വൺപ്ലസ് N6 ലൈറ്റ് വിപണിയിൽ: വാങ്ങും മുൻപ് ഈ കാര്യങ്ങൾ അറിഞ്ഞിരിക്കൂ!

വൺപ്ലസ് N6 ലൈറ്റ് ഇന്ത്യയിൽ എത്തിക്കഴിഞ്ഞു. 16,999 രൂപയാണ് ഈ സ്മാർട്ട്‌ഫോണിന്റെ വില. ആമസോൺ, വൺപ്ലസ് വെബ്‌സൈറ്റ്, വൺപ്ലസ് സ്റ്റോർ ആപ്പ്, എക്‌സ്പീരിയൻസ് സ്റ്റോറുകൾ, പ്രധാന റീട്ടെയിൽ ഔട്ട്‌ലെറ്റുകൾ എന്നിവ വഴി ഉച്ചയ്ക്ക് 12 മണി മുതൽ ഫോണിന്റെ വിൽപ്പന ആരംഭിക്കും. 20,000 രൂപയിൽ താഴെ ബജറ്റുള്ളവർ വൺപ്ലസ് N6, നോർഡ് CE6 ലൈറ്റ് എന്നിവയുമായി പുതിയ ഫോണിനെ താരതമ്യം ചെയ്യാനിടയുണ്ട്. വാങ്ങുന്നതിന് മുൻപ് അറിഞ്ഞിരിക്കേണ്ട പ്രധാന കാര്യങ്ങൾ ഇതാ.

ഫോണുകളുടെ പെർഫോമൻസിലേക്ക് വന്നാൽ മൂന്നും വ്യത്യസ്ത ആവശ്യങ്ങൾ മുന്നിൽ കണ്ടുള്ളവയാണ്. വൺപ്ലസ് N6 ലൈറ്റിൽ യൂനിസോക് T7250 4G പ്രൊസസറാണ് നൽകിയിരിക്കുന്നത്. 4GB റാം, 64GB സ്റ്റോറേജ്, 7,000mAh ബാറ്ററി, 15W ചാർജിംഗ് സപ്പോർട്ട് എന്നിവ ഇതിൽ വരുന്നു. എന്നാൽ വൺപ്ലസ് N6-ലേക്ക് പോയാൽ ഡൈമൻസിറ്റി 6360 അപെക്സ് പ്രൊസസർ, കൂറ്റൻ 8,000mAh ബാറ്ററി, 45W ഫാസ്റ്റ് ചാർജിംഗ് എന്നിവ ലഭിക്കും. ഇനി നോർഡ് CE6 ലൈറ്റിലാകട്ടെ, ഡൈമൻസിറ്റി 7400 അപെക്സ് പ്രൊസസറും 7,000mAh ബാറ്ററിയും മികച്ച FHD+ 144Hz പെർഫോമൻസുമാണ് വൺപ്ലസ് നൽകിയിരിക്കുന്നത്.

വൺപ്ലസ് N6 ലൈറ്റ് vs N6 vs നോർഡ് CE6 ലൈറ്റ്: ഡിസൈൻ, ക്യാമറ, ചാർജിംഗ്

ഡിസ്‌പ്ലേയുടെ കാര്യത്തിലും ക്യാമറയിലുമെല്ലാം ഈ മോഡലുകൾ തമ്മിൽ മാറ്റങ്ങളുണ്ട്. നോർഡ് CE6 ലൈറ്റിൽ 144Hz റിഫ്രഷ് റേറ്റുള്ള FHD ഡിസ്‌പ്ലേയും 4K വീഡിയോ ചിത്രീകരിക്കാൻ ശേഷിയുള്ള 50MP പ്രൈമറി ക്യാമറയുമാണുള്ളത്. എന്നാൽ വൺപ്ലസ് N6-ൽ 120Hz റിഫ്രഷ് റേറ്റുള്ള HD+ ഡിസ്‌പ്ലേയും 1080p വീഡിയോ സപ്പോർട്ടുള്ള 50MP ക്യാമറയുമാണുള്ളത്. N6 ലൈറ്റിലും 120Hz റിഫ്രഷ് റേറ്റ് വരുന്നുണ്ടെങ്കിലും ക്യാമറ 13MP ആയി കുറയുന്നു. മൂന്ന് ഫോണുകൾക്കും വാട്ടർ സ്പ്ലാഷ് റെസിസ്റ്റൻസും MIL-STD-810H റേറ്റിംഗും അവകാശപ്പെടുന്നുണ്ട്.

വൺപ്ലസ് N6 ലൈറ്റ് vs N6 vs നോർഡ് CE6 ലൈറ്റ്: 5G ബാൻഡുകളും ഓക്‌സിജൻഒഎസ് അപ്‌ഡേറ്റുകളും

നെറ്റ്‌വർക്ക് കണക്റ്റിവിറ്റിയാണ് അടുത്ത പ്രധാന വ്യത്യാസം. ഇന്ത്യയ്ക്ക് ആവശ്യമായ n1, n3, n5, n8, n28, n40, n41, n77, n78 എന്നീ ബാൻഡുകളുള്ള ഡ്യുവൽ 5G സപ്പോർട്ടോടെയാണ് നോർഡ് CE6 ലൈറ്റ് വരുന്നത്. N6-ൽ n1, n5, n8, n28, n41, n77, n78 എന്നീ ബാൻഡുകളുള്ള ഡ്യുവൽ 5G സപ്പോർട്ടുണ്ട്. എന്നാൽ വൺപ്ലസ് N6 ലൈറ്റ് 4G മാത്രമുള്ള ഫോണാണ്. സോഫ്റ്റ്‌വെയർ അപ്‌ഡേറ്റിലേക്ക് നോക്കിയാൽ, CE6 ലൈറ്റിൽ 2 ആൻഡ്രോയിഡ് വേർഷൻ അപ്‌ഡേറ്റുകളും 4 വർഷത്തെ സെക്യൂരിറ്റി അപ്‌ഡേറ്റുകളും ലഭിക്കും. N6-ൽ 2/3 വർഷത്തെ അപ്‌ഡേറ്റും N6 ലൈറ്റിൽ 36 മാസത്തെ ഫ്ലൂവൻസിയുമാണ് കമ്പനി വാഗ്ദാനം ചെയ്യുന്നത്.

വെറും പരസ്യങ്ങളിൽ വീഴാതെ സ്വന്തം ആവശ്യത്തിനനുസരിച്ച് ഫോൺ തിരഞ്ഞെടുക്കുക. മികച്ച ബാറ്ററി ലൈഫും വേഗത്തിലുള്ള ചാർജിംഗുമാണ് നിങ്ങളുടെ മുൻഗണനയെങ്കിൽ വൺപ്ലസ് N6 തന്നെയാണ് ബെസ്റ്റ്. മികച്ച ക്യാമറയും മികച്ച 5G കണക്റ്റിവിറ്റിയും വേണമെന്നുണ്ടെങ്കിൽ നോർഡ് CE6 Lite വാങ്ങാം. എന്നാൽ വളരെ പരിമിതമായ ബജറ്റിൽ മികച്ച UI അനുഭവം ആഗ്രഹിക്കുന്നവർക്ക് വൺപ്ലസ് N6 ലൈറ്റ് തിരഞ്ഞെടുക്കാം. ഈ മൂന്ന് ഫോണുകളും ആമസോണിലൂടെയും വൺപ്ലസിന്റെ ഔദ്യോഗിക ചാനലുകളിലൂടെയും സ്വന്തമാക്കാം.