ഡിമെൻസിറ്റി 9500 ചിപ്സെറ്റ് കരുത്തുള്ള ആദ്യ സ്മാർട്ട്ഫോണുകളുമായി ഓപ്പോ ​ഫൈൻഡ് X9 സീരീസ്; നമുക്കും വാങ്ങാം

സ്മാർട്ട്ഫോൺ വിപണിയിൽ വരുംകാലങ്ങളിൽ ബ്രാൻഡുകൾക്കിടയിൽ കരുത്തിന്റെ മത്സരം ശക്തമാക്കാൻ ശേഷിയോടെ, പുതിയ പ്രീമിയം സ്മാർട്ട്ഫോൺ ചിപ്സെറ്റ് മീഡിയടെക് പുറത്തിറക്കിയിരുന്നു. മീഡിയടെക് ഡിമെൻസിറ്റി 9500 (MediaTek Dimensity 9500) എന്ന പേരിട്ടിരിക്കുന്ന ഈ പ്രീമിയം ചിപ്സെറ്റ് കരുത്തിൽ ആഗോള തലത്തിൽ ആദ്യം അ‌വതരിപ്പിക്കപ്പെടുന്ന സ്മാർട്ട്ഫോണുകൾ ഓപ്പോ ഫൈൻഡ് X9 സീരീസ് (OPPO Find X9 Series) ​ആയിരിക്കും എന്ന് സ്ഥിരീകരിക്കപ്പെട്ടിരിക്കുന്നു. ഇന്ത്യ മൊബൈൽ കോൺഗ്രസ് (IMC) 2025ൽ വച്ച് ഓപ്പോയും മീഡിയടെക്കും പരസ്പരം സഹകരിക്കാനുള്ള തങ്ങളുടെ തീരുമാനം വെളിപ്പെടുത്തി.

ഓൺ-ഡിവൈസ് AI, ഊർജ്ജ കാര്യക്ഷമത, മൊബൈൽ ഇമേജിംഗ് എന്നിവ മെച്ചപ്പെടുത്തുന്നതിൽ പുതിയ മീഡിയടെക് ഡിമെൻസിറ്റി ചിപ്സെറ്റ് ഏറെ മുന്നിലാണ് എന്നാണ് റിപ്പോർട്ട്. 4K ടെക്സ്റ്റ്-ടു-ഇമേജ് ജനറേഷൻ, ഇമേജ്-ടു-ഇമേജ് സ്റ്റൈൽ കൺവേർഷൻ, റിയൽ-ടൈം AI ഗെയിമിംഗ് ഒപ്റ്റിമൈസേഷനുകൾ തുടങ്ങിയ ഫീച്ചറുകൾ സഹിതം ശക്തമായ എഐ ഫീച്ചറുകൾ അ‌വതരിപ്പിക്കാൻ കരുത്തുപകരാൻ ഈ പ്രീമിയം ചിപ്സെറ്റിന് കഴിയും.

മീഡിയടെക് ഡിമെൻസിറ്റി 9500 ചിപ്സെറ്റ് കരുത്ത് സ്ഥിരീകരിച്ചതോടെ ഓപ്പോയുടെ ​ഫൈൻഡ് X9 പ്രീമിയം സ്മാർട്ട്ഫോൺ സീരീസിനെ ചുറ്റിപ്പറ്റിയുള്ള ആകാംക്ഷയും വർധിച്ചിട്ടുണ്ട്. ഒക്ടോബർ 16 ന് ഫൈൻഡ് എക്സ്9 സീരീസ് ചൈനയിൽ ലോഞ്ച് ചെയ്യുമെന്ന് ഓപ്പോ ഇതിനകം സ്ഥിരീകരിച്ച കാര്യമാണ്. ഇപ്പോൾ ഈ സീരീസിന്റെ ഇന്ത്യൻ ലോഞ്ച് സംബന്ധിച്ച ഒരു നിർണായക വിവരവും എത്തിയിരിക്കുന്നു.

ഈ മാസം നടക്കുന്ന ​ചൈനീസ് ലോഞ്ചിന് പിന്നാലെ അ‌ടുത്ത മാസം തന്നെ ഓപ്പോ ഫൈൻഡ് X9 സീരീസ് ഇന്ത്യയിൽ ലോഞ്ച് ചെയ്യും എന്നതാണ് ഏറ്റവും പുതിയ വിവരം. ഇക്കാര്യം കമ്പനി ഔദ്യോഗികമായി തന്നെ സ്ഥിരീകരിച്ചു. ചിപ്സെറ്റിനപ്പുറം ഈ സീരീസിലെ ഫോണുകളുടെ മറ്റ് ഫീച്ചറുകളൊന്നും നിലവിൽ ഔദ്യോഗികമായി പുറത്തുവന്നിട്ടില്ല.

മീഡിയടെക് ഡൈമെൻസിറ്റി 9500 ചിപ്സെറ്റ്

മീഡിയടെക് ഡൈമെൻസിറ്റി 9500 ചിപ്സെറ്റ് തേർഡ് ജനറേഷൻ ഓൾ- ബിഗ്- കോർ സിപിയു ആർക്കിടെക്ചർ അവതരിപ്പിക്കുന്നു, അതിൽ ഒരു 4.21GHz അൾട്രാ-കോർ, മൂന്ന് പ്രീമിയം കോറുകൾ, നാല് പെർഫോമൻസ് കോറുകൾ എന്നിവ ഉൾപ്പെടുന്നു. ഈ കോൺഫിഗറേഷൻ മുൻ ജനറേഷനെ അപേക്ഷിച്ച് സിംഗിൾ-കോറിൽ 32% വർദ്ധനവും മൾട്ടി-കോർ പെർഫോമൻസിൽ 17% വർദ്ധനവും നൽകുന്നു, ഒപ്പം പീക്ക് പവർ ഉപഭോഗം 55% വരെ കുറയ്ക്കുന്നു.

കൂടാതെ, ഗ്രാഫിക്സിനായി, ആം ജി1-അൾട്രാ ജിപിയു സജ്ജീകരിച്ചിരിക്കുന്നു, ഇത് 33% വരെ ഉയർന്ന ഗ്രാഫിക്സ് പ്രകടനവും 42% മികച്ച പവർ എഫിഷ്യൻസിയും നൽകുമെന്ന് പറയപ്പെടുന്നു. നാനൈറ്റ്, മെഗാ ലൈറ്റ് പോലുള്ള അൺറിയൽ എഞ്ചിൻ സാങ്കേതികവിദ്യകൾ സംയോജിപ്പിക്കുന്നതിലൂടെ, മീഡിയടെക് സ്മാർട്ട്‌ഫോണുകളിലേക്ക് കൺസോൾ-ഗ്രേഡ് വിഷ്വലുകളും ലൈറ്റിംഗ് ഇഫക്റ്റുകളും കൊണ്ടുവരുന്നു.

പ്രമുഖ സ്മാർട്ട്ഫോൺ ബ്രാൻഡുകളെല്ലാം ഇതിനകം തന്നെ ഡൈമെൻസിറ്റി 9500 ചിപ്സെറ്റ് കരുത്തിൽ സ്മാർട്ട്ഫോണുകൾ ഇറക്കാൻ മീഡിയടെക്കുമായി സഹകരണം ഉറപ്പാക്കിക്കഴിഞ്ഞു എന്നാണ് റിപ്പോർട്ട്. ഈ ചിപ്സെറ്റ് കരുത്തിൽ വിവോ, സാംസങ്, ടെക്നോ, ലാവ, ഓപ്പോ അ‌ടക്കമുള്ള ബ്രാൻഡുകളുടെ ഫോണുകൾ എത്തും എന്നും വ്യക്തമായിട്ടുണ്ട്.

വിവിധ ബ്രാൻഡുകൾ പുതിയ മീഡിയടെക് ഡിമെൻസിറ്റി 9500 ചിപ്സെറ്റിൽ പ്രീമിയം സ്മാർട്ട്ഫോണുകൾ ഇറക്കാൻ തയാറെടുക്കുന്നുണ്ട് എങ്കിലും ഈ പ്രോസസർ ആദ്യം അ‌വതരിപ്പിക്കുക ഓപ്പോ ഫൈൻഡ് എക്സ് 9 സീരീസ് തന്നെയാണ് എന്നാണ് റിപ്പോർട്ട്. ക്വാൽകോം വളരെക്കാലമായി ആധിപത്യം പുലർത്തുന്ന ഇന്ത്യൻ സ്മാർട്ട്‌ഫോൺ വിപണി ഈ ചിപ്സെറ്റ് കരുത്തിലൂടെ മീഡിയടെക് പിടിച്ചെടുക്കുമോ എന്ന് കാത്തിരുന്ന് കാണേണ്ടതുണ്ട്.