ഐക്യൂ ​ലൈറ്റായി ഒരു 5G ഫോൺ ഇറക്കുന്നു, അ‌ങ്ങ് ​ചൈനയിൽ അ‌ല്ല, ഇങ്ങ് ഇന്ത്യയിൽ; Z10 ​ലൈറ്റ് 5G ജൂൺ 18ന് എത്തും

പ്രമുഖ ​ചൈനീസ് സ്മാർട്ട്ഫോൺ ബ്രാൻഡായ ഐക്യൂ ഒരു പുതിയ സ്മാർട്ട്ഫോണിന്റെ കൂടി ലോഞ്ച് തിയതി പ്രഖ്യാപിച്ചിരിക്കുന്നു, അ‌ങ്ങ് ​ചൈനയിലല്ല, ഇങ്ങ് ഇന്ത്യയിൽ ആണ് ഈ സ്മാർട്ട്ഫോൺ ലോഞ്ച് ചെയ്യാൻ പോകുന്നത്. ഐക്യൂ Z10 ​ലൈറ്റ് 5ജി (iQOO Z10 Lite 5G) എന്നാണ് ഉടൻ ഇന്ത്യയിൽ ലോഞ്ച് ചെയ്യാൻ പോകുന്ന ഈ സ്മാർട്ട്ഫോണിന്റെ പേര്. ജൂൺ 18ന് ഐക്യൂ Z10 ​ലൈറ്റ് 5ജി ഇന്ത്യയിൽ അ‌വതരിപ്പിക്കും എന്ന് കമ്പനി ഔദ്യോഗികമായി സ്ഥിരീകരിച്ചിരിക്കുന്നു. കഴിഞ്ഞ വർഷം ബജറ്റ് വിലയിൽ എത്തി സ്മാർട്ട്ഫോൺ പ്രേമികളെ സന്തോഷിപ്പിച്ച z9 ​ലൈറ്റ് 5ജിയുടെ പിൻഗാമിയായാണ് ഇത് എത്തുന്നത്.

9999 രൂപ വിലയിൽ വാങ്ങാം എന്നതായിരുന്നു ഐക്യൂ z9 ​ലൈറ്റ് 5ജിയെ വിപണിയിൽ ശ്രദ്ധേയമാക്കിയത്. ഇപ്പോൾ അ‌തിന്റെ പിൻഗാമിയായി എത്തുന്ന ഐക്യൂ Z10 ​ലൈറ്റ് 5ജിയും 10000 രൂപയിൽ താഴെ വിലയിൽ തന്നെയാണ് എത്തുക. ഇതിന്റെ വില ഔദ്യോഗികമായി വെളിപ്പെടുത്തിയിട്ടില്ലെങ്കിലും ഒരു വലിയ സൂചന ഐക്യൂ നൽകിയിട്ടുണ്ട്.

6000mAh ബാറ്ററിയായിരിക്കും ഐക്യൂ z10 ​ലൈറ്റ് 5ജിയിൽ ഉണ്ടാകുക എന്ന് കമ്പനി വെളിപ്പെടുത്തിയിരുന്നു. ഇതോടൊപ്പം മറ്റൊരു കാര്യം കൂടി പറഞ്ഞു. 10,000 രൂപയിൽ താഴെ വിലയുള്ള 5G സ്മാർട്ട്‌ഫോണുകളിൽ ലഭ്യമായതിൽ വച്ച് ഏറ്റവും വലിയ ബാറ്ററി ശേഷി ഈ ഫോണിൽ ഉണ്ട് എന്നതാണ് അ‌ത്. ഐക്യൂ Z10 ​ലൈറ്റ് 5ജി 10000 രൂപയിൽ താഴെ വിലയിലെത്തുമെന്ന് ഈ പ്രസ്താവന സൂചന നൽകിയിരിക്കുന്നു.

ഇതിൽ നിന്ന് മനസിലാക്കാവുന്ന മറ്റൊരു ശ്രദ്ധേയമായ വിവരം ഐക്യൂ Z10 ​ലൈറ്റ് 5ജി മുൻ മോഡലിനെ അ‌പേക്ഷിച്ച് വളരെ ഉയർന്ന ബാറ്ററി ശേഷി വാഗ്ദാനം ചെയ്യുന്നുണ്ട് എന്നതാണ്. ഐക്യൂ Z9 ലൈറ്റ് 5G യിൽ 5000mAh ബാറ്ററിയാണ് ഉണ്ടായിരുന്നത്. എന്നാൽ വരാൻ പോകുന്ന Z10 ​ലൈറ്റ് 5ജിയിൽ 6000mAh ബാറ്ററിയാണ് ഉള്ളത് എന്ന് ഐക്യൂ തന്നെ സ്ഥിരീകരിച്ചിരിക്കുന്നു.

ലോഞ്ച് തിയതി പ്രഖ്യാപിച്ചതിനൊപ്പം ഐക്യൂ z10 ​ലൈറ്റ് 5ജിയുടെ ടീസറും കമ്പനി പുറത്തുവിട്ടു. ഇതിൽ നീല നിറത്തിൽ ആണ് ഫോൺ കാണപ്പെടുന്നത്. ഡ്യുവൽ റിയർ ക്യാമറ സജ്ജീകരണമാണ് ഈ ബജറ്റ് 5ജി ഫോണിൽ ഉള്ളത് എന്ന വിവരവും ഈ ടീസർ സ്ഥിരീകരിക്കുന്നു. മെയിൻ ക്യാമറയും ഡെപ്ത് സെൻസറും എൽഇടി ഫ്ലാഷും അ‌ടങ്ങുന്നതാകും ക്യാമറ മൊഡ്യൂൾ.

വലിയ 6.74″ HD+ 90Hz LCD സ്‌ക്രീൻ സഹിതമാകും ഐക്യൂ Z10​ ​ലൈറ്റ് 5ജി എത്തുക എന്നാണ് ലീക്ക് റിപ്പോർട്ടുകൾ പറയുന്നത്. ഈ ഫോണിന്റെ പ്രധാന ഫീച്ചറുകൾ ലോഞ്ചിന് മുൻപ് തന്നെ വരും ദിവസങ്ങളിലായി ഐക്യൂ വെളിപ്പെടുത്തും. ലോഞ്ചിന് ശേഷം ഐക്യൂവിന്റെ ഔദ്യോഗിക വെബ്​സൈറ്റിന് പുറമേ ആമസോൺ വഴിയും ഐക്യൂ z10 ​ലൈറ്റ് 5ജി വാങ്ങാനാകും.

നിലവിൽ ഐക്യൂ Z10 സീരീസിൽ ഇന്ത്യയിൽ രണ്ട് സ്മാർട്ട്ഫോണുകളാണ് അ‌വതരിപ്പിക്കപ്പെട്ടിട്ടുള്ളത്. ഐക്യൂ Z10 5ജി, ഐക്യൂ Z10x 5ജി എന്നിവയാണ് അ‌വ. ഇതിൽ ഐക്യൂ Z10 5ജിയുടെ 8GB + 128GB അ‌ടിസ്ഥാന വേരിയന്റിന് 21,999 രൂപയും 8GB + 256GB വേരിയന്റിന് 23,999 രൂപയും 12GB + 256GB വേരിയന്റിന് 25,999 രൂപയുമാണ് വില.

ഐക്യൂ Z10 5ജിയുടെ കുറച്ചുകൂടി വില കുറഞ്ഞ മോഡലാണ് ഐക്യൂ Z10x 5G. ഇതിന്റെ 6GB+128GB അ‌ടിസ്ഥാന വേരിയന്റിന് 13,499 രൂപയും 8GB + 128GB വേരിയന്റിന് 14,999 രൂപയും ടോപ്പ്- എൻഡ് 8GB + 256GB വേരിയന്റിന് 16,499 രൂപയും ആണ് വില. ഇതിന്റെയും വില കുറഞ്ഞ ഓപ്ഷൻ ആയിട്ടാണ് ഐക്യൂ Z10 ​ലൈറ്റ് 5ജി 10000 രൂപയിൽ താഴെ വിലയിൽ എത്തുക.