സ്മാർട്ട്ഫോൺ പോലൊരു ഫീച്ചർ ഫോൺ! അ‌ംബാനിയുടെ ദീപാവലി 'സമ്മാനം' ആമസോണിൽ വിൽപ്പനയ്ക്ക് എത്തി

അ‌ടുത്തിടെ നടന്ന ഇന്ത്യൻ മൊബൈൽ കോൺഗ്രസ് 2023ൽ ജിയോ അ‌വതരിപ്പിച്ച ഏറ്റവും പുതിയ 4ജി ഫീച്ചർ ഫോണായ ജിയോ പ്രൈമ ( Jio Prima) യുടെ വിൽപ്പന ഇന്ത്യയിൽ ആരംഭിച്ചു. ഫീച്ചർ ഫോണാണെങ്കിലും സ്മാർട്ട്ഫോണുകളിൽ കാണുന്ന ചില ആപ്പുകളുടെ സാന്നിധ്യമാണ് ജിയോ ഫോൺ ​പ്രൈമയെ ശ്രദ്ധേയമാക്കുന്നത്.

ഫീച്ചർ ഫോണുകളിൽ സാധാരണയായി കാണാത്ത വാട്സ്ആപ്പ്, യൂട്യൂബ് അ‌ടക്കമുള്ള ആപ്പുകൾ വാഗ്ദാനം ചെയ്യുന്നു എന്നതാണ് മറ്റ് ഫീച്ചർ ഫോണുകളിൽ നിന്ന് ജിയോ ​പ്രൈമ 4ജിയെ വേറിട്ട് നിർത്തുന്നത്. ജിയോ ​പ്രൈമയിലൂടെ 4ജി ഫീച്ചർ ഫോണുകളുടെ നിലവാരം അ‌ടുത്ത ഘട്ടത്തിലേക്ക് ജിയോ മെച്ചെപ്പെടുത്തി എന്നുതന്നെ പറയാം.

ഇന്ത്യൻ മൊ​ബൈൽ കോൺഗ്രസിൽ അ‌വതരിപ്പിച്ചതിന് പിന്നാലെ ദീപാവലിയോട് അ‌ടുത്ത് ജിയോ ​പ്രൈമ ഫോൺ ഇന്ത്യയിൽ വിൽപ്പനയ്ക്ക് എത്തുമെന്ന് ജിയോ അ‌റിയിച്ചിരുന്നു. പറഞ്ഞ വാക്ക് പാലിച്ചുകൊണ്ട് ദീപാവലിക്ക് മുൻപ് ഇപ്പോൾ ഈ ഫോൺ ജിയോ ഇന്ത്യയിൽ വാങ്ങാനായി ലഭ്യമാക്കിയിരിക്കുന്നു. 2,599 രൂപ വിലയിലാണ് ഈ 4ജി ഫീച്ചർ ഫോൺ വിൽപ്പനയ്ക്ക് എത്തുന്നത്.

റിലയൻസ്ഡിജിറ്റൽ. ഇൻ (RelianceDigital.in), ജിയോമാർട്ട് ഇലക്ട്രോണിക്സ്, ആമസോൺ എന്നിവിടങ്ങളിൽ നിന്ന് ഓൺലൈനായും അംഗീകൃത റീട്ടെയിൽ സ്റ്റോറുകളിൽ നിന്ന് ഓഫ്‌ലൈനായും ജിയോ ​പ്രൈമ ഫോൺ വാങ്ങാം. നീല, മഞ്ഞ എന്നിങ്ങനെ രണ്ട് കളർ വേരിയന്റുകളിൽ ജിയോ ​​പ്രൈമ 5ജി വിൽപ്പനയ്ക്ക് എത്തുന്നു. ഒരു വർഷത്തെ വാറന്റിയും ഈ ഫോണിന് ജിയോ വാഗ്ദാനം ചെയ്യുന്നുണ്ട്.

ഒരു സാധാരണ ഫീച്ചർ ഫോണിൽ കാണുന്നതിനെക്കാൾ മികച്ച ഫീച്ചറുകൾ ജിയോ ​പ്രൈമ 4ജിയിൽ ഉപയോക്താവിന് ലഭിക്കും എന്നാണ് കമ്പനിയുടെ വെബ്​സൈറ്റിൽ ലിസ്റ്റ് ചെയ്തിരിക്കുന്ന ഈ ഫോണിന്റെ ഡീറ്റെയിൽസ് വെളിപ്പെടുത്തുന്നത്. ഫീച്ചർ ഫോൺ വിപണിയിൽ മത്സരം ശക്തമാക്കിക്കൊണ്ട് റിലയൻസ് ജിയോ അ‌വതരിപ്പിച്ച ജിയോ ​പ്രൈമ ഫോണിന്റെ പ്രധാന ഫീച്ചറുകൾ കൂടി പരിചയപ്പെടാം.

320x240 പിക്സൽ റെസല്യൂഷനോട് കൂടിയ 2.4 ഇഞ്ച് TFT ഡിസ്പ്ലേയാണ് ജിയോ ​പ്രൈമയിൽ ഉള്ളത്. വൃത്താകൃതിയിലുള്ള എഡ്ജുകളുള്ള സ്റ്റാൻഡേർഡ് ഫീച്ചർ ഫോൺ ഡിസൈനും, പിൻ പാനലിൽ കോൺസെൻട്രിക് സർക്കിൾ ഡിസൈനും ജിയോ​ പ്രൈമ വാഗ്ദാനം ചെയ്യുന്നു. ജിയോ ലോഗോ അ‌ടങ്ങുന്ന ബായ്ക്ക് പാനലിൽ ഫ്ലാഷ്ലൈറ്റ് സഹിതം ക്യാമറയും ഫ്രണ്ടിൽ 0.3 മെഗാപിക്സൽ ക്യാമറയും നൽകിയിട്ടുണ്ട്.

ARM കോർട്ടെക്സ് A53 പ്രോസസർ കരുത്താക്കിയാണ് ഈ ഫോൺ പ്രവർത്തിക്കുന്നത്. 512 എംബി ആണ് റാം. മൈക്രോ എസ്ഡി കാർഡ് ഉപയോഗിച്ച് സ്റ്റോറേജ് 128 ജിബി വരെ വർദ്ധിപ്പിക്കാം. KaiOS ഓപ്പറേറ്റിംഗ് സിസ്റ്റത്തിൽ ആണ് ഈ ജിയോ ​പ്രൈമ ഫീച്ചർ ഫോൺ പ്രവർത്തിക്കുന്നത്.

ശക്തമായ കണക്റ്റിവിറ്റിക്കായി ബ്ലൂടൂത്ത് 5.0, ​വൈ​ഫൈ എന്നിവയുണ്ട്. വാട്സ്ആപ്പ്, ഫെയ്സ്ബുക്ക് പോലുള്ള ആപ്പുകളുടെ പിന്തുണയും ജിയോ ​പ്രൈമ 4ജി ഉറപ്പാക്കിയിട്ടുണ്ട്. യൂട്യൂബ്, ജിയോ ടിവി, ജിയോ സിനിമ, ജിയോ സാവൻ, ജിയോ ന്യൂസ് തുടങ്ങിയ ആപ്പുകൾ ഇതിൽ പ്രീ-ഇൻസ്റ്റാൾ ചെയ്തിരിക്കുന്നു. അ‌തിനാൽത്തന്നെ സാധാരണ ഫോണിലും എന്റർടെയ്ൻമെന്റ് സാധ്യമാകുന്നു.

പണമിടപാടുകൾക്കായി ജിയോ പേ സൗകര്യവും ഈ ഫീച്ചർ ഫോണിൽ നൽകിയിരിക്കുന്നു. കൂടാതെ യാത്രകളിലും മറ്റും തങ്ങളുടെ പ്രിയപ്പെട്ട എഫ്എം സ്റ്റേഷനുകൾ ഉപയോക്താക്കൾക്ക് ലഭ്യമാക്കുന്നതിനായി എഫ്എം റേഡിയോ ഫീച്ചറും ഉണ്ട്. കുറഞ്ഞ വിലയ്ക്ക് ഒരു ഫോൺ വാങ്ങാൻ ആഗ്രഹിക്കുന്നവർക്ക് പരിഗണിക്കാവുന്ന മികച്ച ഫീച്ചർ ഫോണാണ് പുതിയ ജിയോ ​പ്രൈമ.