എതിരാളികളുടെ പേടിസ്വപ്നം, ആരാധകരുടെ കണ്ണിലുണ്ണി! ഐക്യൂവിന്റെ വിജയപരമ്പര തുടരാൻ നിയോ 8 എത്തുന്നു

ഐക്യു ആരാധകരിൽ ആവേശം പകർന്ന് നിയോ പരമ്പരയിലെ പുത്തൻ താരം എത്തുന്നു. ഇന്ത്യയിൽ ഐക്യുവിന് വിശാലമായ ആരാധക അ‌ടിത്തറ നിർമിച്ച് നൽകുന്നതിൽ പ്രധാന പങ്കുവഹിച്ച സ്മാർട്ട്ഫോൺ ആയിരുന്നു ഐക്യൂ നിയോ 6. അ‌തിനുശേഷം ഈ വർഷം ആദ്യം നിയോ 6ന് പിൻഗാമിയായി നിയോ 7 എത്തി.

നിയോ 6 ഉണ്ടാക്കിയെടുത്ത പേരും പ്രശസ്തിയും തെല്ലും കോട്ടം വരുത്താനെ നിയോ 7 നും വിജയമായി. ഇതോടെ ആരാധകർ ഐക്യുവിനെ കൂടുതൽ ഏറ്റെടുത്തു. അ‌ടുത്തിടെ ഐക്യുവിന്റെ ഇസഡ് 7 5ജി സ്മാർട്ട്ഫോണും 20000 രൂപയിൽ താഴെ വിലയിൽ ഇന്ത്യൻ വിപണിയിൽ എത്തി.

നൽകുന്ന വിലയെക്കാൾ ഒരുപടി മുന്നിൽ നിൽക്കുന്ന മികച്ച ഫീച്ചറുകളുമായി എത്തിയ ഐക്യൂ Z7 5ജി ചൂട​പ്പം പോലെയാണ് ആമസോണിൽ വിറ്റഴിഞ്ഞത്. ഇങ്ങനെ വിജയങ്ങളുടെ ഒരു പരമ്പരതന്നെ സൃഷ്ടിച്ച് സൂപ്പർ ഹിറ്റായി മുന്നോട്ട് പോകുന്നതിനിടെയാണ് ഐക്യു നിയോ സീരീസിലെ ഏറ്റവും പുതിയ സ്മാർട്ട്ഫോണായ ഐക്യൂ നിയോ 8 നെ അ‌വതരിപ്പിക്കാൻ ഒരുങ്ങിയിരിക്കുന്നത്.

മെയ് 23 ന് ഐക്യൂ നിയോ 8 ചൈനയിൽ ലോഞ്ച് ചെയ്യുമെന്ന് കമ്പനി ഇതിനോടകം സ്ഥിരീകരിച്ചിട്ടുണ്ട്. ഐക്യൂ നിയോ 7 ആദ്യം പുറത്തിറങ്ങിയത് 2022 ഒക്ടോബറിൽ ആയിരുന്നു. ഇപ്പോൾ അ‌തിന്റെ പിൻഗാമി​യെ അ‌വതരിപ്പിക്കാൻ ഐക്യൂ ഒരുങ്ങുമ്പോൾ ഇത്ര പെട്ടെന്ന് അ‌ടുത്ത ഫോൺ ഇറക്കാറായോ എന്ന് ചിന്തിക്കുന്നവർ ഉണ്ടാകും.

എന്നാൽ അ‌തിൽ അ‌തിശയിക്കാൻ ഒന്നുമില്ല, അ‌താണ് ഐക്യുവിന്റെ ഒരു ​ശൈലി. ആറുമാസത്തിനിടെ പുതിയ പതിപ്പ് അ‌വതരിപ്പിക്കാൻ ഐക്യൂ പരമാവധി ശ്രമിക്കാറുണ്ട്. ഒട്ടേറെ മികച്ച ഫീച്ചറുകളുമായി മുൻഗാമികളെക്കാൾ തലയെടുപ്പോടെയാണ് നിയോ 8 ന്റെ വരവ്. ഉടൻ ​ചൈനയിൽ പുറത്തിറങ്ങുന്ന ഈ സ്മാർട്ട്ഫോണിന്റെ ഫീച്ചറുകൾ സംബന്ധിച്ച് ലഭ്യമായിട്ടുള്ള വിവരങ്ങൾ നോക്കാം.

ഉയർന്ന റെസല്യൂഷൻ ഡിസ്‌പ്ലേ, മുൻനിര ചിപ്‌സെറ്റ്, ഫാസ്റ്റ് ചാർജിംഗിനുള്ള പിന്തുണ എന്നിവയും അതിലേറെയും ഫീച്ചറുകൾ സഹിതമാണ് ഐക്യൂ നിയോ 8 വരുന്നത്. 39,999 രൂപ പ്രാരംഭ വിലയിൽ ഇന്ത്യയിൽ വിൽക്കുന്ന വൺപ്ലസ് 11 ആർ പോലുള്ള സ്മാർട്ട്ഫോണുകൾക്ക് വൻ വെല്ലുവിളിയാകും ഐക്യൂ ഉയർത്തുക എന്ന് ലീക്ക് റിപ്പോർട്ടുകൾ സൂചിപ്പിക്കുന്നു.

​ചൈനയിൽ ഐക്യൂ നിയോ 8 ന് സ്റ്റാൻഡേർഡ്, പ്രോ പതിപ്പുകൾ ഉണ്ടാകും. ഇതിൽ നിയോ 8 പ്രോ മീഡിയടെക്ക് ഡിമെൻസിറ്റി 9200+ ചിപ്പ് പായ്ക്ക് ചെയ്യുമെന്ന് സ്ഥിരീകരിക്കപ്പെട്ടിട്ടുണ്ട്. സ്റ്റാൻഡേർഡ് മോഡലിന്റെ ചിപ്പ് കമ്പനി ഇതുവരെ വെളിപ്പെടുത്തിയിട്ടില്ല. എങ്കിലും ക്വാൽക്കോം സ്നാപ്ഡ്രാഗൺ 8+ ജെൻ 1ചിപ്സെറ്റ് ആകും ഇതിലുണ്ടാകുകയെന്ന് ലീക്ക് റിപ്പോർട്ടുകൾ പറയുന്നു.

16ജിബി വരെ റാമും 256ജിബി വരെ ഇന്റേണൽ സ്റ്റോറേജും പിന്തുണയ്ക്കുന്നതാകും നിയോ 8. ഈ ഫോണിന്റെ ഡിസ്‌പ്ലേ വലുപ്പത്തെക്കുറിച്ച് ഒരു വിവരവും പുറത്തുവന്നിട്ടില്ല. എങ്കിലും മുൻഗാമിയുടെ ഡിസ്പ്ലേ വലുപ്പം നിലനിർത്തുകയാണെങ്കിൽ, നിയോ 8-ൽ 6.78 ഇഞ്ച് അമോലെഡ് പാനൽ കാണാൻ സാധിക്കും.

ബാറ്ററി സംബന്ധിച്ച സൂചനകളും ലഭ്യമല്ല, എന്നാൽ 120W ഫാസ്റ്റ് ചാർജിംഗിനുള്ള പിന്തുണ കമ്പനി നൽകുമെന്ന് സൂചനയുണ്ട്. ചില ഐക്യൂ ​ഫോണുകൾ 5,000mAh ബാറ്ററി വാഗ്ദാനം ചെയ്യുന്നതിനാൽ നിയോ 8 ലും അ‌തേ ബാറ്ററിക്കരുത്ത് നൽകാനുള്ള സാധ്യത നിലനിൽക്കുന്നു. ഒപ്റ്റിക്‌സിന്റെ കാര്യത്തിൽ, നിയോ 8 ന് 50 മെഗാപിക്സൽ പ്രൈമറി ക്യാമറ ഉണ്ടാകുമെന്ന് ടിപ്‌സ്റ്റർ അവകാശപ്പെടുന്നു.

നിയോ 8 ന്റെ ഇന്ത്യയിലേക്കുള്ള വരവ്: നിയോ 7 ഈ വർഷം ആദ്യമാണ് ഇന്ത്യയി​ൽ എത്തിയത്. അ‌തിനാൽത്തന്നെ ഉടൻ നിയോ 8 ഇന്ത്യയിൽ ലഭ്യമാകാൻ സാധ്യതകൾ വളരെ കുറവാണ്. നിയോ 7 ​ചൈനയിൽ പുറത്തിറങ്ങി നാല് മാസത്തിന് ശേഷമാണ് ഇന്ത്യയിൽ അ‌വതരിപ്പിക്കപ്പെട്ടത്. ഇതേ സമയക്രമം പിന്തുടർന്നാൽ 2023 രണ്ടാം പകുതിയിലാകും നിയോ 8 ഇന്ത്യയിലെത്തുക.