വാങ്ങാൻ ഒന്നല്ല, ഏഴ് കാരണങ്ങൾ കാണിച്ചുതരാം; 7550mAh ബാറ്ററിയുമായി പോക്കോ F7 വിൽപ്പന തുടങ്ങി

ഇന്ത്യയിലെ ഏറ്റവും ബാറ്ററി ശേഷിയുള്ള സ്മാർട്ട്ഫോൺ എന്ന ലേബലുമായി പോക്കോ എഫ്7 (POCO F7) കഴിഞ്ഞ മാസം ഇന്ത്യയിൽ ലോഞ്ച് ചെയ്തിരുന്നു. ഈ സ്മാർട്ട്ഫോൺ ഇന്ന് മുതൽ ഇന്ത്യൻ സ്മാർട്ട്ഫോൺ വിപണിയിൽ വിൽപ്പനയ്ക്ക് എത്തിയിരിക്കുന്നു. ഫ്ലിപ്പ്കാർട്ട് വഴി ഉപയോക്താക്കൾക്ക് ഇപ്പോൾ ഈ സ്മാർട്ട്ഫോൺ ലോഞ്ച് ഓഫർ സഹിതം വാങ്ങാൻ ലഭ്യമാണ്. പോക്കോ F7 5ജിയുടെ 12GB + 256GB അ‌ടിസ്ഥാന വേരിയന്റിന് 31,999 രൂപയും 12GB + 512GB വേരിയന്റിന് 33,999 രൂപയുമാണ് വില. ലോഞ്ച് ഓഫറിന്റെ ഭാഗമായി 2000 രൂപ ബാങ്ക് ഡിസ്കൗണ്ട്/ എക്സ്ചേഞ്ച് ഡിസ്കൗണ്ട് ലഭ്യമാണ്.

ലോഞ്ച് ഓഫർ പ്രയോജനപ്പെടുത്തിയാൽ പോക്കോ എഫ്7 ന്റെ അ‌ടിസ്ഥാന മോഡൽ 29999 രൂപ വിലയിലും ഉയർന്ന വേരിയന്റ് 31999 രൂപ വിലയിലും വാങ്ങാനാകും. ലോഞ്ച് ഓഫറിന്റെ ഭാഗമായി 1 വർഷത്തെ അധിക വാറന്റി, 1 വർഷത്തെ സ്‌ക്രീൻ റീപ്ലേസ്മെന്റ് ഓഫറുകളും ലഭ്യമാകും. ഫ്രോസ്റ്റ് വൈറ്റ്, ഫാന്റം ബ്ലാക്ക്, സൈബർ സിൽവർ എന്നീ കളർ ഓപ്ഷനുകളിലാണ് ഈ ഫോൺ ലഭ്യമാകുക.

എന്തുകൊണ്ട് ഈ സ്മാർട്ട്ഫോൺ വാങ്ങണം എന്ന ചോദ്യത്തിന് 7 കാരണങ്ങൾ തങ്ങൾക്ക് ചൂണ്ടിക്കാണിക്കാനുണ്ട് എന്നാണ് പോക്കോ പറയുന്നത്. ആ കാരണങ്ങൾ ഇവയാണ്: 1- സ്നാപ്ഡ്രാഗൺ 8s Gen 4 പ്രോസസർ, 2- ഇന്ത്യയിൽ ലഭ്യമായതിൽ വച്ച് ഏറ്റവും ശേഷികൂടിയ 7550mAh ബാറ്ററി, 3- അ‌ടിസ്ഥാന വേരിയന്റ് തന്നെ 12GB റാം + 256GB സ്റ്റോറേജ് വാഗ്ദാനം ചെയ്യുന്നു.

4- ഒരു വർഷം അ‌ഡീഷണൽ വാറന്റി, 5- ഒരു വർഷ സ്ക്രീൻ റീപ്ലേസ്മെന്റ്, 6- നാല് വർഷത്തെ ആൻഡ്രോയിഡ് അ‌പ്ഡേറ്റ് + ആറ് വർഷത്തെ സോഫ്ട്വേർ അ‌പ്ഡേറ്റ്, 7- തുടക്കത്തിൽ വെറും 29999 രൂപ വിലയിൽ വാങ്ങാം. പോക്കോ എഫ്7 വാങ്ങാൻ ഈ ഏഴ് കാരണങ്ങൾ തന്നെ ധാരാളമാണ് എന്നാണ് പോക്കോ പറയുന്നത്.

പോക്കോ എഫ്7 5ജിയുടെ ഫീച്ചറുകൾ വിശദമായി പരിചയപ്പെടാം: 120Hz റിഫ്രഷ് റേറ്റുള്ള 6.83 ഇഞ്ച് (2800 x 1280 പിക്സലുകൾ) 1.5K OLED ഡിസ്പ്ലേയാണ് ഇതിലുള്ളത്. ഇത് 2560Hz വരെ ഇൻസ്റ്റന്റ് സാമ്പിൾ റേറ്റ്, ഡോൾബി വിഷൻ, 3840Hz ഹൈ-ഫ്രീക്വൻസി PWM ഡിമ്മിംഗ് ഐ പ്രൊട്ടക്ഷൻ, 3200 nits വരെ പീക്ക് ബ്രൈറ്റ്നസ്, കോർണിംഗ് ഗൊറില്ല ഗ്ലാസ് 7i പ്രൊട്ടക്ഷൻ ഫീച്ചറുകൾ സഹിതം എത്തുന്നു.

3.2GHz ഒക്ട കോർ സ്നാപ്ഡ്രാഗൺ 8s Gen 4 4nm മൊബൈൽ പ്ലാറ്റ്ഫോം ആണ് ഈ സ്മാർട്ട്ഫോണിന്റെ കരുത്ത്. അഡ്രിനോ 825 GPU, 12GB LPDDR5X റാം, 256GB / 512GB UFS 4.1 സ്റ്റോറേജ്, ആൻഡ്രോയിഡ് 15 അടിസ്ഥാനമാക്കിയുള്ള ഷവോമി ഹൈപ്പർഒഎസ് 2 എന്നിവയും ഇത് വാഗ്ദാനം ചെയ്യുന്നു.

ക്യാമറകളുടെ കാര്യമെടുത്താൽ, 1/1.95″ സോണി IMX882 സെൻസറുള്ള 50MP മെയിൻ ക്യാമറ, OIS, EIS, f/2.2 അപ്പേർച്ചറുള്ള 8MP അൾട്രാ-വൈഡ് ക്യാമറ, 4K 60fps വരെ വീഡിയോ റെക്കോർഡിംഗ് എന്നീ ഫീച്ചറുകൾ അ‌ടങ്ങുന്ന ഡ്യുവൽ റിയർ ക്യാമറ സജ്ജീകരണമാണ് ഇതിലുള്ളത്. ഫ്രണ്ടിൽ OV20B സെൻസറുള്ള 20MP ക്യാമറയും f/2.2 അപ്പേർച്ചർ, 1080p വരെ 60fps വീഡിയോ റെക്കോർഡിംഗ് എന്നിവ സഹിതം നൽകിയിട്ടുണ്ട്.

ഡ്യുവൽ സിം (നാനോ + നാനോ), 5G SA / NSA, ഡ്യുവൽ 4G VoLTE, ഇൻ-ഡിസ്പ്ലേ ഒപ്റ്റിക്കൽ ഫിംഗർപ്രിന്റ് സെൻസർ, ഇൻഫ്രാറെഡ് സെൻസർ, USB ടൈപ്പ്-സി ഓഡിയോ, സ്റ്റീരിയോ സ്പീക്കറുകൾ, IP66+IP68+IP69 റേറ്റിങ്സ്, യുഎസ്ബി ടൈപ്പ്-സി, എൻ‌എഫ്‌സി, 90W ഫാസ്റ്റ് ചാർജിങ് പിന്തുണയോടെ 7550mAh ബാറ്ററി എന്നിവയാണ് ഇതിലെ മറ്റ് പ്രധാന ഫീച്ചറുകൾ.