ഐക്യൂ നിയോ 3 5G സ്മാർട്ഫോൺ ഏപ്രിൽ 23ന് ലോഞ്ച് ചെയ്യും

ഈ വർഷം ഫെബ്രുവരിയിൽ ഇറങ്ങിയ ഐക്യൂ 3 ഫോണിലേതുപോലെ 5G സപ്പോർട്ട്, UFS 3.1 സ്റ്റോറേജ് എന്നീ സവിശേഷതകൾ ഈ സ്മാർട്ഫോണിനുണ്ടാകും. 144Hz ഡിസ്പ്ലേയോട് കൂടിയ ഈ ഹാൻഡ്‌സെറ്റ് 44,990 രൂപയ്ക്കാണ് ഇന്ത്യയിൽ ഫെബ്രുവരി മാസത്തിൽ ലോഞ്ച് ചെയ്തത്. വിവോയുടെ ഉപബ്രാൻഡായി പ്രവർത്തനം ആരംഭിച്ച ഈ കമ്പനി പുതിയ 3 + 2 സ്ട്രാറ്റജി ഉപയോഗിച്ചാണ് അടുത്ത ഐക്യൂ സ്മാർട്ഫോൺ എത്തുന്നതെന്ന് നേരത്തെ അറിയിച്ചിരുന്നു.

എന്നാൽ ഈ 3 + 2 എന്താണെന്ന കാര്യം ഐക്യൂ വ്യക്തമാക്കിയില്ല. ഇതിലെ 3 സ്മാർട്ഫോണിന്റെ പ്രൊസസർ, ഡിസ്പ്ലേ, റീഫ്രഷ് റേറ്റ് എന്നിവയെ സൂചിപ്പിക്കുന്നു എന്നാണ് ഒരു പ്രമുഖ ടിപ്പ്സ്റ്റർ വ്യക്തമാക്കിയത്. '2' സ്മാർട്ഫോണിന്റെ 44W ഫാസ്റ്റ് ചാർജിങ് സപ്പോർട്ടുള്ള 4,500mAh ബാറ്ററി ആണെന്നും റിപ്പോർട്ടുകൾ ഉണ്ട്. 48-മെഗാപിക്സലിന്റെ പ്രധാന ക്യാമറയായിരിക്കും ഐക്യൂ നിയോ 3 5G സ്മാർട്ഫോണിൽ കമ്പനി നൽകിയിരിക്കുന്നത് എന്നാണ് റിപ്പോർട്ടുകൾ.

നേരത്തെ ഇറങ്ങിയ ഐക്യൂ 3 ഫോണിലും ഇതായിരുന്നു പ്രധാന ക്യാമറ. ഫോണിന്റെ 4G വേരിയന്റും ഒപ്പം പുറത്തിറക്കും. എന്തായാലും വരും ദിവസങ്ങളിൽ ഫോണിനെക്കുറിച്ചുള്ള കൂടുതൽ വിവരങ്ങൾ അറിയാനാവും എന്ന പ്രതീക്ഷയിലാണ് സ്മാർട്ഫോൺ ഉപയോക്താക്കൾ. ക്വാൽകോമിന്റെ സ്നാപ്ഡ്രാഗൺ 865 SoC ചിപ്സെറ്റുള്ള ഐക്യൂ 3 സ്മാർട്ഫോൺ 4G, 5G പതിപ്പുകളിലാണ് ലോഞ്ച് ചെയ്തത്. ടോപ് എൻഡ് കോൺഫിഗറേഷനിൽ മാത്രമേ 5G ലഭിക്കുകയുള്ളൂ.

8 ജിബി റാമും 128 ജിബി സ്റ്റോറേജുമുള്ള ഐക്യൂ 4G പതിപ്പിന് 36,990 രൂപയാണ് വില വരുന്നത്. അതേസമയം 8 ജിബി + 256 ജിബി 4G മോഡലിന് 39,990 രൂപയാണ് വില. 5G സപ്പോർട്ടുള്ള ഐക്യൂ 3-യുടെ ടോപ് എൻഡ് കോണ്ഫിഗറേഷനിലുള്ള 12 ജിബി റാം, 256 ജിബി മോഡലിന് 44,990 രൂപയാണ് വില. അതേസമയം, വിവോ നിയോ 3 5G ക്കായി മൈക്രോസൈറ്റും പുറത്തിറക്കിയിട്ടുണ്ട്. വരും ദിവസങ്ങളിൽ ഇതിനെക്കുറിച്ച് കൂടുതൽ അപ്‌ഡേറ്റുകൾ കാണുമെന്ന് പ്രതീക്ഷിക്കാം.