നോകിയ ആന്‍ഡ്രോയ്ഡ് ഫോണിന്റെ പേര് നോകിയ X; അനൗദ്യോഗിക സ്ഥിരീകരണം

ഏറെക്കാലമായി പറഞ്ഞുകേള്‍ക്കുന്ന നോകിയയുടെ ആദ്യ ആന്‍ഡ്രോയ്ഡ് ഫോണിന്റെ പേര് നോകിയ X എന്നായിരിക്കുമെന്ന് ഉറപ്പായി. നോകിയ X എന്നു രേഖപ്പെടുത്തിയ കമ്പനിയുടെ പത്രക്കുറിപ്പ് ട്വിറ്റര്‍ യൂസറായ @evleaks ആണ് പോസ്റ്റ് ചെയ്തത്. അടുത്തയാഴ്ച സ്‌പെയിനിലെ ബാര്‍സലോണയില്‍ നടക്കുന്ന മൊബൈല്‍ വേള്‍ഡ് കോണ്‍ഗ്രസില്‍ ഫോണ്‍ ഔദ്യോഗികമായി പുറത്തിറക്കുമെന്നാണ് കരുതുന്നത്.

നേരത്തെ നോകിയയുടെ ആന്‍ഡ്രോയ്ഡ് ഫോണിന് നോര്‍മാന്‍ഡി എന്നായിരിക്കും പേര് എന്ന് അഭ്യൂഹമുണ്ടായിരുന്നു. ലീക് ആയ പ്രസ് ഷോട്ടില്‍ ആന്‍ഡ്രോയ്ഡ് ഫോണിന്റെ പച്ച നിറത്തിലുള്ള വേരിയന്റാണ് കൊടുത്തിരിക്കുന്നത്. നോകിയ X എന്നും പച്ച നിറത്തില്‍ എഴുതിയിരുന്നു. ഇതിനു പുറമെ കഴിഞ്ഞ ഏതാനും ദിവസങ്ങളില്‍ നോകിയയുടെ എല്ലാ സോഷ്യല്‍ മീഡിയ അക്കൗണ്ട് പേജുകളും പച്ച നിറത്തിലായിരുന്നു.

പച്ച നിറം പൊതുവെ ആന്‍ഡ്രോയ്ഡിനെ ആണ് സൂചിപ്പിക്കുന്നതെന്നതിനാല്‍ തന്നെ നോകിയ പുതിയ ആന്‍ഡ്രോയ്ഡ് ഫോണിന്റെ ലോഞ്ചിംഗുമായി ബന്ധപ്പെട്ടാണ് ഈ 'പച്ചവല്‍ക്കരണം' നടത്തിയതെന്ന് കരുതുന്നു.

ആന്‍ഡ്രോയ്ഡ് ഫോണ്‍ ആണെങ്കിലും വിന്‍ഡോസ് ഫോണിനു സമാനമായ ഇന്റര്‍ഫേസ് ആയിരിക്കും നോകിയ X-ന് ഉണ്ടാവുക എന്നാണ് അറിയുന്നത്. കൂടാതെ ആന്‍ഡ്രോയ്ഡ് ആപ്ലിക്കേഷന്‍ സ്‌റ്റോറായ ഗൂഗിള്‍ പ്ലേ സ്‌റ്റോറിനു പകരം നോകിയയുടെ സ്വന്തം ആപ് സ്‌റ്റോറായിരിക്കും ഫോണിലുണ്ടാവുക.

4 ഇഞ്ച് സ്‌ക്രീന്‍, 1.2 GHz ഡ്യുവല്‍ കോര്‍ സ്‌നാപ്ഡ്രാഗണ്‍ 200 പ്രൊസസര്‍, 512 എം.ബി. റാം, 5 എം.പി. പ്രൈമറി ക്യാമറ, ബ്ലുടൂത്ത്, ആന്‍ഡ്രോയ്ഡ് 4.4 കിറ്റ്കാറ്റ് ഒ.എസ്, 4 ജി.ബി. ഇന്റേണല്‍ മെമ്മറി, ഡ്യുവല്‍ സിം സപ്പോര്‍ട് എന്നിവയാണ് ഫോണിനുണ്ഡടായിരിക്കുമെന്ന് കരുതുന്ന മറ്റ് സാങ്കേതികമായ പ്രത്യേകതകള്‍.

മൊബൈല്‍ വേള്‍ഡ് കോണ്‍ഗ്രസിന്റെ ആദ്യ ദിനമായ ഫെബ്രുവരി 24-ന് നോകിയ പ്രത്യേക ചടങ്ങ് സംഘടിപ്പിച്ചിട്ടുണ്ട്. അവിടെവച്ചായിരിക്കും നോകിയ X ലോഞ്ച് ചെയ്യുന്നത്. കൂടാതെ ലൂമിയ 630, ലൂമിയ 635, ലൂമിയ 930 തുടങ്ങിയ ഫോണുകളും ലോഞ്ച് ചെയ്യുമെന്ന് കരുതുന്നു.