​ചൈനയെ കൊതിപ്പിച്ച സ്മാർട്ട്ഫോൺ ഇനി ഇന്ത്യക്കും സ്വന്തം! മോട്ടോ G85 5G ചില്ലറക്കാരനല്ല

മോട്ടറോള ഇന്ത്യയിൽ പുതിയ സ്മാർട്ട്ഫോൺ അ‌വതരിപ്പിക്കാൻ തയാ​റെടുത്തിരിക്കുന്നു. ജൂ​ലൈ 10ന് മോട്ടോ ജി85 5ജി (moto g85 5G) എന്ന ജി സീരീസ് സ്മാർട്ട്ഫോൺ ഇന്ത്യയിൽ ലോഞ്ച് ചെയ്യുമെന്ന് മോട്ടറോള സ്ഥിരീകരിച്ചു. ഇതിന്റെ ടീസർ ഫ്ലിപ്പ്കാർട്ടിലൂടെ പുറത്തുവന്നിട്ടുണ്ട്. അ‌തിനാൽ മോട്ടറോളയുടെ വെബ്​സൈറ്റിന് പുറമേ ഫ്ലിപ്പ്കാർട്ട് വഴിയും ഈ സ്മാർട്ട്ഫോൺ വാങ്ങാനാകും എന്ന കാര്യവും ഉറപ്പിക്കപ്പെട്ടിരിക്കുന്നു. മിഡ് റേഞ്ച് സെഗ്മെന്റിൽ ആയിരിക്കും മോട്ടോ ജി85 5ജി ലോഞ്ച്​ ചെയ്യുക. കോബാൾട്ട് ബ്ലൂ, അർബൻ ഗ്രേ, ഒലിവ് ഗ്രീൻ എന്നീ നിറങ്ങളിൽ ഈ സ്മാർട്ട്ഫോൺ വിപണിയിൽ ലഭ്യമാകും.

ഇന്ത്യയിൽ എത്തുന്നതിന് മുൻപ് മറ്റൊരു പേരിൽ ​ചൈനയിൽ ലോഞ്ച് ചെയ്യപ്പെടുകയും ലോകത്തിന്റെയാകെ ശ്രദ്ധ പിടിച്ചുപറ്റുകയും ചെയ്ത ഒരു ചരിത്രവും മോട്ടോ ജി85 5ജിക്ക് ഉണ്ട്. ​ചൈനയിൽ മോട്ടോ S50 നിയോ എന്ന പേരിൽ ലോഞ്ച് ചെയ്യപ്പെട്ട സ്മാർട്ട്ഫോൺ ആണ് ഇന്ത്യയിലേക്ക് ജി85 5ജി എന്ന പേരിൽ ജൂ​ലൈ 10ന് എത്തുന്നത്.

​ചൈനയിൽ ലോഞ്ച് ചെയ്യപ്പെട്ട മോട്ടോ S50 നിയോ 4 വർഷ വാറന്റി വാഗ്ദാനം ചെയ്തിരുന്നു. ഇത്രയും ​ദൈർഘ്യമുള്ള വാറന്റി നൽകുന്ന ലോകത്തെ ആദ്യ സ്മാർട്ട്ഫോൺ എന്ന നിലയ്ക്ക് മോട്ടോ S50 നിയോയുടെ പ്രശസ്തി ലോകമെമ്പാടുമുള്ള മൊ​ബൈൽ വിപണികളിൽ എത്തി. Meizu ൻ്റെ 20, 21 സീരീസ് പ്രത്യേക പ്രമോഷനായി 3 വർഷത്തെ വാറൻ്റി വാഗ്ദാനം ചെയ്തതാണ് ഇതിന് മുൻപുണ്ടായിരുന്ന വാറന്റി റെക്കോഡ്.

മോട്ടോ S50 നിയോയിലെ ​അ‌തേ ഫീച്ചറുകളുമായി മോട്ടോ ജി85 5ജി എന്ന പേരിൽ ഇന്ത്യ അ‌ടക്കമുള്ള മറ്റ് വിപണികളിലേക്ക് എത്തുമ്പോൾ വാറന്റിയുടെ കാര്യം മാത്രം ​ചൈനീസ് മോഡലിൽ നിന്ന് വ്യത്യസ്തമായിരിക്കും. ഇന്ത്യയിൽ മോട്ടോ ജി85 5ജി 4 വർഷ വാറന്റി നൽകാൻ സാധ്യതയില്ല. എങ്കിലും മറ്റ് ഫീച്ചറുകളുടെ ബലത്തിൽ മിഡ് റേഞ്ച് സെഗ്മെന്റിന്റെ ശ്രദ്ധ പിടിച്ചുപറ്റാൻ ഈ ഫോണിന് കഴിഞ്ഞേക്കും.

മോട്ടോ ജി85 5ജിയിലെ പ്രധാന ഫീച്ചറുകൾ: സ്നാപ്ഡ്രാഗൺ 6s ജെൻ 3 ചിപ്‌സെറ്റാണ് ഈ സ്മാർട്ട്ഫോണിന്റെ കരുത്ത്. 8GB + 128GB, 12GB + 256GB എന്നീ വേരിയന്റുകളിൽ ഈ സ്മാർട്ട്ഫോൺ ഇന്ത്യയിൽ എത്തുമെന്ന് സ്ഥിരീകരിക്കപ്പെട്ടിട്ടുണ്ട്. പൊടി, ജല പ്രതിരോധം എന്നിവയ്ക്കായി IP52 റേറ്റിങ്ങോടെയാണ് ഈ ഫോൺ എത്തുക.

ആൻഡ്രോയിഡ് 14 അ‌ടിസ്ഥാനമാക്കിയാണ് മോട്ടോ ജി85 5ജിയുടെ പ്രവർത്തനം. 2 വർഷത്തെ ആൻഡ്രോയിഡ് അപ്‌ഡേറ്റുകളും 3 വർഷത്തെ സുരക്ഷാ അപ്‌ഡേറ്റുകളും ഈ ഫോണിന് ലഭിക്കുമെന്ന് കമ്പനി സ്ഥിരീകരിച്ചു. വീഗൻ ലെതർ ഫിനിഷ് പിന്തുണയോടെയാണ് ഈ മോട്ടറോള ഫോൺ ഇന്ത്യയിൽ എത്തുകയെന്നും സ്ഥിരീകരിച്ചിട്ടുണ്ട്.

മോട്ടോ ജി85 5ജിയുടെ മറ്റ് ഫീച്ചറുകൾ കമ്പനി ഔദ്യോഗികമായി വെളിപ്പെടുത്തിയിട്ടില്ല. എങ്കിലും ഇതിനകം ലോഞ്ച് ചെയ്ത മോഡൽ ആയതിനാൽ ഈ ഫോണിൽ ഉണ്ടാകാവുന്ന ഫീച്ചറുകൾ എന്തൊക്കെയാണ് എന്നത് വ്യക്തമാണ്. 6.67 ഇഞ്ച് (2400×1080 പിക്സലുകൾ) പോൾഇഡി ഡിസ്‌പ്ലേ (FHD+ 120Hz) ആണ് ഇതിലുള്ളത്. സുരക്ഷയ്ക്കായി അണ്ടർ-ഡിസ്‌പ്ലേ ഫിംഗർപ്രിൻ്റ് സ്കാനറും ഉണ്ട്.

LPDDR4x റാം, UFS 2.2 സ്റ്റോറേജ്, 13 5G ബാൻഡുകളുടെ പിന്തുണ, യുഎസ്ബി ടൈപ്പ്-സി ഓഡിയോ, സ്റ്റീരിയോ സ്പീക്കറുകൾ, ഡോൾബി അറ്റ്‌മോസ്, ഡ്യുവൽ മൈക്രോഫോണുകൾ, 5G SA/NSA, ഡ്യുവൽ 4G VoLTE, ഉൾപ്പെടെയുള്ള കണ്ക്ടിവിറ്റി ഓപ്ഷനുകൾ, 30W ടർബോചാർജിംഗോടുകൂടിയ 5000mAh ബാറ്ററി എന്നിവയെല്ലാം ഇതിൽ ഉണ്ടാകും.

ഡ്യുവൽ റിയർ ക്യാമറ സജ്ജീകരണമാണ് മോട്ടോ ജി85 5ജിയിൽ നൽകിയിരിക്കുന്നത്. അ‌തിൽ OIS, 1/1.95″ സോണി LYT-600 സെൻസറോട് കൂടിയ 50MP മെയിൻ ക്യാമറ, f/2.2 അപ്പേർച്ചറുള്ള 8MP 118° അൾട്രാ വൈഡ് /മാക്രോ ക്യാമറ എന്നിവ ഉൾപ്പെടുന്നു. ഫ്രണ്ടിൽ പഞ്ച് ഹോൾ കട്ടൗട്ടിൽ f/2.45 അപ്പേർച്ചർ ഉള്ള 32MP ക്യാമറയും ഉണ്ട്.