ഒന്ന് നിക്കണേ... ഞാൻ ദേ എത്തി! മോട്ടറോള റേസർ 50 അൾട്ര ഇനി ഇന്ത്യയുടെ സ്വത്ത്

കഴിഞ്ഞ ദിവസം ​ചൈനയിൽ നടന്ന ലോഞ്ചിൽ മോട്ടറോള റേസർ 50, റേസർ 50 അൾട്ര എന്നീ സ്മാർട്ട്ഫോണുകൾ ലോഞ്ച് ചെയ്തിരുന്നു. ​ചൈനയെക്കൂടാതെ വടക്കേ അമേരിക്ക, യൂറോപ്പ്, യുകെ എന്നിവയുൾപ്പെടെയുള്ള തെരഞ്ഞെടുത്ത വിപണികളിലും ഈ ഫോൺ ലോഞ്ച് ചെയ്തു. ലോഞ്ചായി ഒരു ദിവസം മാത്രം പിന്നിടവേ ഇപ്പോൾ റേസർ 50 സീരീസിലെ ഏറ്റവും മികച്ച സ്മാർട്ട്ഫോൺ ആയ മോട്ടോ റേസർ 50 അ‌ൾട്രയുടെ (Moto Razr 50 Ultra) ഇന്ത്യൻ ലോഞ്ചും കമ്പനി പ്രഖ്യാപിച്ചിരിക്കുന്നു. ജൂ​ലൈ 4ന് ഈ ഫോൾഡബിൾ സ്മാർട്ട്ഫോൺ മോട്ടറോള ഇന്ത്യയിൽ അ‌വതരിപ്പിക്കും.

മോട്ടോ ഐ, ഗൂഗിൾ ജെമിനി ഇൻ്റഗ്രേഷൻ തുടങ്ങിയ ഫീച്ചറുകൾ സഹിതമാണ് മോട്ടോ റേസർ 50 അ‌ൾട്ര എത്തുന്നത്. കഴിഞ്ഞ ദിവസം ലോഞ്ച് ആയതിനാൽ തന്നെ ഈ സ്മാർട്ട്ഫോണിലെ ഫീച്ചറുകൾ ഇതിനകം വ്യക്തമാണ്. ഫ്ലിപ്പ് സ്റ്റൈലിൽ എത്തുന്ന ഈ ഫോൾഡബിൾ സ്മാർട്ട്ഫോൺ ആമസോൺ വഴിയാണ് ഇന്ത്യയിൽ ലഭ്യമാകുക. ഇക്കാര്യം ഇതിനകം സ്ഥിരീകരിക്കപ്പെട്ടിട്ടുണ്ട്.

മോട്ടോ റേസർ 50 അ‌ൾട്രയുടെ പ്രധാന ഫീച്ചറുകൾ: 1-165Hz റിഫ്രഷ് റേറ്റ് ഉള്ള 6.9 ഇഞ്ച് FHD+ ഇന്റേണൽ ഫോൾഡബിൾ pOLED സ്‌ക്രീൻ, 1-165Hz 4-ഇഞ്ച് FHD+ ഔട്ടർ pOLED സ്‌ക്രീൻ എന്നിവ ഇതിൽ എത്തുന്നു. കോർണിംഗ് ഗൊറില്ല ഗ്ലാസ് വിക്‌റ്റസ് പ്രൊട്ടക്ഷനും ഇതിലുണ്ട്.

അഡ്രിനോ 735 GPU ഉള്ള ഒക്ട കോർ സ്‌നാപ്ഡ്രാഗൺ 8s Gen 3 4nm ചിപ്സെറ്റ് ആണ് ഈ സ്മാർട്ട്ഫോണിന്റെ ശക്തി. 12GB LPDDR5X റാം, 256GB / 512GB UFS 4.0 സ്റ്റോറേജ് എന്നിവയും ഉണ്ട്. ആൻഡ്രോയിഡ് 14 അ‌ടിസ്ഥാനമാക്കിയാണ് പ്രവർത്തനം.

f/1.79 അപ്പേർച്ചർ, OIS, 1/1.95″ സെൻസർ എന്നിവയുള്ള 50MP മെയിൻ ക്യാമറ + 1/1.95″ സെൻസറുള്ള 50MP 2x ടെലിഫോട്ടോ ക്യാമറ എന്നിവയും f/2.4 അപ്പേർച്ചർ ഉള്ള 32MP ഫ്രണ്ട് ക്യാമറയും അ‌ടങ്ങുന്നതാണ് മോട്ടോ റേസർ 50 അ‌ൾട്രയിലെ ക്യാമറ സജ്ജീകരണം.

ഡ്യുവൽ സിം (eSIM + നാനോ), യുഎസ്ബി ടൈപ്പ്-സി ഓഡിയോ, സ്റ്റീരിയോ സ്പീക്കറുകൾ, ഡോൾബി അറ്റ്‌മോസ്, സൈഡ് മൗണ്ടഡ് ഫിംഗർപ്രിൻ്റ് സ്കാനർ, IPX8 വാട്ടർ റെസിസ്റ്റൻ്റ്, 5G SA/NSA, ഡ്യുവൽ 4G VoLTE, Wi-Fi 6E 802.11ax (2.4GHz/5GHz) MIMO, ബ്ലൂടൂത്ത് 5.3, GPS, യുഎസ്ബി ​ടൈപ്പ് സി തുടങ്ങിയവയും ഇതിലുണ്ട്.

44W ടർബോപവർ ഫാസ്റ്റ് ചാർജിംഗ്, 15W വയർലെസ് ചാർജിംഗ് പിന്തുണയോടെ എത്തുന്ന 4000mAh ബാറ്ററിയാണ് റേസർ 50 അ‌ൾട്രയിലുള്ളത്. ഇന്ത്യൻ ലോഞ്ചിന് മുന്നോടിയായുള്ള ആമസോൺ ലിസ്റ്റിങ് ഈ ഫീച്ചറുകൾ വ്യക്തമാക്കുന്നുണ്ട്. മോട്ടോ റേസർ 50 അൾട്രായുടെ ഇന്ത്യൻ വേരിയൻ്റ് മിഡ്‌നൈറ്റ് ബ്ലൂ, സ്പ്രിംഗ് ഗ്രീൻ, പീച്ച് ഫസ് കളർ ഓപ്ഷനുകളിൽ ലഭ്യമാകും.

മോട്ടറോള റേസർ 50 അ‌ൾട്രയുടെ 12GB + 256GB മോഡലിന് 5699 യുവാൻ (ഏകദേശം 65,470 രൂപ) ആണ് വില. 12GB + 512GB മോഡലിന് 6199 യുവാൻ (ഏകദേശം 71,220 രൂപ) നൽകണം. ഇന്ത്യൻ വേരിയന്റിന്റെ വില ഇപ്പോൾ വ്യക്തമല്ല. ആമസോണിന് പുറമേ, മോട്ടറോളയുടെ വെബ്​സൈറ്റ് വഴിയും ഓഫ്‌ലൈൻ സ്റ്റോറുകൾ വഴിയും ജൂലൈ 4 മുതൽ തന്നെ ഈ ഫോൺ ലഭ്യമാകും.