പാവങ്ങളുടെ ബാഹുബലി! ഐടെൽ പി55 പ്ലസ് ഫെബ്രുവരി 8ന് ഇന്ത്യയിൽ എത്തും, ആമസോണിൽ പേജ് എത്തി

ബജറ്റ് വിലയിൽ സ്മാർട്ട്ഫോണുകൾ അ‌വതരിപ്പിക്കുന്നതിൽ പ്രശസ്തരായ ഐടെൽ തങ്ങളുടെ പവർ സീരീസിൽ പുതിയ ഫോൺ ലോഞ്ച് ചെയ്യാൻ പോകുന്നു. ഐടെൽ പി55 പ്ലസ് (Itel P55+) എന്ന പേരിൽ ഒരുക്കിയിരിക്കുന്ന സ്മാർട്ട്ഫോൺ ഫെബ്രുവരി 8ന് ഇന്ത്യൻ വിപണിയിൽ ലോഞ്ച് ചെയ്യുമെന്ന് ആമസോണിലെ ലാൻഡിങ് പേജ് സ്ഥിരീകരിച്ചു.

മൂന്ന് പി-സീരീസ് പവർ പ്ലേ ഫോണുകൾ ഫെബ്രുവരിയിൽ ഇന്ത്യയിൽ അവതരിപ്പിക്കുമെന്ന് ഐറ്റൽ അടുത്തിടെ സ്ഥിരീകരിച്ചിരുന്നു. ഇതിന് പിന്നാലെയാണ് ഇപ്പോൾ ഐടെൽ പി55 പ്ലസ് മോഡലിന്റെ ലോഞ്ച് സ്ഥിരീകരിച്ചിരിക്കുന്നത്. ഇതോടൊപ്പം ഐടെൽ പവർ സീരീസിലെ പി55 മോഡലിന്റെ പുതിയ സ്റ്റോറേജ് വേരിയന്റും ലോഞ്ച്​ ചെയ്യും.

ഇന്ത്യയിൽ ഇതിനകം തന്നെ ലോഞ്ച് ചെയ്ത മോഡലാണ് ഐടെൽ പി55 (Itel P55). ഇന്ത്യയിൽ ഐടെൽ പുറത്തിറക്കിയ ആദ്യ 5ജി സ്മാർട്ട്ഫോൺ ആണ് ഇത്. പതിനായിരം രൂപയിൽ താഴെ വിലയിൽ ഇന്ത്യയിൽ ലഭ്യമായിട്ടുള്ള മികച്ച 5ജി സ്മാർട്ട്ഫോണുകളിൽ ഒന്നാണ് ഐടെൽ പി55. ഇപ്പോൾ അ‌തിന്റെ പുതിയ 256 സ്റ്റോറേജ് വേരിയന്റാണ് ലോഞ്ച് ചെയ്യാൻ പോകുന്നത്.

ഐടെൽ P55, ഐടെൽ P55+ എന്നീ രണ്ട് പുതിയ സ്മാർട്ട്ഫോണുകളുടെ വരവ് സൂചിപ്പിക്കുന്ന ലാൻഡിംഗ് പേജ് ആമസോൺ ഇന്ത്യയിൽ ഇപ്പോൾ ലൈവായി. ഈ രണ്ട് ഫോണുകളും ഫെബ്രുവരി 8 ന് രാജ്യത്ത് ലോഞ്ച് ചെയ്യും എന്നതിനൊപ്പം രണ്ട് സ്മാർട്ട്‌ഫോണുകളുടെയും പ്രധാന സവിശേഷതകളും രൂപകൽപ്പനയും ആമസോൺ ലിസ്റ്റിംഗ് വെളിപ്പെടുത്തുന്നു.

ഐടെൽ പി55 പ്ലസ് മോഡലിന്റെ പ്രധാന ഹൈലൈറ്റ് 45W ഫാസ്റ്റ് ചാർജിംഗ് ആണ്. കമ്പനി പറയുന്നതനുസരിച്ച്, വെറും 30 മിനിറ്റിനുള്ളിൽ ഫോൺ 0 മുതൽ 70 ശതമാനം വരെ ചാർജിൽ എത്തും. ഇത് മൂന്ന് തലത്തിലുള്ള ചാർജിംഗ് വാഗ്ദാനം ചെയ്യും. ​ഹൈപ്പർ ചാർജ്, സ്മാർട്ട് ചാർജ്, ലോ-ടെമ്പ് ചാർജ് എന്നീവയാണ് ആ ഓപ്ഷനുകൾ.

​ഹൈപ്പർ ചാർജ്: ബാറ്ററി വേഗത്തിൽ നിറയ്ക്കുന്നതിനുള്ള ഹൈപ്പർ ചാർജ്, വെറും 10 മിനിറ്റിനുള്ളിൽ 25 ശതമാനം ബാറ്ററി പവർ നേടാൻ ഉപയോക്താക്കളെ അനുവദിക്കുന്നു. സ്മാർട്ട് ചാർജ്: ഈ ഓപ്ഷൻ ഉപയോക്താവിൻ്റെ ഉപയോഗ രീതിയെ അടിസ്ഥാനമാക്കി എഐ പിന്തുണയോടെ ഫോൺ ചാർജ് ചെയ്യുന്നു. ലോ-ടെമ്പ് ചാർജ്: ഫോൺ അമിതമായി ചൂടാകാതെ ഉപകരണം ചാർജ് ചെയ്യും.

വെർച്വൽ റാം ഉൾപ്പെടെ 16 ജിബി വരെ റാം ഐടെൽ പി55 പ്ലസ് വാഗ്ദാനം ചെയ്യുമെന്ന് പ്രതീക്ഷിക്കുന്നു. 50 മെഗാപിക്സൽ ഡ്യുവൽ ക്യാമറ സംവിധാനത്തോടെയാണ് ഈ ഫോൺ എത്തുന്നത്. കൂടാതെ, ഫോണിൻ്റെ കളർ വേരിയൻ്റുകളിൽ ഒന്നിന് ലെതർ-ടെക്‌സ്ചർ ചെയ്ത ഭാഗം ഫീച്ചർ ചെയ്യുന്ന ഡ്യുവൽ-ടോൺ ഫിനിഷുണ്ട്.

256 ജിബി സ്റ്റോറജ് വാഗ്ദാനം ചെയ്യുന്നു എന്നതാണ് ഐടെൽ പി55 ന്റെ പ്രധാന ​ഹൈ​ലൈറ്റ്. വരാൻ പോകുന്ന ഐടെൽ പി55, പി55 പ്ലസ് മോഡലുകളിൽ 6.56 ഇഞ്ച് HD+ 90Hz LCD പാനൽ, യൂണിസോക് T606 ചിപ്പ്, ആൻഡ്രോയിഡ് 13, 8 മെഗാപിക്സൽ ഫ്രണ്ട് ക്യാമറ, 5,000mAh ബാറ്ററി (P55-ൽ 18W ചാർജിംഗ്) എന്നിവയുണ്ടാകും.

ഐടെൽ പവർ സീരീസിൽ മൂന്ന് ഫോണുകളാണ് കമ്പനി സ്ഥിരീകരിച്ചിട്ടുള്ളത്. അ‌തിൽ മൂന്നാമത്തെ മോഡൽ ഐടെൽ പി55T ആണ്. ഈ സ്മാർട്ട്ഫോണും മറ്റ് രണ്ട് മോഡലുകളിലേതിന് സമാനമായ ഫീച്ചറുകളുമായിട്ടാകും എത്തുക. എന്നാൽ മറ്റ് മോഡലുകളിൽനിന്ന് വ്യത്യസ്തമായി 6,000mAh ബാറ്ററി ഐടെൽ പി55T വാഗ്ദാനം ചെയ്യും. ഇതിന്റെ ലോഞ്ചും ​വൈകാതെ പ്രതീക്ഷിക്കാം.