കൊച്ചുകൊച്ചു വിജയങ്ങൾ കൊതിക്കുന്ന ഒരു മനസ് നിങ്ങൾക്കുമുണ്ടോ, എങ്കിൽ ഈ റിയൽമി ഫോൺ ഉറപ്പിച്ചോ!

ബജറ്റ് വിലയിൽ തുടങ്ങി പ്രീമിയം നിരക്കുകൾ വരെയുള്ള സെഗ്മെന്റുകളിൽ സ്മാർട്ട്ഫോണുകൾ ഇറക്കിക്കൊണ്ട് റിയൽമി മുന്നേറുകയാണ്. കഴിഞ്ഞമാസം ഇന്ത്യയിൽ റിയൽമി അ‌വതരിപ്പിച്ച ഫോണുകളുടെ എണ്ണം ഒരു ​കൈയിലെ വിരലുകളിൽ ഒതുങ്ങുന്നതല്ല. ഈ വർഷം തുടങ്ങിയതു മുതൽ തന്നെ റിയൽമി പുതിയ സ്മാർട്ട്ഫോണുകൾ ഇറക്കുന്നതിൽ ഈ ആവേശം പുലർത്തുന്നുണ്ട്.

റിയൽമി ഇന്ത്യയിൽ അ‌വസാനമായി ലോഞ്ച് ചെയ്തത് റിയൽമി സി65 5ജി എന്ന സ്മാർട്ട്ഫോൺ ആയിരുന്നു. ഏപ്രിൽ 26ന് ആയിരുന്നു ഈ ഫോൺ ഇന്ത്യയിൽ ലോഞ്ച് ചെയ്തത്. അ‌തിന് രണ്ട് ദിവസം മുൻപ് നാർസോ 70x 5ജിയും നാർസോ 70 5ജിയും റിയൽമി ഇന്ത്യയിൽ ലോഞ്ച് ചെയ്തിരുന്നു.

അ‌തായത്, ആഴ്ചകളുടെയും ദിവസങ്ങളുടെയും മാത്രം വ്യത്യാസത്തിൽ റിയൽമി തുടർച്ചായി പുതിയ സ്മാർട്ട്ഫോണുകൾ ഇറക്കിക്കൊണ്ടിരിക്കുന്നു. ഈ വർഷം തുടക്കം മുതൽ തുടങ്ങിയ ഈ ആവേശം റിയൽമി സി65 5ജിയുടെ ലോഞ്ചോടുകൂടി അ‌വസാനിച്ചിട്ടില്ല എന്ന് തെളിയിച്ചുകൊണ്ട് റിയൽമി ഒരു പുത്തൻ സ്മാർട്ട്ഫോണി​ന്റെ വരവ് കൂടി ഇപ്പോൾ സ്ഥിരീകരിച്ചിരിക്കുന്നു.

റിയൽമിയുടെ ആറാം വാർഷികത്തോട് അ‌നുബന്ധിച്ച് റിയൽമി ജിടി 6 സീരീസ് ഇന്ത്യയിൽ അവതരിപ്പിക്കുമെന്ന് കമ്പനി ഔദ്യോഗികമായി വെളിപ്പെടുത്തി. GT 2 സീരീസിന് ശേഷം ജിടി സീരീസിലെ റിയൽമി ഫോണുകൾ ഇന്ത്യയിൽ അ‌വതരിപ്പിക്കപ്പെട്ടിട്ടില്ല. അ‌തിനാൽ 2022 ന് ശേഷം ആദ്യമായി റിയൽമി ജിടി സീരീസ് ഇന്ത്യയിലേക്ക് വരുന്നു എന്ന പ്രത്യേകതയും റിയൽമിയുടെ ഈ പ്രഖ്യാപനത്തിനുണ്ട്.

ക്വാൽക്കോം സ്നാപ്ഡ്രാഗൺ 7+ ജെൻ 3 ചിപ്സെറ്റ് കരുത്തിൽ എത്തുന്ന റിയൽമി GT 6T (Realme GT 6T) എന്ന മോഡലാണ് റിയൽമി ഇന്ത്യയിൽ അ‌വതരിപ്പിക്കുക. ഇക്കാര്യം ഇതിനകം സ്ഥിരീകരിച്ച കമ്പനി ഈ മോഡലിനായി തങ്ങളുടെ ഒഫീഷ്യൽ വെബ്​സൈറ്റിൽ പുതിയ പേജും ആരംഭിച്ചിട്ടുണ്ട്. കൂടാതെ ട്വിറ്ററിലൂടെ ഈ മോഡലിന്റെ വരവ് സ്ഥിരീകരിക്കുകയും ചെയ്തു.

ഇന്ത്യയിൽ ലോഞ്ച് ചെയ്യും എന്നതിനപ്പുറം റിയൽമി ജിടി 6ടിയുടെ ലോഞ്ച് തീയതി കമ്പനി വെളിപ്പെടുത്തിയിട്ടില്ല. മേയിൽ തന്നെ ലോഞ്ച് ഉണ്ടാകും എന്ന് ടീസറിൽ വ്യക്തമാണ്. ക്വാൽക്കോം സ്നാപ്ഡ്രാഗൺ 7+ ജെൻ 3 ചിപ്സെറ്റ് ഇന്ത്യയിൽ അ‌വതരിപ്പിക്കുന്ന ആദ്യ സ്മാർട്ട്ഫോൺ എന്നാണ് റിയൽമി ജിടി 6ടിയെ കമ്പനി പരിയചപ്പെടുത്തിയിരിക്കുന്നത്.

കൊച്ചുകൊച്ചു വിജയങ്ങൾ ആഗ്രഹിക്കുന്ന ഒരു കുഞ്ഞു മനസാണ് നിങ്ങളുടേത് എങ്കിൽ ഈ റിയൽമി ഫോൺ നിങ്ങൾക്ക് അ‌നുയോജ്യമാണ് എന്ന് റിയൽമിയുടെ വെളിപ്പെടുത്തൽ സൂചിപ്പിക്കുന്നു. AnTuTu ബെഞ്ച്മാർക്ക് പ്ലാറ്റ്‌ഫോമിൽ റിയൽമി GT 6Tയ്ക്ക് 1.5 ദശലക്ഷത്തിലധികം പോയിൻ്റുകൾ സ്‌കോർ ചെയ്തെന്ന് ബ്രാൻഡ് അവകാശപ്പെടുന്നു.

മികച്ച വേഗത, പവർ എഫിഷ്യൻസി, പെർഫോമൻസ് എന്നിവയൊക്കെ കാഴ്ചവയ്ക്കുന്നതിൽ ഈ ഫോൺ മുന്നിട്ട് നിൽക്കുമെന്ന് കമ്പനി അ‌വകാശപ്പെടുന്നു. കാരണം നൂതന 4nm TSMC പ്രോസസറിലാണ് ഈ ചിപ്‌സെറ്റ് നിർമ്മിച്ചിരിക്കുന്നത്. സ്നാപ്ഡ്രാഗൺ 7+ജെൻ 2-മായി താരതമ്യം ചെയ്യുമ്പോൾ, ഇതിന് CPU പ്രകടനത്തിൽ 15% വർദ്ധനവും GPU പവറിൽ 45% വർദ്ധനവും നൽകുന്നുവെന്ന് റിയൽമി പറയുന്നു.

ഫ്ലാഗ്ഷിപ്പ് ലെവൽ പെർഫോമൻസ് കാഴ്ചവയ്ക്കുന്ന റിയൽമി ജിടി സീരീസ് ഫോണുകൾ മിഡ്- പ്രീമിയം സെഗ്‌മെൻ്റിനെ ലക്ഷ്യം വച്ചാണ് എത്തുന്നത്. റിയൽമി ജിടി 6ടിയ്ക്ക് ഒപ്പം, ഇന്ന് ​ചൈനയിൽ ലോഞ്ച് ചെയ്യപ്പെട്ട റിയൽമി ജിടി നിയോ 6 മോഡലും ഇന്ത്യയിൽ ​വൈകാതെ അ‌വതരിപ്പിക്കപ്പെട്ടേക്കാം. നിലവിൽ GT 6T മോഡലിന്റെ ഇന്ത്യൻ ലോഞ്ച് മാത്രമാണ് റിയൽമി സ്ഥിരീകരിച്ചിരിക്കുന്നത്.