വിരൽ കാട്ടിയാൽ പലതും ചെയ്യും! റിയൽമി ജിടി 5 പ്രോ എത്തി; വൺപ്ലസ് 12 നും ഐക്യൂ 12 നും കനത്ത വെല്ലുവിളി

ഏറ്റവും പുതിയ സ്നാപ്ഡ്രാഗൺ 8 ജെൻ 3 ചിപ്സെറ്റുമായി എത്തിയ വൺപ്ലസ് 12, ഐക്യൂ 12 ഉൾപ്പെടെയുള്ള സ്മാർട്ട്ഫോണുകൾക്ക് വെല്ലുവിളി ഉയർത്തി റിയൽമി ജിടി 5 പ്രോ (Realme GT5 Pro) ചൈനയിൽ ലോഞ്ച് ചെയ്തു. ഇനി ശക്തന്മാരുടെ പോരാട്ടത്തിന് റിയൽമിയുടെ ഈ പ്രീമിയം സ്മാർട്ട്ഫോണുമുണ്ടാകും.

കഴിഞ്ഞ വർഷത്തെ റിയൽമി ജിടി 2 പ്രോയ്ക്ക് ശേഷം റിയൽമി പ്രോ ഫ്ലാഗ്ഷിപ്പ് ഫോണുകളൊന്നും അ‌വതരിപ്പിച്ചിട്ടില്ല. ഇപ്പോൾ റിയൽമി ജിടി 5 പ്രോയിലൂടെ ആ കഥ കമ്പനി മാറ്റിയെഴുതിയിരിക്കുന്നു. സ്‌നാപ്ഡ്രാഗൺ 8 ജെൻ 3 ചിപ്‌സെറ്റ് ആണ് ഈ പ്രീമിയം സ്മാർട്ട്ഫോണിന്റെയും പ്രധാന ആകർഷണം.

പ്രമുഖ ബ്രാൻഡുകളെല്ലാം സ്‌നാപ്ഡ്രാഗൺ 8 Gen 3 ചിപ്‌സെറ്റിൽ ഒരു പ്രീമിയം സ്മാർട്ട്ഫോൺ ഇറക്കാൻ മത്സരിച്ചുകൊണ്ടിരിക്കുന്ന സമയമാണിത്. ഷവോമിയും ഐക്യൂവും വൺപ്ലസുമെല്ലാം ആ മത്സരത്തിൽ ഇതിനകം ചേർന്നുകഴിഞ്ഞു. ഇപ്പോൾ റിയൽമിയും ഈ നിരയിലേക്ക് എത്തിയിരിക്കുന്നു. അ‌തേസമയം എപ്പോഴാണ് ഈ ഫോൺ റിയൽമി ഇന്ത്യയിൽ അ‌വതരിപ്പിക്കുക എന്ന് വ്യക്തമായിട്ടില്ല.

എതിരാളികളെ നേരിടാൻ കരുത്തൻ ഫീച്ചറുകൾ ഒട്ടും കുറയ്ക്കാതെയാണ് ഈ പ്രീമിയം പ്രോ മോഡലിന്റെയും വരവ്. ഇതിലെ ഫീച്ചറുകൾക്ക് വൺപ്ലസ് 12 ന്റെ ഫീച്ചറുകളുമായി ചില സാമ്യങ്ങൾ കാണാം. എന്നാൽ ചില ഫീച്ചറുകൾ വ്യത്യസ്തവുമാണ്. 100W വയർഡ് ചാർജിംഗുള്ള 5,400mAh ബാറ്ററി, 50W വയർലെസ് ചാർജിംഗ് തുടങ്ങി നിരവധി ഫീച്ചറുകളുമായാണ് റിയൽമി ജിടി 5 പ്രോയെത്തുന്നത്.

റിയൽമി ജിടി5 പ്രോയുടെ പ്രധാന പ്രത്യേകതകൾ: 144Hz റിഫ്രഷ് റേറ്റ് സഹിതം, 6.78 ഇഞ്ച് 1.5K BOE X1 AMOLED ഡിസ്പ്ലേയാണ് ഇതിലുള്ളത്. പരമാവധി 4,500 നിറ്റ്സ് ​ബ്രൈറ്റ്നസ് ഈ OLED സ്‌ക്രീനിനുണ്ട്. മാനുവൽ അഡ്ജസ്റ്റ്‌മെന്റുകൾ വഴി സ്‌ക്രീനിന് 1,000 നിറ്റ് ​ബ്രൈറ്റ്നസും 1,600 നിറ്റ് ഗ്ലോബർ മാക്സിമം ​ബ്രൈറ്റ്നസിലും എത്താൻ കഴിയുമെന്ന് റിയൽമി പറയുന്നു.

16GB വരെ LPDDR5X റാമും 1TB വരെ UFS 4.0 സ്റ്റോറേജും ജിടി5 പ്രോയിലുണ്ട്. GPU+CPU ഡ്യുവൽ ഷെഡ്യൂളിംഗ് ആദ്യമായി പ്രവർത്തനക്ഷമമാക്കുന്ന ഗീക്ക് പെർഫോമൻസ് പാനൽ 2.0 ആണ് മറ്റൊരു ഫീച്ചർ. ആൻഡ്രോയിഡ് 14- അ‌ടിസ്ഥാനമാക്കിയാണ് പ്രവർത്തനം. മൂന്ന് പ്രധാന ആൻഡ്രോയിഡ് അപ്‌ഡേറ്റുകളും നാല് വർഷത്തെ സുരക്ഷാ പാച്ചുകളും കമ്പനി വാഗ്ദാനം ചെയ്യുന്നു.

വൺപ്ലസ് 12 ന്റേതിന് സമാനമായ ക്യാമറ സജ്ജീകരണങ്ങളാണ് ഈ ഫോണിലും കാണാൻ കഴിയുക. 50MP LYT-808 പ്രധാന ക്യാമറയും ഒരു മിഡിൽ 8MP അൾട്രാവൈഡ് ലെൻസും (IMX355) നൽകിയിരിക്കുന്നു. ഇതോടൊപ്പം IMX890 സെൻസർ ഉപയോഗിച്ച് 50MP 3x പെരിസ്കോപ്പ് ക്യാമറയും റിയൽമി ജിടി 5 പ്രോ വാഗ്ദാനം ചെയ്യുന്നു.

സൂമിങ് ശേഷി വർധിപ്പിച്ചുകൊണ്ടാണ് ജിടി 5 പ്രോയുടെ വരവ് എന്ന് ഈ ഫീച്ചറുകൾ വ്യക്തമാക്കുന്നു. സെൽഫീക്കും വീഡിയോകോളുകൾക്കുമായി 32 എംപി ഫ്രണ്ട് ക്യാമറയും ഈ റിയൽമി പ്രീമിയം സ്മാർട്ട്ഫോൺ വാഗ്ദാനം ചെയ്യുന്നു. പാം അൺലോക്ക് ഫീച്ചറാണ് ജിടി 5 പ്രോയുടെ മറ്റൊരു സവിശേഷത.

ജിടി 5 പ്രോയുടെ ഡിസ്‌പ്ലേ ഓഫായിരിക്കുമ്പോൾ, സ്‌ക്രീൻ ഓണാക്കാനും വേഗത്തിൽ അൺലോക്കുചെയ്യാനും നിങ്ങളുടെ കൈപ്പത്തി നിവർത്തി സ്‌ക്രീനിനടുത്ത് കൊണ്ടുവന്നാൽ മതിയെന്ന് റിയൽമി പറയുന്നു. ​കൈ ആംഗ്യങ്ങൾ തിരിച്ചറിയുന്നതിന് ഇതിൽ ഒരു പ്രതേക സെൻസർ നൽകിയിട്ടുണ്ട് എന്നാണ് റിയൽമി വെളിപ്പെടുത്തുന്നത്. ​കൈകൊണ്ട് വായുവിൽ ആംഗ്യങ്ങൾ കാണിച്ച് നിയന്ത്രിക്കാൻ സാധിക്കുന്ന ഫീച്ചർ ആരെയും ആകർഷിക്കും.

ഇതിനായി എഐ ജെസ്റ്റർ കൺട്രോൾ സിസ്റ്റം റിയൽമി അ‌വതരിപ്പിക്കുന്നു. 12 ആംഗ്യങ്ങളിലൂടെ ജിടി 5 പ്രോ പ്രവർത്തിപ്പിക്കാം എന്നാണ് റിയൽമി പറയുന്നത്. ലാറ്ററൽ സ്വൈപ്പ്, ഓൺ- സ്‌ക്രീൻ കഴ്‌സർ നീക്കാൻ ചൂണ്ടുവിരൽ, ഹോമിലേക്ക് എത്താൻ കൈ ഫ്ലിപ്പുചെയ്യൽ എന്നിവയെല്ലാം ഇതിൽ ഉൾപ്പെടുന്നു.

100W ഫ്ലാഷ് ചാർജിംഗിനൊപ്പം 5400 mAh ബാറ്ററിയും 50W വയർലെസ് ഫ്ലാഷ് ചാർജിംഗും ജിടി 5 പ്രോയിലുണ്ട്. ഇത് വയർഡിൽ 12 മിനിറ്റിനുള്ളിൽ 50% ചാർജ് വാഗ്ദാനം ചെയ്യുന്നു, 1600 ചാർജിംഗ് സൈക്കിളുകൾക്ക് ശേഷവും 80% ബാറ്ററി ഹെൽത്ത് റിയൽമി ഉറപ്പ് നൽകുന്നു.

ഇൻ-ഡിസ്‌പ്ലേ ഫിംഗർപ്രിന്റ് സെൻസർ, ഇൻഫ്രാറെഡ് സെൻസർ, യുഎസ്ബി ടൈപ്പ്-സി പോർട്ട്, സ്റ്റീരിയോ സ്പീക്കറുകൾ, ഡോൾബി അറ്റ്‌മോസ്, 5G SA/NSA, ഡ്യുവൽ 4G VoLTE, ​വൈ​ഫൈ 7 802.11 be, ബ്ലൂടൂത്ത് 5.4, GPS (L1+L5 ഡ്യുവൽ ബാൻഡ്), ഡ്യുവൽ സിം (നാനോ + നാനോ) തുടങ്ങി നിരവധി ഫീച്ചറുകളും ഉണ്ട്.

റിയൽമി ജിടി5 പ്രോയുടെ 12GB+256GB വേരിയന്റിന് 3399 യുവാൻ (ഏകദേശം 39,860 രൂപ) ആണ് വില. അ‌തേപോലെ, 16GB+256GB വേരിയന്റിന് 3699 യുവാനും (ഏകദേശം 43,380 രൂപ), 16GB+512GB വേരിയന്റിന് 3999 യുവാനും (ഏകദേശം 46,910 രൂപ), 16GB+1TB വേരിയന്റിന് 4299 യുവാൻ (ഏകദേശം 50,430 രൂപ) വില നിശ്ചയിച്ചിരിക്കുന്നു.