പേരിലൊരു പവറൊക്കെയുണ്ട്, യഥാർഥ പവർ 30 ന് അ‌റിയാം; മോട്ടോ ജി24 പവർ എത്തുന്നു

മോട്ടറോളയുടെ പുതിയ സ്മാർട്ട്ഫോണിന്റെ പവർ എന്താണ് എന്ന് ഇന്ത്യക്കാർക്ക് ജനുവരി 30 ന് അ‌റിയാം. മോട്ടോ ജി24 പവർ സ്മാർട്ട്ഫോണിന്റെ ഇന്ത്യയിലെ ലോഞ്ച് ജനുവരി 30 ന് നടക്കുമെന്ന് മോട്ടറോള ഔദ്യോഗിക ട്വിറ്റർ അ‌ക്കൗണ്ടിലൂടെ സ്ഥിരീകരിച്ചു. പേരിലുള്ള പവർ പോലെ തന്നെ ഉള്ളിലും പവറുമായിട്ടായിരിക്കും വരവ്.

ഉടൻ എത്താൻ പോകുന്ന മോട്ടോ ജി 24 പവർ ( Moto G24 Power ) സ്മാർട്ട്ഫോണിൽ മോട്ടറോളയുടെ ഐക്കണിക് എം ലോഗോ അവതരിപ്പിക്കുന്നു, പിന്നിലെ രണ്ട് ക്യാമറ ലെൻസുകൾക്കും ഒരു ഫ്ലാഷ്‌ലൈറ്റ് മൊഡ്യൂളിനും ഒപ്പം ഈ ലോഗോ സ്ഥാനം പിടിച്ചിരിക്കുന്നു.

ലോഞ്ച് ഡേറ്റ് സ്ഥിരീകരിച്ചതിനപ്പുറം, മോട്ടോ ജി24 പവറിന്റെ പ്രധാന ഫീച്ചറുകളെപ്പറ്റിയും കമ്പനി ഔദ്യോഗികമായി ചില വിവരങ്ങൾ പുറത്തുവിട്ടിട്ടുണ്ട്. കൂടാതെ വിവിധ ലീക്ക് റിപ്പോർട്ടുകളിലൂടെയും ഈ വിവരങ്ങളെല്ലാം ഇതിനകം ഓൺ​ലൈനിൽ പ്രത്യക്ഷപ്പെട്ടിട്ടുണ്ട്. ഗ്ലേസിയർ ബ്ലൂ, ഇങ്ക് ബ്ലൂ നിറങ്ങളിൽ മോട്ടോ ജി24 ഇന്ത്യയിൽ ലഭ്യമാകുമെന്നാണ് റിപ്പോർട്ട്.

മോട്ടോ ജി24 പവർ സ്മാർട്ട്ഫോണിലെ പ്രധാന ഫീച്ചറുകൾ: മോട്ടോ G24 പവറിൽ 6.56 ഇഞ്ച് LCD HD+ ഡിസ്പ്ലേ സജ്ജീകരിച്ചിരിക്കുന്നു, 1612 x 720 പിക്സൽ റെസലൂഷൻ ഈ ഡിസ്പ്ലേ വാഗ്ദാനം ചെയ്യുന്നു. മീഡിയടെക് ഹീലിയോ ജി85 പ്രോസസറായിരിക്കും ഈ ഫോണിൽ ഉണ്ടായിരിക്കുക.

8GB റം, 128GB സ്റ്റോറേജ് കോൺഫിഗറേഷനിലായിരിക്കും ഈ മോട്ടറോള ഫോൺ എത്തുക. ഡ്യുവൽ റിയർ ക്യാമറ സജ്ജീകരണമാണ് മോട്ടോ ജി24 പവർ അ‌വതരിപ്പിക്കുകയെന്നാണ് റിപ്പോർട്ട്. 50എംപി ക്വാൽ പിക്സൽ മെയിൻ ക്യാമറയും 2എംപി മാക്രോ സ്നാപ്പറും ഉൾപ്പെടുന്നതായിരിക്കും ഇതിലെ റിയർ ക്യാമറ സജ്ജീകരണം. ഫ്രണ്ടിൽ 8MP സെൽഫി ഷൂട്ടറും ഉണ്ടാകും.

ആൻഡ്രോയിഡ് 14 അ‌ടിസ്ഥാനമാക്കിയുള്ള ​​മൈ യുഎക്സിലായിരിക്കും മോട്ടോ ജി24 പവർ സ്മാർട്ട്ഫോണിന്റെ പ്രവർത്തനം. ഇതിന് മൂന്ന് വർഷത്തെ സുരക്ഷാ അപ്‌ഡേറ്റുകൾക്കൊപ്പം ഒരു ആൻഡ്രോയിഡ് ഒഎസ് അപ്‌ഗ്രേഡും മോട്ടറോള വാഗ്ദാനം ചെയ്യുമെന്നാണ് റിപ്പോർട്ട്. 30W ചാർജിംഗ് പിന്തുണയുള്ള 6,000mAh ബാറ്ററിയായിരിക്കും ഇതിൽ ഉണ്ടാകുക.

ഈ ഫോണിന്റെ ​സൈഡുകൾ ഫ്ലാറ്റാണ്. പവർ, വോളിയം കൺട്രോളുകൾ ഉൾപ്പെടെ എല്ലാ ബട്ടണുകളും വലതുവശത്ത് ഉൾക്കൊള്ളുന്നു, ഇടത് വശം സിം കാർഡ് ട്രേയ്ക്കായി സമർപ്പിച്ചിരിക്കുന്നു. മുൻഭാഗം ഒരു പഞ്ച് ഹോൾ കട്ട്ഔട്ടും പ്രമുഖ കറുത്ത ബോർഡറുകളും സഹിതമാണ് എത്തുന്നത്. ഹെഡ്‌ഫോൺ ജാക്ക് മുകളിലാണ്.

മോട്ടോ ജി24 പവറിന്റെ താഴെ വശത്ത് യുഎസ്ബി സി പോർട്ട്, സ്പീക്കർ ഗ്രിൽ, മൈക്ക് ഓപ്പണിംഗുകൾ എന്നിവ നൽകിയിരിക്കുന്നു. കമ്പനിയുടെ ഔദ്യോഗിക വെബ്‌സൈറ്റ്, ഫ്ലിപ്പ്കാർട്ട്, ഇന്ത്യയിലെ പ്രധാന റീട്ടെയിൽ സ്റ്റോറുകൾ എന്നിവ വഴി വാങ്ങാൻ ലഭ്യമാകും. ഈ ഫോണിന്റെ വിലയെപ്പറ്റിയുള്ള വിവരങ്ങൾ ഇപ്പോഴും അ‌വ്യക്തമാണ്.

എങ്കിലും ഇന്ത്യയിലെ സവിശേഷ സാഹചര്യം പരിഗണിക്കുമ്പോൾ ഏകദേശം 10000 രൂപ വിലയിൽ ആയിരിക്കും ജനുവരി 30 ന് മോട്ടറോള മോട്ടോ ജി24 പവർ ഇന്ത്യയിൽ അ‌വതരിപ്പിക്കുക. ലോഞ്ച് ഓഫർ എന്ന നിലയിൽ ബാങ്ക് ഓഫറുകൾ വഴി ആകർഷകമായ ഡിസ്കൗണ്ടുകളും ഉപയോക്താക്കൾക്ക് പ്രതീക്ഷിക്കാവുന്നതാണ്.

അ‌തേസമയം, ഇപ്പോൾ ഇന്ത്യയിലെ മോട്ടറോള ആരാധകർക്ക് സന്തോഷം പകരുന്ന മറ്റൊരു വാർത്തകൂടി എത്തിയിട്ടുണ്ട്. മോട്ടറോളയുടെ പ്രീമിയം സ്മാർട്ട്ഫോണുകളിൽ ഒന്നായ മോട്ടോ റേസർ 40 അൾട്രയുടെ വിലയിൽ 20000 രൂപ കമ്പനി കുറച്ചിരിക്കുന്നു എന്നതാണ് അ‌ത്. 89, 999 രൂപയുടെ ഈ ഫോൺ ഇപ്പോൾ 69,999 രൂപയ്ക്ക് വാങ്ങാൻ സാധിക്കും.