4,000 രൂപയില്‍ തുടങ്ങുന്ന ആന്‍ഡ്രോയിഡ് ഐസിഎസ് സ്മാര്‍ട്‌ഫോണുകളുമായി ഒലിവ്

Posted By: Staff

4,000 രൂപയില്‍ തുടങ്ങുന്ന ആന്‍ഡ്രോയിഡ് ഐസിഎസ് സ്മാര്‍ട്‌ഫോണുകളുമായി ഒലിവ്

ഒലിവ് ടെലികോം ആന്‍ഡ്രോയിഡ് ഐസിഎസ് പ്ലാറ്റ്‌ഫോമില്‍ മൂന്ന് സ്മാര്‍ട്‌ഫോണുകള്‍ അവതരിപ്പിക്കുന്നു. ഓഗസ്റ്റില്‍ ഇറക്കുന്ന ഇവയുടെ വില 4000 മുതല്‍ 12,000 രൂപ വരെയാണ്. ഒരു പ്രമുഖ ടെലികോം കമ്പനിയുമായി ചേര്‍ന്നാണ് ഈ മൂന്ന് ഉത്പന്നങ്ങളും ഇറക്കുകയെന്ന് ഒലിവ് ടെലികോം മാര്‍ക്കറ്റിംഗ് പ്രസിഡന്റ് അവിജിത് ദത്ത് പറഞ്ഞു. എന്നാല്‍ ഏത് കമ്പനിയാണെന്ന് ഒലിവ് വ്യക്തമാക്കിയിട്ടില്ല.

എയര്‍സെല്ലുമായി ചേര്‍ന്നാണ് ഒലിവ് സഹകരിക്കുന്നതെന്നാണ് ലഭിക്കുന്ന സൂചന. മികച്ച വോയ്‌സ്, ഡാറ്റാ പ്ലാനുകളുമായാണ് എയര്‍സെല്‍ ഈ ഉത്പന്നങ്ങളെ അവതരിപ്പിക്കുകയെന്നും ചില റിപ്പോര്‍ട്ടുകളുണ്ട്.

4000 രൂപയുടെ ഐസിഎസ് സ്മാര്‍ട്‌ഫോണിന് 3.2 ഇഞ്ച് സ്‌ക്രീനാണ് ഉണ്ടാവുക. അതേ സമയം 12,000 രൂപയുടെ ഹൈ എന്‍ഡ് സ്മാര്‍ട്‌ഫോണിന്റെ സ്‌ക്രീന്‍ വലുപ്പം 4.2 ഇഞ്ചായിരിക്കുമെന്നും അവിജിത് പറഞ്ഞു. ഈ രണ്ട് സ്മാര്‍ട്‌ഫോണുകളെ കൂടാതെ 8,000 രൂപയ്ക്ക് താഴെ വരുന്ന ഒരു സ്മാര്‍ട്‌ഫോണും കൂടി ഈ നിരയില്‍ ഉണ്ടാകും. എന്‍ട്രി, മിഡ് ലെവല്‍ സ്മാര്‍ട്‌ഫോണുകളില്‍ 800 മെഗാഹെര്‍ട്‌സ് പ്രോസസറും വില കൂടിയ മോഡലില്‍ 1.2 ജിഗാഹെര്‍ട്‌സ് പ്രോസസറുമാണ് ഒലിവ് ഉള്‍പ്പെടുത്തുന്നത്.

എയര്‍സെല്ലുമായി സഹകരിച്ച് ഇതിന് മുമ്പും ഒലിവ് സ്മാര്‍ട്‌ഫോണ്‍ മോഡല്‍ അവതരിപ്പിച്ചിരുന്നു. ഒലിവ്‌സ്മാര്‍ട് വി-എസ്300 എന്നായിരുന്നു ഈ മോഡലിന്റെ പേര്. ക്വാള്‍കോം സ്‌നാപ്ഡ്രാഗണ്‍ എംഎസ്എം8255 പ്രോസസറും ആന്‍ഡ്രോയിഡ് 2.3 ജിഞ്ചര്‍ബ്രജ് വേര്‍ഷനുമായിരുന്നു ഇതിലെ പ്രധാന സൗകര്യങ്ങള്‍. പുതിയ ഒലിവ് ഫോണ്‍ മോഡലുകളുടെ പേരും വ്യക്തമായ സവിശേഷതകളും കമ്പനി പുറത്തുവിട്ടിട്ടില്ല.

Please Wait while comments are loading...

Social Counting

ബ്രേക്ക് ന്യൂസ് അറിയിപ്പുകള് നേടൂ. - Malayalam Gizbot