വാട്സ്ആപ്പും യൂട്യൂബും സഹിതം പുതിയ ജിയോ ​പ്രൈമ 4ജി ഫീച്ചർഫോൺ അ‌വതരിപ്പിച്ച് റിലയൻസ്; ഡീൽ ആവേശകരം!

ഫീച്ചർ ഫോൺ വിപണിയിൽ മത്സരം ശക്തമാക്കിക്കൊണ്ട് റിലയൻസ് ജിയോ വീണ്ടും രംഗത്ത്. ഇന്ത്യൻ മൊ​ബൈൽ കോൺഗ്രസ് വേദിയിൽ തങ്ങളുടെ ഏറ്റവും പുതിയ ഫീച്ചർ ഫോണായ ജിയോ ​പ്രൈമ 4ജി (Jio Prima 4G) അ‌വതരിപ്പിച്ചുകൊണ്ടാണ് റിലയൻസ് ഇന്ത്യയിലെ ഫീച്ചർ ഫോൺ വിപണിയിൽ വൻ ചർച്ചകൾക്ക് തുടക്കമിട്ടിരിക്കുന്നത്.

ഒരു സാധാരണ ഫീച്ചർ ഫോണിൽ കാണുന്നതിനെക്കാൾ മികച്ച ഫീച്ചറുകൾ ജിയോ ​പ്രൈമ 4ജിയിൽ ഉപയോക്താവിന് ലഭിക്കും എന്നാണ് കമ്പനിയുടെ വെബ്​സൈറ്റിൽ ലിസ്റ്റ് ചെയ്തിരിക്കുന്ന ഈ ഫോണിന്റെ ഡീറ്റെയിൽസ് വെളിപ്പെടുത്തുന്നത്. ദീപാവലിയോട് അ‌ടുത്ത് ജിയോ ​പ്രൈമ 4ജി ഫീച്ചർഫോണിന്റെ വിൽപ്പന ആരംഭിക്കും എന്നാണ് റിപ്പോർട്ട്.

വിൽപ്പന ആരംഭിക്കുക ദീപാവലിക്കാണ് എന്ന് പറയുമ്പോൾ തന്നെ, ജിയോ ​പ്രൈമ 4ജി ഇപ്പോൾ ജിയോമാർട്ട് വെബ്‌സൈറ്റിൽ ഡീറ്റെയിൽസ് സഹിതം ലിസ്റ്റ് ചെയ്തിട്ടുണ്ട് എന്ന വിവരവും പുറത്തുവരുന്നുണ്ട്. വാട്സ്ആപ്പ്, യൂട്യൂബ് അ‌ടക്കമുള്ള ആപ്പുകൾ പ്രവർത്തിപ്പിക്കാൻ സാധിക്കും എന്നതാണ് ജിയോ ​പ്രൈമ 4ജിയുടെ പ്രധാന സവിശേഷതകളിലൊന്ന്.

ജിയോ ​പ്രൈമ 4ജി ​ഫീച്ചർ ഫോണിന്റെ സവിശേഷതകൾ: 320x240 പിക്സൽ റെസല്യൂഷനോട് കൂടിയ 2.4 ഇഞ്ച് TFT ഡിസ്പ്ലേയാണ് ഇതിലുള്ളത്. വൃത്താകൃതിയിലുള്ള അരികുകളുള്ള സ്റ്റാൻഡേർഡ് ഫീച്ചർ ഫോൺ ഡിസൈനും പിൻ പാനലിൽ കോൺസെൻട്രിക് സർക്കിൾ ഡിസൈനും ഈ ഫീച്ചർഫോൺ വാഗ്ദാനം ചെയ്യുന്നു.

ജിയോ ലോഗോ അ‌ടങ്ങുന്ന പിൻ പാനലിൽ വൃത്താകൃതിയിലുള്ള മൊഡ്യൂളിൽ ഫ്ലാഷ്ലൈറ്റ് സഹിതം ക്യാമറയും ഫ്രണ്ടിൽ 0.3 മെഗാപിക്സൽ ഫ്രണ്ട് ഫേസിംഗ് ക്യാമറയും നൽകിയിട്ടുണ്ട്. ARM കോർട്ടെക്സ് A53 പ്രോസസർ കരുത്താക്കിയാണ് ഈ ഫോൺ പ്രവർത്തിക്കുന്നത്. ഇതിൽ 512 എംബി റാം ആണ് എത്തുന്നത്.

മൈക്രോ എസ്ഡി കാർഡ് ഉപയോഗിച്ച് ജിയോ ​പ്രൈമ 4ജിയിലെ സ്റ്റോറേജ് ശേഷി 128 ജിബി വരെ വർദ്ധിപ്പിക്കാനും കഴിയും. KaiOS ഓപ്പറേറ്റിംഗ് സിസ്റ്റത്തിൽ ആണ് ഈ ജിയോ ഫോണും പ്രവർത്തിക്കുന്നത്. ശക്തമായ കണക്റ്റിവിറ്റിക്കായി ബ്ലൂടൂത്ത് 5.0, ​വൈ​ഫൈ എന്നിവയുടെ പിന്തുണയും ഉറപ്പാക്കിയിട്ടുണ്ട്.

ദീർഘനേരം നീണ്ടുനിൽക്കുന്ന ഉപയോഗം ലക്ഷ്യമിട്ട് 1800mAh ബാറ്ററിയും ജിയോ ഈ ഫോണിൽ നൽകിയിരിക്കുന്നു. വിനോദ ആവശ്യങ്ങൾക്കായി ഉപയോഗപ്പെടുത്താം എന്നതാണ് ജിയോ ​പ്രൈമ 4ജിയുടെ പ്രധാന സവിശേഷത. യൂട്യൂബ്, ജിയോ ടിവി, ജിയോ സിനിമ, ജിയോ സാവൻ, ജിയോ ന്യൂസ് തുടങ്ങിയ ആപ്പുകൾ ഇതിൽ പ്രീ-ഇൻസ്റ്റാൾ ചെയ്തിരിക്കുന്നു.

വാട്സ്ആപ്പ്, ഫെയ്സ്ബുക്ക് പോലുള്ള ആപ്പുകളുടെ പിന്തുണയും ജിയോ ​പ്രൈമ 4ജി ഉറപ്പാക്കിയിട്ടുണ്ട്. കൂടാതെ യാത്രകളിലും മറ്റും തങ്ങളുടെ പ്രിയപ്പെട്ട എഫ്എം സ്റ്റേഷനുകൾ ഉപയോക്താക്കൾക്ക് ലഭ്യമാക്കുന്നതിനായി എഫ്എം റേഡിയോ ഫീച്ചറും ഇതിലുണ്ട്. ഇതും കൂടാതെ, ജിയോ പേയും ഈ ഫീച്ചർ ഫോണിൽ ഉപയോഗിക്കാൻ സാധിക്കും.

നീല, മഞ്ഞ എന്നിങ്ങനെ രണ്ട് കളർ വേരിയന്റുകളിൽ ജിയോ ​​പ്രൈമ 5ജി വിൽപ്പനയ്ക്ക് എത്തുന്നു. ഒരു വർഷത്തെ വാറന്റിയും ഈ ഫോണിന് ജിയോ വാഗ്ദാനം ചെയ്യുന്നുണ്ട്. 2,599 രൂപ വിലയിലാകും ഈ ഫോൺ വിൽപ്പനയ്ക്ക് എത്തുക. ഉപയോക്താക്കൾക്ക് ജിയോ മാർട്ടിൽനിന്ന് ഈ ഫോൺ സ്വന്തമാക്കാം.

എന്നാൽ ദീപാവലിയോട് അ‌നുബന്ധിച്ചാണ് വിൽപ്പനയ്ക്ക് എത്തുന്നത് എന്നതി​നാൽ, ഓഫർ സഹിതം 2599 എന്ന യഥാർഥ വിലയെക്കാൾ കുറഞ്ഞ വിലയിൽ ഈ ഫോൺ വാങ്ങാൻ അ‌വസരം ഉണ്ടാകും. അ‌തേസമയം, ജിയോ മാർട്ട് പറയുന്നതനുസരിച്ച്, ഫോൺ ഇതിനകം തന്നെ കമ്പനിയുടെ ഇ-റീട്ടെയിൽ വെബ്‌സൈറ്റിൽ ലിസ്റ്റ് ചെയ്തിട്ടുണ്ട്. ഇത് നിലവിൽ ഡൽഹിയിലും മുംബൈയിലും ഡെലിവറിക്ക് ലഭ്യമാണ്.