കാർബൺ തിരിച്ചുവരുന്നു! 'റെബൽ 5ജി' ആമസോണിൽ; ബജറ്റ് വിപണിയിൽ ഇനി തീപാറും

ഇന്ത്യൻ സ്‌മാർട്ട്‌ഫോൺ വിപണിയിലേക്ക് ശക്തമായ തിരിച്ചുവരവിനൊരുങ്ങുകയാണ് കാർബൺ (Karbonn). 'റെബൽ 5ജി' (Rebel 5G) എന്ന് പേരിട്ടിരിക്കുന്ന പുതിയ ഫോണിന്റെ ടീസർ പേജ് ആമസോൺ ഇന്ത്യയിൽ നിശബ്ദമായി തത്സമയമായി. ഫോണിന്റെ ഫീച്ചറുകളോ റിലീസ് തീയതിയോ ഇതുവരെ വെളിപ്പെടുത്തിയിട്ടില്ലെങ്കിലും, ബ്രാൻഡിനെ ഓർക്കുന്ന ബജറ്റ് ഉപഭോക്താക്കളെ ലക്ഷ്യമിട്ട് ആമസോൺ വഴി ഫോൺ ഉടൻ വിപണിയിലെത്തുമെന്നാണ് സൂചന.

സാങ്കേതിക വിവരങ്ങൾ നൽകുന്നതിന് പകരം ആകർഷകമായ ടാഗ്‌ലൈനുകളോടെയാണ് ആമസോൺ ടീസർ ഒരുക്കിയിരിക്കുന്നത്. "പദവിയല്ല സവിശേഷത" (Status isn’t a specification), "വില പേടിക്കേണ്ട, ഫോൺ തകർപ്പനാണ്" (All of the phone, none of the price shock), "ആരെയും അനുകരിക്കേണ്ട, റെബലാവൂ" (Don’t follow, just rebel) എന്നിവയാണ് ശ്രദ്ധേയമായ ചില വാചകങ്ങൾ. വലിയ അവകാശവാദങ്ങളില്ലാതെ, പോക്കറ്റിലൊതുങ്ങുന്ന വിലയിൽ മികച്ച പ്രകടനം നൽകുന്നൊരു ഫോണാവും ഇതെന്ന് ഈ സന്ദേശങ്ങൾ വ്യക്തമാക്കുന്നു. ക്യാമറ, പ്രൊസസ്സർ, സോഫ്റ്റ്‌വെയർ വിവരങ്ങൾ കമ്പനി തൽക്കാലം രഹസ്യമായി സൂക്ഷിച്ചിരിക്കുകയാണ്.

ബജറ്റ് ഫോൺ സൂചന നൽകി കാർബൺ റെബൽ 5ജി ആമസോൺ പേജ്

ആർഭാടങ്ങളേക്കാൾ ഫോണിന്റെ കാര്യക്ഷമതയ്ക്ക് മുൻഗണന നൽകുന്ന ഉപഭോക്താക്കൾക്കായിട്ടാണ് 'കാർബൺ റെബൽ 5ജി' അവതരിപ്പിക്കുന്നത്. നിലവിൽ ഫോണിന്റെ വിലയോ ലോഞ്ച് തീയതിയോ പേജിൽ നൽകിയിട്ടില്ല. വരും ദിവസങ്ങളിൽ കൂടുതൽ ടീസറുകളിലൂടെ വിവരങ്ങൾ പുറത്തുവിടുമെന്നാണ് പ്രതീക്ഷിക്കുന്നത്. ലോഞ്ച് അപ്‌ഡേറ്റുകൾ വേഗത്തിൽ അറിയാൻ ആമസോൺ മൈക്രോസൈറ്റിലെ 'നോട്ടിഫൈ മി' (Notify Me) ഓപ്ഷൻ പരിശോധിക്കാവുന്നതാണ്.

മുൻപ്, ഭീം (BHIM) യുപിഐ സേവനം ഇൻബിൽറ്റായി എത്തിച്ച കെ9 കവാച്ച് 4ജി (K9 Kavach 4G), ആമസോണിലൂടെ വൻ ജനപ്രീതി നേടിയ ടൈറ്റാനിയം മാക് ഫൈവ് (Titanium Mach Five) തുടങ്ങിയ ഫോണുകളിലൂടെ ഇന്ത്യൻ ബജറ്റ് വിപണിയിൽ ശ്രദ്ധനേടിയ ബ്രാൻഡാണ് കാർബൺ. വിപണിയിലേക്കുള്ള കാർബണിന്റെ തിരിച്ചുവരവിനെക്കുറിച്ച് അഭ്യൂഹങ്ങൾ ശക്തമായിരുന്നെങ്കിലും, ഈ ആമസോൺ ടീസർ പേജോടെ അത് ഔദ്യോഗികമായി സ്ഥിരീകരിക്കപ്പെട്ടിരിക്കുകയാണ്.

കാർബൺ റെബൽ 5ജി: പ്രതീക്ഷിക്കുന്ന വിലയും എതിരാളികളും

ടാഗ്‌ലൈനുകൾ സൂചിപ്പിക്കുന്നത് ഫോണിന് വളരെ ആകർഷകമായ വിലയായിരിക്കും എന്നാണ്. 15,000 രൂപയ്ക്കും 20,000 രൂപയ്ക്കും ഇടയിലുള്ള ജനപ്രിയ 5ജി സെഗ്‌മെന്റിലായിരിക്കും ഇത് എത്തിയേക്കുക. ആദ്യമായി 5ജി ഫോൺ വാങ്ങുന്നവരെ ലക്ഷ്യമിടുന്ന ലാവ (Lava), മോട്ടറോള (Motorola), റെഡ്മി (Redmi) എന്നിവരാവും പ്രധാന എതിരാളികൾ. പ്രൊസസ്സർ, ബാറ്ററി ലൈഫ്, ഒഎസ് അപ്‌ഡേറ്റുകൾ, ബ്ലോട്ട്‌വെയറുകളുടെ സാന്നിധ്യം എന്നിവയെ അടിസ്ഥാനമാക്കിയാവും വിപണിയിലെ വിജയം. എന്തായാലും "വില പേടിക്കേണ്ട" എന്ന ഉറപ്പ് തന്നെയാണ് നിലവിൽ ഫോണിന്റെ ഏറ്റവും വലിയ ആകർഷണം.