കറങ്ങിത്തിരിഞ്ഞ് ഇങ്ങെത്തും, പോക്കറ്റിലാക്കിക്കോണം! വൺപ്ലസ് Ace 3V ലോഞ്ച് ചെയ്തു

ഇന്ത്യയിലെ വൺപ്ലസ് ആരാധകർക്ക് പ്രതീക്ഷപകർന്നുകൊണ്ട് വൺപ്ലസ് എയ്സ് 3V (OnePlus Ace 3V) ​ചൈനയിൽ ലോഞ്ച് ചെയ്തു. ലോഞ്ച് ചെയ്തത് ​ചൈനയിലാണെങ്കിലും അ‌തിൽ ഇന്ത്യയിലെ സ്മാർട്ട്ഫോൺ ആരാധകർക്കും സന്തോഷിക്കാൻ ഏറെ വകയുണ്ട്. കാരണം ഇന്ത്യയിൽ ഏറെ ആരാധകരുള്ള സ്മാർട്ട്ഫോൺ സീരീസാണ് വൺപ്ലസ് നോർഡ്.

വൺപ്ലസ് നോർഡ് സീരീസിൽ അ‌ടുത്തതായി ഇന്ത്യ അ‌ടക്കമുള്ള വിപണികളിലേക്ക് എത്താൻ പോകുന്നത് വൺപ്ലസ് നോർഡ് 4 ആണ്. ഇപ്പോൾ ​ചൈനയിൽ ലോഞ്ച് ചെയ്തിരിക്കുന്ന വൺപ്ലസ് എയ്സ് 3V ആണ് വൺപ്ലസ് നോർഡ് 4 എന്ന പേരിൽ ആഗോള തലത്തിൽ ലോഞ്ച് ചെയ്യുക എന്നാണ് റിപ്പോർട്ട്.

അ‌തിനാലാണ് വൺപ്ലസ് ​എയ്സ് 3Vയുടെ ലോഞ്ച് ഇന്ത്യയിലെ സ്മാർട്ട്ഫോൺ ആരാധകർക്ക്, പ്രത്യേകിച്ച് അ‌ടുത്ത നോർഡ് 4 ഫോൺ കാത്തിരിക്കുന്നവർക്ക് ആവേശം പകരുന്നത്. ഏറ്റവും പുതിയ സ്നാപ്ഡ്രാഗൺ 7+ ജെൻ 3 ചിപ്സെറ്റ് കരുത്താക്കിയാണ് ഈ വൺപ്ലസ് ഫോൺ എത്തിയിരിക്കുന്നത്. വൺപ്ലസ് നോർഡ് 4 ഇന്ത്യയിൽ ലോഞ്ച് ചെയ്യുന്നത് സംബന്ധിച്ച കൃത്യമായ ​ടൈം​ലൈൻ ഇതുവരെ പ്രഖ്യാപിച്ചിട്ടില്ല.

വൺപ്ലസ് ​എയ്സ് 3V ലോഞ്ച് ചെയ്ത സ്ഥിതിക്ക് അ‌ധികം ​വൈകാതെ വൺപ്ലസ് നോർഡ് 4 ന്റെ ലോഞ്ച് തീരുമാനിക്കും എന്നാണ് പ്രതീക്ഷിക്കപ്പെടുന്നത്. 2024-ൻ്റെ രണ്ടാം പകുതിയിൽ നോർഡ് 4 എത്തുമെന്ന് ചില റിപ്പോർട്ടുകൾ വന്നിരുന്നു. അതായത് ജൂണിനുശേഷം എപ്പോൾ വേണമെങ്കിലും ഇന്ത്യ ഉൾപ്പെടെയുള്ള വിപണികളിലേക്ക് ഈ ഫോൺ എത്തുമെന്ന് പ്രതീക്ഷിക്കാം.

വൺപ്ലസ് നോർഡ് 4 ന്റെ മുൻഗാമിയായ നോർഡ് 3 കഴിഞ്ഞ വർഷം ജൂലൈ 6 ന് ആണ് ലോഞ്ച് ചെയ്തത്. അതിനാൽ പുതിയ മോഡലും ഈ വർഷം അതേസമയം പ്രഖ്യാപിക്കാൻ സാധ്യതയുണ്ട് എന്നും പറയപ്പെടുന്നു. പുതിയ ഒരുപാട് ഫീച്ചറുകളും കരുത്തുറ്റ മികച്ച ചിപ്സെറ്റും ക്യാമറയുമെല്ലാമായാണ് വൺപ്ലസ് എയ്സ് 3വിയുടെ വരവ്.

വൺപ്ലസ് എയ്സ് 3Vയുടെ പ്രധാന ഫീച്ചറുകൾ: 6.74 ഇഞ്ച് (2772×1240 പിക്സലുകൾ) AMOLED ഡിസ്പ്ലേ, 60/90/120Hz വേരിയബിൾ റിഫ്രഷ് റേറ്റ്, 2150 നിറ്റ്സ് വരെ പീക്ക് ​ബ്രൈറ്റ്നസ്, 100% DCI-P3 കളർ ഗാമറ്റ്, 2160Hz ഹൈ-ഫ്രീക്വൻസി PWM ഡിമ്മിംഗ് എന്നിവ ഈ ഫോണിന്റെ ഡിസ്പ്ലേ ഫീച്ചർ ചെയ്യുന്നു.

അഡ്രിനോ 732 GPU ഉള്ള ഒക്ട കോർ സ്‌നാപ്ഡ്രാഗൺ 7+ Gen 3 4nm മൊബൈൽ പ്ലാറ്റ്‌ഫോം ആണ് ഈ സ്മാർട്ട്ഫോണിന്റെ കരുത്ത്. ഈ പ്രോസസറിന് ശക്തമായ പിന്തുണ നൽകാനായി 12GB / 16GB LPDDR5X റാം, 256GB/512GB UFS 4.0 സ്റ്റോറേജ് ഫീച്ചറുകളും നൽകിയിരിക്കുന്നു.

ആൻ​ഡ്രോയിഡ് 14 അ‌ടിസ്ഥാനമാക്കിയുള്ള കളർഒഎസ് 14ൽ ആണ് വൺപ്ലസ് എയ്സ് 3വിയുടെ പ്രവർത്തനം. ഇൻ-ഡിസ്‌പ്ലേ ഫിംഗർപ്രിൻ്റ് സെൻസർ, ഇൻഫ്രാറെഡ് സെൻസർ, ഡ്യുവൽ സിം ( നാനോ + നാനോ ), യുഎസ്ബി ടൈപ്പ് സി ഓഡിയോ, സ്റ്റീരിയോ സ്പീക്കറുകൾ, ഡോൾബി അറ്റ്‌മോസ് ഫീച്ചറുകളും ഇതിലുണ്ട്.

ഡ്യുവൽ റിയർ ക്യാമറ സജ്ജീകരണമാണ് ഇതിൽ ഒരുക്കിയിരിക്കുന്നത്. അ‌തിൽ 1/1.95″ സോണി IMX882 സെൻസറോട് കൂടിയ 50MP മെയിൻ ക്യാമറ, f/1.8 അപ്പേർച്ചർ, OIS, 8MP 120° അൾട്രാ വൈഡ് ക്യാമറ സോണി IMX355 സെൻസർ, f/2.2 അപ്പേർച്ചർ, LED ഫ്ലാഷ് എന്നിവ ഉൾപ്പെടുന്നു. സാംസങ് S5K3P9 സെൻസറോട് കൂടിയ 16MP ഫ്രണ്ട് ക്യാമറയുമുണ്ട്.

100W SuperVOOC ഫാസ്റ്റ് ചാർജിംഗുള്ള 5500mAh ബാറ്ററി, 5G SA/ NSA, ഡ്യുവൽ 4G VoLTE, Wi-Fi 7 802.11 be (2.4GHz + 5GHz), ബ്ലൂടൂത്ത് 5.4, ജിപിഎസ്: L1+L5; ഗ്ലോനാസ്: G1; ഗലീലിയോ: E1+E5a; QZSS: L1+L5, എൻഎഫ്സി, യുഎസ്ബി ​ടൈപ്പ് സി തുടങ്ങിയവയാണ് ഇതിലെ മറ്റ് പ്രധാന ഫീച്ചറുകൾ.

ടൈറ്റാനിയം ഗ്രേ, മാജിക് പർപ്പിൾ സിൽവർ നിറങ്ങളിൽ ഈ സ്മാർട്ട്ഫോൺ വിൽപ്പനയ്ക്ക് എത്തുന്നു. 12GB+ 256GB പ്രാരംഭ മോഡലിന് 1,999 യുവാൻ (ഏകദേശം 23,400 രൂപ) ആണ് വില. 12GB+ 512GB വേരിയന്റിന് 2,299 യുവാനും (ഏകദേശം 26,542 രൂപ), 16GB+ 512GB വേരിയന്റിന് 2599 യുവാനും (ഏകദേശം 30,430 രൂപ) വിലവരും.