന് AnTuTu സ്കോർ സൂചിപ്പിക്കുന്നുണ്ട്. ഗെയിമിങ്ങിൽ ശ്രദ്ധ കേന്ദ്രീകരിച്ചുകൊണ്ടുകൂടിയാണ് ഈ ഐക്യൂ ഫോൺ എത്തുന്നത് എന്ന് ഇതിലെ ഫീച്ചറുകളുടെ നിര കണ്ടൽ മനസിലാകും. ഷോൾഡർ ട്രിഗർ ബട്ടണുകൾ, ആക്റ്റീവ് കൂളിംഗ് ഫാൻ, ഫാസ്റ്റ് ടച്ച് റെസ്‌പോൺസ്, ഉയർന്ന കൃത്യതയുള്ള ഗൈറോസ്‌കോപ്പ് തുടങ്ങിയവ ഇതിലുണ്ട്.

ഉയർന്ന ഗ്രാഫിക്സ് സജ്ജീകരണങ്ങളോടെ ഫോണിന് 144fps-ൽ ഹോണർ ഓഫ് കിംഗ്‌സ് പ്രവർത്തിപ്പിക്കാൻ കഴിയുമെന്ന് കമ്പനി പറയുന്നു. പ്രോസസർ മാത്രമല്ല, ഈ ഫോണിന്റെ ചില ഡിസ്പ്ലേ ഫീച്ചറുകളും ഇതിനകം സ്ഥിരീകരിച്ചിട്ടുണ്ട്. 2K റെസല്യൂഷനും 144Hz റിഫ്രഷ് റേറ്റും ഉള്ള 6.85 ഇഞ്ച് സാംസങ് OLED LTPO പാനൽ ആണ് ഈ അ‌ൾട്ര മോഡലിലുണ്ടാകുക. ഇത് വളരെ ഉയർന്ന പീക്ക് ബ്രൈറ്റ്‌നസ് സഹിതം എത്തും.

ഡോൾബി അറ്റ്‌മോസുള്ള സ്റ്റീരിയോ സ്പീക്കറുകൾ, RGB ലൈറ്റിംഗ് സ്ട്രിപ്പ്, ഹാർഡ്‌വെയറിനെ റൗണ്ട് ഔട്ട് ചെയ്യുന്ന അൾട്രാസോണിക് ഫിംഗർപ്രിന്റ് സെൻസർ എന്നിവയും ഐക്യൂ 15 അ‌ൾട്രയിലുണ്ട്. 7,400mAh ബാറ്ററിയാണ് ഈ സ്മാർട്ട്ഫോണിന്റെ പ്രവർത്തനങ്ങൾക്ക് ഊർജം പകരുക. ഇതിന് 100W വയർഡ്, വയർലെസ് ചാർജിങ് പിന്തുണകളും ഉറപ്പാക്കിയിരിക്കുന്നു.

മറ്റ് പലതിലുമെന്ന പോലെ കണക്റ്റിവിറ്റിയിലും ഐക്യൂ 15 അ‌ൾട്ര മികവ് പുലർത്തും. ഫോൺ എങ്ങനെ പിടിക്കുന്നു എന്നതിനെ ആശ്രയിച്ച് ക്രമീകരിക്കുന്ന 29 ആന്റിനകൾ ഇതിൽ ഉപയോഗിക്കുന്നു, N79 5G ബാൻഡിനെ പിന്തുണയ്ക്കുന്നു, കൂടാതെ ഭൂഗർഭ മെട്രോ സ്റ്റേഷനുകൾ പോലുള്ള കഠിനമായ പരിതസ്ഥിതികളിൽ പോലും വൈ-ഫൈ സ്ഥിരത നിലനിർത്താൻ രൂപകൽപ്പന ചെയ്‌ത സോഫ്റ്റ്‌വെയർ ഇതിൽ ഉൾപ്പെടുന്നു.

ഗെയിമിങ്ങിന് കരുത്തുപകരുന്ന ഫീച്ചറുകൾ ഉറപ്പാക്കിക്കൊണ്ട് ഗെയിമിങ് ആരാധകരെയും മികച്ച ബാറ്ററി, ശക്തമായ ക്യാമറ, ചിപ്സെറ്റ് എന്നിവ വാഗ്ദാനം ചെയ്തുകൊണ്ട് അ‌ൾട്ര പ്രീമിയം സ്മാർട്ട്ഫോൺ തേടുന്നവരെയും ഒരേ സമയം ആകർഷിക്കാൻ ഐക്യൂ 15 അ‌ൾട്രയ്ക്ക് കഴിയും എന്ന് പ്രതീക്ഷിക്കപ്പെടുന്നു. ഇത് ​ചൈനയിലെ ലോഞ്ചിന് ശേഷം ഇന്ത്യയിൽ അ‌വതരിപ്പിക്കുമോ എന്ന് ഇപ്പോൾ വ്യക്തമല്ല.